Read cisena KALEMBERA 36 Bible Online

KALEMBERA 36 - cisena bible

KALEMBERA 36

¹Akadamu a mabanja a mbumba ya Gileadi mwana Makiri, pontho mdzukuluache Manase mwana Yosefe adenda kuna Mose na kuna akadamu anango

²mbalonga mbati, “MBUYA adakupangani kuti dzikoyi muigawire Aisraele pakuchita ntsango. Pontho adakupangani kuti mupereke pinthu pikhafuna tambira mbaleathu Zelofehadi kuna anache achikazi.

³Kwache dziwani kuti ngakhala iwo anasembwa na amuna a dzinza inango, penepo pinthu pyawo pinakhala pya dzinza inangoyo, pontho pinthu pyonsene pile pikhafuna khala pyathu pinachepa.

⁴Chaka chakubwezera, pandzidzi wakubwezera chinthu chonsene chikhadaguliswa kuna enechiro akutoma, pinthu pya ana achikazi a Zelofehadi pinathimizirwa kuna dzinza yasembwa iwo ile, tenepo pinthu penepi nkhabeve dzakhala pya dzinzathu tayu.”

⁵Natenepo Mose adapereka mwambo kuna Aisraele wakubulukira kuna MBUYA. Iye adalonga mbati, “Pyalonga dzinza ya Manase mphyakuona,

⁶natenepo MBUYA alonga kuti ana achikazi a Zelofehadi anakwanisa kusembwa na munthu onsene anafuna iwo, kwache akhale wakubulukira m'dzinza mwawo monthomo.

⁷Mfuma ya Aisraele nkhabe dzabuluka m'dzinza inango kwenda kudzinza inango, thangwi Muisraele onsene anakoya mfuma ya m'dzinza mwache idasiyirwa iye na makolo ache.

⁸Mkazi onsene ule anatambira pinthu pyasiyirwa iye na munthu wa dzinza ya Israele athema kusembwa na munthu wa dzinza yonthoyo. Na njira yeneyi Muisraele onsene anakwanisa kukwata mfuma ya makolo ache,

⁹pontho mfuma nkhabe dzabuluka m'dzinza inango kwenda kudzinza inango tayu. Dzinza yonsene inathimiza kukhala na pinthu pyache pyatambira iyo.”

¹⁰Natenepo Mala, Tiriza, Hogila, Milika na Nowa, ana achikazi a Zelofehadi, adachitadi ninga montho mukhadalongera MBUYA kuna Mose mbasembwa na pidzukulu pya ababawo.

¹²Iwo adasembwa na amuna a m'dzinza mwawo monthomo dzinza ya Manase mwana Yosefe, tenepo pinthu pyawo pidathimiza kukhala m'dzinza ya babawo.

¹³Wenewu ndiye mwambo na matongero adapereka MBUYA kuna Aisraele kudzera muna Mose m'maphedi a Moabu kumtunda unango wa mkulo wa Yorodani kuyang'anisana na Yeriko.