Read cisena KALEMBERA 4 Bible Online

KALEMBERA 4 - cisena bible

KALEMBERA 4

¹MBUYA adapanga Mose na Aroni

²kuti achite kalembera wa anthu onsene a mbumba ya Kohati. Iye aalembe madzina malingana na mtupo awo pontho mabanjawo.

³Alembe pontho amuna onsene a pyaka pya pakati pa makumatatu na makumashanu, ale athema kuphata basa m'Chikhumbi cha Mulungu.

⁴Basawo njakuyang'anira mwadidi pinthu pyakuchena pyakwanga.

⁵MBUYA adapereka kuna Mose matongero akuti: Ndzidzi ungafika wakuti anthu afuluse msasa. Aroni na anache apite m'Chikhumbimo atchithise chinguwo chakutchinga nacho Bokosi ya Chiverano mbampsampsika bokosiyo na chinguwocho.

⁶Kubuluka penepo aikhe pontho nthembe yadidi padzulu pachepo. Angamala penepo athasike nguwo yachoza padzulu pachepo. Kubuluka penepo atandalike miti yakuthukulira.

⁷Iwo athasike nguwo yachoza pathebulu yakuikhapo mkate wakuperekwa kuna MBUYA, pontho aikhepo mapalato na piwaya pyakufukizira pyakununkhira, pontho pitomba na ndilo pyakuphatisira basa kupereka nsembe ya pyakumwa; ndzidzi onsene pathebulu pathema kukhala mkate.

⁸Iwo athasike nguwo yakufira padzulu pa pyonsenepi, aikhe nthembe yadidi padzulu pachepo, angamala penepo atandalike miti yakuthukulira.

⁹Iwo akwate nguwo yachoza mbaimpsampsika chakuikhirapo nyale na nyale yache ene, pyakukwizira tsakalache, chakugweramo dotha na pyonsene pyakuikhiramo mafuta aolivi.

¹⁰Aikukutize mwadidi pabodzi na pinthu pyache pyakufunika pyonsene uku chili m'bwalo mwa nthembe yadidi na kuikha pambuto yakuthukulira.

¹¹Kubuluka penepo athasike nguwo yachoza paguwa yansembe yagolidi. Padzulu pachepo ampsampsikepo nthembe yadidi. Angamala penepo atandalike miti yakuthukulira.

¹²Iwo akwate pyombo pyache pyonsene pimbaphatisa iwo basa pakutumikira m'Mbuto Yakuchena. Apikukutize na nguwo yachoza apimpsampsike na nthembe yadidi pontho apiikhe pamiti yakuthukulira.

¹³Iwo abuluse dotha ya mafuta paguwa yansembe. Angamala penepo athasike nguwo yamsuzi wanyemba paguwapo.

¹⁴Iwo aikhe pyombo pimbatumikira iwo napyo paguwa yansembe. Pinthu pyache mphipi: pyakupalira moto, pyakujobolera nyama, mafosholo, na maphande. Angamala penepo apimpsampsike mwadidi na nthembe yadidi pontho atandalike miti yakuthukulira.

¹⁵Ndzidzi wakufulusa msasa ungakwana, pontho Aroni na anache angamala kumpsampsika pinthu pyakuchena pyonsene, mbumba ya Kohati idze dzathukula. Kwache mbumba ya Kohatiyo mbaleke khuya pinthu pyakuchenapyo gopesera anafa. Yeneyi ndiye basa ya mbumba Kohati ndzidzi onsene unafuluswa Chikhumbi cha Mulungu.

¹⁶Basa ya Eleazara mwana wa Aroni nkhuyang'anira mafuta a nyale, pyakufukiza pyakununkhira, chakupereka cha mapira, mafuta akudzoza nawo, pontho na Chikhumbi chonsene cha Mulungu na pyonsene pili mwenemo, pile mphyakupambulika kuna MBUYA.

¹⁷MBUYA adalonga kuna Mose na Aroni mbati,

¹⁸“Lekani tawirisa kuti mbumba ya Kohati

¹⁹imale kufa na thangwi ya kufika chifupi na pinthu pyakupambulikapi. Kuti penepi pileke chitika, Aroni na anache apite m'Chikhumbimo mbapasa munthu onsene basa, pontho na kumpanga chathema iye thukula.

²⁰Mbumba ya Kohati mbileke pita m'Chikhumbimo mbakaponya maso pana pinthu pyakuchenapi podi na pang'ono pene tayu, gopesera anafa.”

²¹MBUYA adapanga Mose

²²kuti achite kalembera wa anthu onsene a mbumba ya Gereshoni malingana na mtupo wawo pontho na mabanjawo.

²³Pontho kuti alembe amuna onsene a pyaka pya pakati pa makumatatu na makumashanu, ale ngakuthema kuphata basa m'Chikhumbi cha Mulungu.

²⁴Iwo basawo inakhala yakuthukula pinthu ipi:

²⁵Chikhumbicho, chinguwo chache chakuphimba nacho m'bwalo na kunja kwene, nthembe yadidi yakuphimba padzulu pachepo, chinguwo chakufunga nacho msuwo,

²⁶nguwo na nkhambala za mpanda wakuzungulira Chikhumbi na guwa yansembe, nguwo yakufunga nayo msuwo wa mpanda pontho na pinthu pyache pyonsene pyakuphatisira basa. Mbumba ya Gereshoni yathema kuphata basa yonsene yakufuna pinthu penepi.

²⁷Mose na Aroni ndiye anafuna dzaonesesa kuti mbumba ya Gereshoni aphatadi basa yonsene na kuthukula pinthu pyonsene pidaapanga Aroni na anache.

²⁸Yeneyi ndiye basa ya mbumba ya Gereshoni m'Chikhumbi cha Mulungu; mkadamu awo pabasa yeneyi akhali Itamara mwana wamamuna wa Aroni nyansembe.

²⁹MBUYA adapanga Mose kuti achite kalembera wa mbumba ya Merari yonsene malingana na mtupo awo pontho mabanjawo,

³⁰pontho kuti alembe madzina a amuna onsene a pyaka pya pakati pa makumatatu na makumashanu pyakubalwa, ale akhali akuthema kuphata basa m'Chikhumbi cha Mulungu.

³¹Iwo basawo inakhala yakuthukula matabwa, mitandaliko, mizati, matako a Chikhumbi cha Mulungu,

³²pontho na mizati, matako, ntchiri na nkhambala za mpanda zakuzungulira Chikhumbi cha Mulungu, na pyonsene pyakuphatisira basa. Munthu onsene umpase chinthu chathema iye kathukula.

³³Yeneyi ndiye basa inafuna phata mbumba ya Merari m'Chikhumbi cha Mulungu: mkadamu wawo pabasa yeneyi akhali Itamara mwana wamamuna wa Aroni nyansembe.

³⁴Pakuteweza matongero a MBUYA, Mose, Aroni na akadamu a dzinza yonsene ya Israele adalengesa magulu matatu anthu a Levi. Maguluwo mbawa: mbumba ya Kohati, mbumba ya Gereshoni na mbumba ya Merari. Iwo adaalengesa malingana na mitupo yawo pontho mabanjawo mbalemba amuna onsene a pyaka pya pakati pa makumatatu na makumashanu pyakubalwa, ale akhali akuthema kuphata basa m'Chikhumbi cha Mulungu. Konta ya magulu enewa ikhali tenepa: Mbumba ya Kohati onsene akhalipo pikwi piwiri na madzana manomwe na makumashanu. Mbumba ya Gereshoni onsene akhalipo pikwi piwiri na madzana matanthatu na makumatatu. Mbumba ya Merari onsene akhalipo pikwi pitatu na madzana mawiri. Onsene pabodzi akhalipo pikwi pisere na madzana mashanu na makumasere.

⁴⁹Munthu onsene adamala lembwa ninga mudalongera MBUYA kuna Mose; Tenepo ninga mudalongera MBUYA kudzera muna Mose, munthu onsene adapaswa basache kuti aphate penu chinthu chakuti athukule.