Read cisena KALEMBERA 5 Bible Online

KALEMBERA 5 - cisena bible

KALEMBERA 5

¹MBUYA adalonga kuna Mose mbati,

²“Panga Aisraele kuti abuluse mumsasa mwawo munthu onsene wakukhala na matanya, penu wakuchucha chinthu cha m'manungo mwache, pontho na munthu onsene okhonda chena thangwi ya kukhuya mtembo.

³Iwe wathema kuabulusa anthu ninga enewa okhonda chena mumsasa, towera aleke kuswipisa msasa umbakhala ine pakati pa anthu anga ule.”

⁴Aisraele adavera MBUYA mbaabulusa onsene ale mumsasa mule. Iwo adachita ninga montho mudalongera MBUYA kuna Mose.

⁵MBUYA adapanga Mose

⁶kulonga kuna Aisraele kuti ngakhala munthu anakhonda khulupirika kuna MBUYA mbadawira mwanzache, weneyu ngwakudawa.

⁷Iye athema kubweka pyakudawa pyache na kubwezera pyonsene kuna munthu adawira iyeyo, pontho athimizirepo chachishanu cha kontache.

⁸Mbwenye ngakhala munthu wakufuna kubwezerwayo afa, pontho nkhabe mbaleache chadi-chadi wakuti anakwanisa kutambira pyakubwezwapyo, penepo pinthu pyakubwezwapyo pabodzi pene na mwanabira wamamuna wakuchitira nsembe yakubulusa pyakudawa pya munthu ule piperekwe kuna MBUYA kuti pikhale pya nyansembe.

⁹Pyakusonkheswa pyonsene pyakupambulika pinapereka Aisraele kuna MBUYA pikhale pya nyansembe anapasa iwo pyakupereka ule.

¹⁰Nyansembe onsene akwate mitukwa yakupambulika inapereka munthu kuna iye kuti pikhale pyache.

¹¹MBUYA adapanga Mose

¹²kulonga kuna Aisraele kuti ngakhala mamuna akupenuka na mkazache kuti akuchita pinthu pyokhonda khulupirika kuna iye, pontho apiswipisa yekha ene pakugona na mamuna unango, mbwenye mamunayo hakupidziwisisa tayu, pontho kuti nkhabe umboni thangwi mkazi ambapichita mwakubisa pontho kuti nkhabe munthu unango adamphata akuchita tayu; penu ngakhala mamunayo nkhumchitira kwene ntchanje pontho akupenuka naye podi kwene kuti mkaziyo hakuchita pinthu pyokhonda khulupirika tayu,

¹⁵penepo mamunayo aende na mkazacheyo kuna nyansembe. Iye akwate pontho chakupereka chinafunikacho cha ufa wa barele wakukwana kilogramu ibodzi, mbwenye aleke ikha mafuta muufamo penu pyakufukiza pyakununkhira thangwi chenecho ntchakupereka cha mapira thangwi ya ntchanje, chile chaperekwa towera pyakuonadi pidziwike.

¹⁶Nyansembe abwere na mkaziyo mbamuimisa pamaso pa MBUYA.

¹⁷Iye akwate madzi akuchena mbaaikha m'ndilo. Akwate pontho mataka pang'ono a pansi pa m' Chikhumbi cha Mulungu mbaaikha m'madzi mule.

¹⁸Kubuluka penepo nyansembeyo asudzule tsisi ya mkazi ule, pontho ampase m'manja mwache chakupereka cha mapira thangwi ya ntchanje chile, uku nyansembeyo aphatira ndilo ya madzi akunyung'unya akudzesa dzedze ile, m'manja mwache.

¹⁹Kubuluka penepo nyansembe adumbirise mkaziyo papinthu pinalonga iyepyo kuti, “Ngakhala iwe hudachite uputa tayu, iwe nee unakuwazika nawo madzi akudzesa dzedzewa tayu.

²⁰Mbwenye ngakhala iwe udachitadi uputa,

²¹MBUYA mbachitise dzinako kukhala ya dzedze pakati pa anthu a dzinzako. Iye achitise pontho mimbako kufufuma na kuchitisa nthumbo yako kuuma.

²²Madzi awa apite m'manungo mwako kuti mimbako ifufume pontho nthumbo yako iume.” Mkaziyo atawire kuti, “Ande, mbipichitike tenepo.”

²³Kubuluka penepo nyansembe ule alembe pya dzedze yeneyi mumpukutu, angamala penepo apitsuke na madzi akunyung'unya ali m'ndilo mule.

²⁴Mkazi ule mbadzati kumwa madzi, ale anafuna kumchitisa kuti ave kupha pyakwanga,

²⁵nyansembe akwate chakupereka cha mapira thangwi ya ntchanje chili m'manja mwa mkazi ule, mbachipereka kuna MBUYA ninga mtukwa wakupambulika. Kubuluka penepo adze nacho kuguwa yansembe.

²⁶Tenepo nyansembe akwate ufa wakudzala m'manja mwache, ninga chakupereka cha chitsikimizo kuti pyonsene pyaperekwa kuna MBUYA mbapipyereza paguwa yansembe. Pakumalisa ampase madziwo mkazi ule kuti amwe.

²⁷Ngakhala mkaziyo achitadi uputa madzi anamchitisa kuti ave kupha pyakwanga pene; mimbache inafufuma pontho nthumbo yache inakuuma. Iye anakhala nyadzedze pakati pa anthu ache.

²⁸Mbwenye ngakhala iye hadachite uputa tayu, madziwo hanakuwazika nawo tayu, pontho anakwanisa kubala.

²⁹Wenewu ndiye mwambo wache ngakhala mamuna akuchitira ntchanje mkazache mbapenuka kuti mwinango mkaziyo akuchita uputa. Mkaziyo aimiriswe pamaso pa MBUYA tenepo nyansembe achite mtemo wenewu.

³¹Mamuna ayeswe okhonda dawa, mbwenye ngakhala mkazi adawa, athema kuoneswa nyatwa thangwi ya kudawa kwacheko.