Read cisena KALEMBERA 6 Bible Online

KALEMBERA 6 - cisena bible

KALEMBERA 6

¹MBUYA adapanga Mose

²kulonga kuna Aisraele kuti mamuna penu mkazi anadumbira kukhala Mnaziri mbapipereka yekha ene kuna MBUYA,

³athunde vinyu penu chakumwa chinango chonsene chakuledzeresa. Iye aleke kumwa madzi a mfesa, penu kudya nsapo zamfesa ziwisi penu zakuuma.

⁴Ndzidzi unakhala iye Mnaziri aleke kudya chinthu chonsene cha mfesa; podi na nthanga ene penu makoko ache.

⁵Ndzidzi unakhala iye Mnaziri aleke chinga tsisi yache penu ndevu zache. Iye athema kukhala wakuchena mpakana ndzidzi ache udadumbirira iye pamaso pa MBUYA umale; iye athema kuleka tsisi na ndevu zache kukula pyazo.

⁶Tsisi yache ntchidzindikiro chakuonesa kupambulika kwache kuna MBUYA, natenepo iye aleke kupiswipisa yekha ene pakufedzera chifupi na mtembo, podi kwene kuti afayo ndi babache, mache, mbaleache penu nyamaingache.

⁸Ndzidzi onsene unakhala iye Mnaziri iye apipambulira monsene mwene kuna MBUYA.

⁹Ngakhala unango afa mwakututumusa pamaso pache, penepa ndiye kuti tsisi yache yakupambulika ile yaswipiswa, natenepo iye athema kuchinga tsisi yache pansiku yache yakupichenesa nsiku yachinomwe.

¹⁰Tenepo pansiku yachisere iye adze na nkhangaiwa ziwiri penu majiwa mawiri kuna nyansembe pamsuwo wa Chikhumbi cha Mulungu.

¹¹Nyansembe apereke nsembe ibodzi kuna MBUYA ninga chakupereka chabulusira pyakudawa. Pontho inango ile aipereke kuna MBUYA ninga nsembe zakupyerera kuchita mwambo wakuchenesa nawo munthu ule thangwi iye adadawa pakukhala chifupi pikhafa munthu ule. Nsiku yonthoyo iye athema kuchitisa tsisi yache kukhala pontho yakupambulika.

¹²Iye athema kupipambulira pontho yekha ene kuna MBUYA thangwi ndzidzi wa nduli nkhabe werengerwa tayu, thangwi tsisi yache yakupambulika idaswipiswa. Natenepo iye athema kudza na mwanabira wa chaka chibodzi kuti akhale nsembe yakupagalira pyakudawa.

¹³Ndzidzi udadumbira iye kukhala Mnaziri ungamala, iye athema kuchita mwambo ufu: iye aende pamsuwo wa Chikhumbi cha Mulungu

¹⁴kapereka pamaso pa MBUYA nyama zitatu zakusowa chilema: bira wamamuna wa chaka chibodzi kuti akhale nsembe yakupyerera, bira wamkazi wa chaka chibodzi kuti akhale nsembe yakubulusira pyakudawa, na bira wamamuna kuti akhale nsembe yachiphatizano.

¹⁵Iye akwate pontho chakupereka cha mapira na chakupereka cha pyakumwa pontho na chitundu cha mikate yakusowa chakufufumisira, mikate yakutapira yakusasanywa na ufa wakunyodoka wakuvungazwa na mafuta aolivi, pontho na pitumbuwa pyakukhwazwa mafuta.

¹⁶Nyansembe apereke pinthu pyonsene kuna MBUYA kukhala nsembe yakubulusira pyakudawa na nsembe yakupyerera.

¹⁷Apereke chitundu chile pamaso pa MBUYA mbapereka nsembe ya bira wamamuna kukhala nsembe yachiphatizano; apereke pontho chakupereka cha mapira na chakupereka cha pyakumwa.

¹⁸Pamsuwo wa Chikhumbi cha Mulungu Mnaziriyo athema kuchinga tsisi yache yakupambulika ile. Kubuluka penepo akwate tsisiyo akaiponye pamoto, ule ukupyereza chakupereka cha chiphatizano.

¹⁹Mnaziriyo angamala chinga tsisi yakuonesa kupambulika kwache ile, nyansembe akwate mwendo ubodzi wakumsolo wa bira wakuphikwa kale, pabodzi pene na mkate na pitumbuwa pyakusowa chakufufumisira kubulukira m'chitundu mule mbapiikha m'manja mwache Mnaziriyo.

²⁰Kubuluka penepo apipereke kuna MBUYA ninga mtukwa wakupambulika; ipyo mphyakuchena pontho mphya anyansembe pabodzi pene na bele, pontho na mwendo wakuthako wa bira pidaperekwa kuna MBUYA pile. Penepi pingamala chitika Mnaziri anakwanisa kumwa vinyu.

²¹Wenewu ndiye mwambo wa Mnaziri; mbwenye ngakhala Mnaziri anadumbira kuti anapereka pizinji kupiringana munafunikira ipyo kuti piperekwe malingana na Unaziri wachewo, iye athema kuchita ninga monthomo malingana na kudumbira kwacheko.

²²MBUYA adapanga Mose

²³kulonga kuna Aroni na anache kuti iwo angafuna kutsanzayisa Aisraele athema kuphatisa basa mafala awa:

²⁴MBUYA mbakutsanzayiseni na kukuyang'anirani mwadidi;

²⁵MBUYA mbakukomereni mtima na kukuverani nsisi;

²⁶MBUYA mbachitise pinthu pyanu kufamba mwadidi na kukupasani mtendere.

²⁷Natenepo MBUYA adalonga mbati, “Ngakhala iwo anathula dzinanga kutsanzayisa Aisraele, ndinati ndiatsanzayisedi.”