Read cisena KALEMBERA 8 Bible Online

KALEMBERA 8 - cisena bible

KALEMBERA 8

¹MBUYA adalonga kuna Mose mbati,

²“Mpange Aroni kuti aikhe nyale zinomwe pachakuikhirapo chache, towera cheza chache chimwinikire kutsogoloko.”

³Aroni adaveradi mbaikha nyalezo kuziyang'anisa kutsogolo kwa chakuikhirapo nyale.

⁴Kutomera padzulu mpakana pansi chakuikhirapo nyalechi chidasasanywa na golidi wakuchita kufulwa na nyundo malingana na msasanyiro wache ukhadaoneswa Mose na MBUYA.

⁵MBUYA adalonga kuna Mose mbati,

⁶“Pambula dzinza ya Alevi pakati pa Aisraele onsene, pontho uchite mwambo wakuachenesa

⁷pakuchita tenepa: uawazire madzi akuachitisa kuti iwo akhale akuchena, pontho uapange kuti apale tsisi na ujoya onsene wa m'manungo, pontho na kufula nguwo zawo. Tenepo iwo anakhala akuchena pamaso pa Mulungu.

⁸Kubuluka penepo iwo athema kukwata mwanamphulu wamamuna pabodzi pene na chakupereka cha mapira cha ufa wakunyodoka wakuvungazwa na mafuta aolivi; pontho athema kukwata ng'ombe inango imuna kuti ikhale nsembe yakubulusira pyakudawa.

⁹Kubuluka penepo gumanyisani dzinza yonsene ya Aisraele. Tenepo kwatani dzinza ya Alevi kuaimisa patsogolo pa Chikhumbi cha Mulungu.

¹⁰Aisraele asanjike manjawo pamsolo pa Alevi,

¹¹natenepo Aroni apereke kuna ine Alevi ninga mtukwa wakupambulika kuna ine kubulukira pakati pa Aisraele towera andiphatire basa.

¹²Alevi asanjike manjawo pana ng'ombe zimuna ziwiri; ibodzi yathema kuperekwa ninga nsembe yakubulusira pyakudawa, inangomboyo ninga nsembe yakupyerera, towera achite mwambo wakuchenesa nawo Alevi.

¹³“Imirisa Alevi pamaso pa Aroni na anache mbuapereke kuna MBUYA ninga mtukwa wakupambulika pakati pa Aisraele. Aroni na anache anakhala anyakuyang'anira Alevi.

¹⁴Apambule na njira yeneyi pakati pa Aisraele onsene towera iwo akhale anga ene.

¹⁵Ungamala kuichenesa na kuipambula dzinza ya Alevi kuna ine, iyo inakhala yakuthema kuphata basa m'Chikhumbi cha Mulungu.

¹⁶Enewa mba Israele ale athema kuperekwa kuna ine. Ine ndaakwata kukhala anga ene m'mbuto mwa ana autombo onsene a Aisraele.

¹⁷Mwana wautombo wachimuna onsene wa Aisraele, wa munthu penu wa nyama, ngwanga. Pidapha ine ana autombo achimuna onsene a mu Iguputo, ana autombo onsene a Aisraele ndidaapambula kuti akhale anga ene.

¹⁸Chinchino ndakwata dzinza ya Alevi m'mbuto mwa ana autombo achimuna onsene a Aisraele.

¹⁹Ndapereka Alevi ninga mtukwa kuna Aroni na anache achimuna kubulukira kuna Aisraele onsene, towera iwo aphate basa ya m'Chikhumbi cha kugumanikana na ine m'mbuto mwa Aisraele onsene, pontho kupereka nsembe zakulekerera pyakudawa pa Aisraele onsene, gopesera muliri unaagwera angafika chifupi na Mbuto Yakuchena.”

²⁰Tenepo Mose, Aroni na Aisraele onsene adapambulira dzinza ya Alevi kuna Mulungu ninga mudapilongera MBUYA kuna Mose.

²¹Alevi adachita mwambo wakupichenesa okha ene mbafula nguwo zawo. Tenepo Aroni adaapereka kuna MBUYA ninga mtukwa wakupambulika pyakwanga kuna iye mbachita pontho mwambo wakuachenesa.

²²Aisraele adachita pyonsene pidalonga MBUYA kuna Mose pya dzinza ya Alevi. Natenepo Alevi akhadachitiswa kukhala anthu akuthema kuphata basa m'Chikhumbi cha Mulungu mwakuyang'anirwa na Aroni na anache.

²³MBUYA adalonga kuna Mose mbati,

²⁴“Mamuna onsene wa dzinza ya Alevi angakwanisa pyaka makumawiri na pishanu, weneyo athema kuphata basa m'Chikhumbi cha Mulungu,

²⁵mbwenye angakwanisa pyaka makumashanu, weneyo apume pabasacheyo.

²⁶Pandzidzi wenewu iye anakwanisa kuphedza Alevi anzache, mbwenye iye aleke phata basa ya unyansembe nsiku na nsiku. Iwe wathema dzachita ninga mwenemu kupereka basa kuna Alevi onsene.”