Read cisena KALEMBERA 9 Bible Online

KALEMBERA 9 - cisena bible

KALEMBERA 9

¹MBUYA adalonga na Mose m'thando yatchetcha ya Sinai mwezi wakutoma wa chaka chachiwiri pikhadabuluka Aisraele m'dziko ya Iguputo. Iye adalonga mbati,

²“Pansiku yakhumi na chinayi ya mwezi uno, kutomera pakuthobila dzuwa Aisraele achite Phwando ya Paska malingana na matongero pontho mwambo wache onsene.”

⁴Tenepo Mose adapanga Aisraele kuti achite Phwando ya Paska.

⁵Natenepo pansiku yakhumi na chinayi ya mwezi wakutoma pakuthobila dzuwa adachitadi tenepo m'thando yatchetcha ya Sinai. Aisraele adachitadi pyonsene pidatonga MBUYA kuna Mose.

⁶Mbwenye penepo pakhali anthu anango ale akhali okhonda chena pamaso pa Mulungu thangwi ya kukhuya mtembo. Iwo hadakwanise kusekera nawo Phwando ya Paska ile tayu pansiku yeneyo. Natenepo iwo adenda kuna Mose na Aroni

⁷mbalonga mbati, “Ife ndife okhonda chena pamaso pa Mulungu thangwi takhuya mtembo, mphapo ife tinakhondeserwanji kupereka chakupereka cha MBUYA pabodzi pene na Aisraele anzathu onsene pandzidzi wakusankhulikawu?”

⁸Mose adaatawira mbati, “Dikhirani mpakana ndive chinafuna kulonga MBUYA pya imwe.”

⁹Natenepo MBUYA adalonga kuna Mose mbati,

¹⁰“Apange Aisraele kuti ngakhala anango a imwe penu pidzukulu pyanu ngokhonda chena pamaso pa MBUYA thangwi ya kukhuya mtembo, penu iwo aenda kutali paulendo, iwo anakwanisa basi kusekera nawo Phwando ya Paska.

¹¹Kwache iwo akutawiriswa kuchita tenepo pangagwanda mwezi ubodzi pansiku yakhumi na chinayi pakuthobila dzuwa. Iwo athema kudya nyama ya mwanabira pabodzi pene na mkate wakusowa pyakufufumisira pontho na masamba akuwawasa.

¹²Iwo aleke koya pyakudyapyo mpakana mangwana mwache, pontho aleke kuswa magogodo a nyamayo. Iwo athema kusekera nawo Phwando ya Paska malingana na mwambo wache.

¹³Mbwenye ngakhala munthu, ule ngwakuchena pontho hadabulukepo kwenda ulendo tayu mbakhonda kusekera nsiku ya Phwando ya Paska, munthu weneyo hanayeswave mbodzi wa anthu anga tayu, thangwi iye hadapereke chakupereka kuna ine pandzidzi wakusankhulika. Iye athema kuoneswa nyatwa thangwi ya kudawa kwacheko.

¹⁴“Ngakhala pana mlendo pakati panu wakufuna kusekerambo namwe pabodzi Phwando ya Paska, iye athema kuchita tenepo mwakuteweza matongero na mwambo onsene. Mwambo wache ngontho, ule wathema kutewezwa na munthu onsene, mlendo penu mbalwa ya Israele.”

¹⁵Pansiku idaimiswa Chikhumbi cha Mulungu, makole adadza mbagudumira Chikhumbicho. Na mosiku makolewo akhaoneka ninga moto.

¹⁷Ndzidzi ukhakwira makole m'dzulu kubuluka pa Chikhumbi chile, Aisraele akhafulusa msasawo mbakamanga pontho pambuto pakhatchitha makolepo.

¹⁸Anthu akhafulusa msasawo ngakhala akhaapanga ndi MBUYA kuchita tenepo. Ngakhala makole akhathimiza kukhala padzulu pa Chikhumbi, Aisraele akhathimizambo kukhala pamsasa pontho-ponthopo.

¹⁹Ngakhala makole anakhala padzulu pa Chikhumbi ndzidzi ukulu ene, Aisraele akhavera MBUYA natenepo iwo nee akhafulukapo tayu.

²⁰Ndzidzi unango makole akhakhala padzulu pa Chikhumbi nsiku zache pang'ono basi; MBUYA angaapanga kuti afuluke, iwo akhafulukadi, mbwenye MBUYA angaapanga kuti akhale, iwo akhakhaladi.

²¹Ndzidzi unango makole akhakhala kwene kutomera mosiku kufikirana mangwana mwache na kumachibese. Natenepo iwo akhafuluka sindzidzi nkhuona kuti makole ale akwira m'dzulu. Ndzidzi onsene ukhakwira makole m'dzulu penu mosiku na masikati ene, iwo akhafuluka.

²²Podi makole akhale kwene nsiku ziwiri penu mwezi, penu chaka, penu kupiringana penepo, Aisraele hakhafuluka tayu ngakhala makole akhathimiza kukhala padzulu pa Chikhumbicho; mbwenye makole angakwira, iwo akhafulukapo.

²³Iwo akhamanga na kufulusa msasawo pakuvera matongero a MBUYA adapereka iye kudzera muna Mose.