Read cisena MIKA 1 Bible Online

MIKA 1 - cisena bible

MIKA 1

¹MBUYA adalonga kuna Mika wa kuluwani ya Moresheti, mwenemo Yotamu, Ahazi na Hezekia, mbali mafumu a Yuda. MBUYA adamuonesa masomphenya akulonga pya Samaria na Yerusalemu.

²Vani kuno, imwe madzinza onsene, vesera, iwe dziko yapansi na onsene anyakukhala mwenemo! MBUYA Mulungu anachita umboni wakupokanyisana namwe; Mbuya akulonga kubulukira kunyumbache yakuchena.

³Ngayang'anani! MBUYA akudza kubulukira kumbuto yache imbakhala iye; iye atchitha mbafamba pansonga ya mapiri.

⁴Mapiri ananyunguluka pansi pa manyalo ache pontho maphedi anadidimuka, ninga upula kunyunguluka pamoto, ninga madzi akuthamanga pamtelero.

⁵Pyonsenepi pinachitika, thangwi ya umambala wa pidzukulu pya Yakobo, thangwi ya pyakudawa pya dzinza ya Israele. Ayi umambala wa pidzukulu pya Yakobo ngwanji? Ayi si Samaria tayu? Ayi mbuto yakupembedzerapo milungu mu Yuda njipi? Ayi si Yerusalemu tayu?

⁶Natenepo MBUYA akulonga kuti, “Ine ndinati ndisanduse Samaria kukhala mulu wa madongolomwa, mbuto yakulimamo mfesa. Miyalache ndinati ndiitayire kuphedi, pontho maziko ache mbandiasiya nyimwa.

⁷Mifanikizo yache yonsene ndinaigwanda-gwanda; pinthu pya m'nyumba yakupembedzeramo milungu pile pidapagalwi maputache pinapiswa moto; ine ndinavunga milungu yache yonsene. Podi Samaria adagumanyisa pinthu kubulukira kuna maputache, ipyo pinati pikwatwe na anyamalwache kupagalimbo napyo maputa panyumba zinango zakupembedzerapo milungu.”

⁸Tenepo Mika adalonga mbati, “Na thangwi ya penepi, ine ndinalira na kusintili. Ine ndinafamba pyanga chipezi-pezi pontho wakusowa nsapato. Ndinagwenga ninga thika, pontho ndinalira ninga dzidzi.

⁹Thangwi pironda pyache nkhabe kuva mtombwe tayu; ipyo pyafika mpakana ku Yuda. Kuvungika kwache kwafika chifupi na mzinda wa anthu anga, mpakana na ku Yerusalemu kwene.”

¹⁰Lekani kupilonga kuna anthu a ku Gati; lekani lira na pang'ono pene. Mu Beteleafira[1] anthu mbabulumunde padotha.

¹¹Ndokoni kudziko ya unyaperezo chipezi-pezi pontho mwamanyadzo, imwe anthu a ku Shafiri. Anyakukhala mu Zaanani, mbaleke yesera kubuluka kunja tayu. Mungava anthu a ku Betezele kusintili, penepo iwo nkhabe dzakutchinjirizanive tayu.

¹²Anyakukhala mu Maroti aswipa mtima kudikhira chiphedzo, thangwi nyatwa zadza kubulukira kuna MBUYA, podi na kuna msuwo wa Yerusalemu ene.

¹³Imwe anyakukhala mu Lakishi, mangani akavalo papingolo. Imwe mudatsanzira kudawa kwa Israele, mbamudawisa anthu a ku Zioni.

¹⁴Natenepo gonekanani na anthu a ku Moresheti-Gati. Anthu a kuluwani ya Akizibu anaphatisa fuwa mafumu a ku Israele.

¹⁵Ine ndinadzesa nyakukunda kuna imwe, anyakukhala mu Maresha, ule anapokosera luwani yanu. Akadamu a Israele anaenda kabisala m'khwimba ku Adulamu.

¹⁶Anthu a ku Yuda, chingani tsisi yanu kuonesa kusintili, thangwi ya ananu ambakomerwa na imwe ale; khalani mpala ngeti-ngeti khala ninga m'khosi mwa nkhanga, thangwi iwo anati abuluswe pamaso panu kwenda kudziko ya unyaperezo.