Read cisena MIKA 2 Bible Online

MIKA 2 - cisena bible

MIKA 2

¹Dzedze kuna anyakusasanya kuchita pyakuipa, kuna ale ambanyerezera pyakuipa uku ali dedede patalimba pawo! Iwo ambapichita angalamuka na machibese, thangwi mphamvu zakuchitira penepi ali nazo.

²Iwo ambasirira minda mbaipokoseraletu; pontho nyumba mbazikwatiratu ninga zawo zene. Iwo ambadyera nkope-kope munthu na musache, pontho mbaphata m'maso nyapinthu pyache.

³Natenepo MBUYA akulonga kuti, “Ine ndikusasanya pyakudzesa nyatwa pana imwe, zile imwe nkhabe kwanisa kuzithawa tayu. Imwe nkhabe dzafambave mwakulunkuma tayu, thangwi wenewu unakhala ndzidzi wa nyatwa.

⁴Ndzidzi wenewo anthu anakutikanani; iwo anakusedegulani na nyimbo ya maliro kuti, ‘Ife tamala vungika monsene mwene; dziko yathu yamala gawanwa pyawo. MBUYA amala kutipokosera! Mindathu amala kuipereka kuna anyamalwathu.’ ”

⁵Natenepo nkhabe na mbodzi ene wa imwe anafuna dzatambira khundu pa dziko tayu ndzidzi unafuna MBUYA kubwezera pontho dziko kuna anthu ache.

⁶Anthu ambalonga kuna ine kuti, “Leka kutilalikira! Leka longa-longa pinthu ninga penepi; ife nkhabe dzachitiswa manyadzo tayu.

⁷Imwe pidzukulu pya Yakobo ayi imwe mwathema kulonga pyanu kuti, ‘Ayi kuuphata mtima kwa MBUYA kwamala? Ayi iye nkhuchita pinthu ninga penepi? Ayi mafalache nkhabe dzesa udidi tayu kuna iye nyakuchita pyakulungama?’ ”

⁸MBUYA akulonga kuti, “Kwache imwe mwasosa anthu anga ninga nyamalwa. Imwe mumbadula mbamuba mkhanjo wa anyakugwanda pyawo na njira, anyakudza kubulukira kunkhondo kunyerezera kuti ali pakupata.

⁹Imwe mumbathamangisa akazi a anthu anga kuabulusa m'misawo yadidi maka ile, pontho mumbaabera mitsanzayiso yanga kuna anawo kwenda na kwenda.

¹⁰Lamukani bulukani pano! Ino si mbuto yanu yakupumirapo tayu, thangwi yamala swipiswa na pyakudawika pyanu, tenepo yavungika monsene mwene.

¹¹“Ngakhala panadza nyakunama pontho nyakuphata anthu m'maso kulonga kuti, ‘Ine ndinati ndilonge mphangwa zauprofeti kuti panakhala vinyu na bwadwa mataka ene,’ mprofeti ninga weneyo ndiye ambafuna anthu enewa!

¹²“Ine ndinati ndigumanyise munthu onsene wa imwe, imwe pidzukulu pya Yakobo. Ndimomwene ndinakudzesani pabodzi pene, imwe anyakusala na moyo onsene a Aisraele. Ndinakugumanyisani pabodzi ninga mabira m'thanga, ninga mkumbi wa mabira mumpovu; dzikoyi inati idzale na anthu.”

¹³Nyakufumbula njira anati aende patsogolo pawo; iwo anati aswe misuwo ya mpanda kuabulusamo. Nyakutoma dzagwanda na penepo ndi mfumu wawo, msolo wawo mbakhala MBUYA.