Read cisena MIKA 4 Bible Online

MIKA 4 - cisena bible

MIKA 4

¹Pansiku yakumalisa phiri ile, pale pana Nyumba ya MBUYA, inakhazikiswa ninga phiri yakulaphaletu kupiringana mapiri anango onsene, tenepo madzinza azinji anagomokera kweneko.

²Madzinza azinji anabwera mbalonga mbati, “Tendeni tikwire paphiri ya MBUYA, ku Nyumba ya Mulungu wa Yakobo. Iye anakatifunzisa njira zache, towera ife tikwanise kuzitewera.” Chifunziso cha MBUYA chimbadza kubulukira ku Zioni; pontho ku Yerusalemu kumbabulukira mafalache.

³Iye anatonga mseru pakati pa anthu azinji; mbamalisa kukhonda vana pakati pa madzinza amphamvu achifupi na akutali ene. Iwo anafula matalasadawo kukhala mapaza, pontho madipawo kukhala mipeni yakusadzulira. Dzinza nkhabe dzachita nkhondo na dzinza inzache, penu kufunzisana pya nkhondo nkhabe tayu.

⁴Kada munthu anakhala pansi kuchedza pamitawi yache yamfesa na miti yamkuyu, tenepo nkhabe unango anafuna dzaagoswa tayu, thangwi alonga ndi MBUYA Wamphamvu zonsene.

⁵Madzinza anango onsene anakwanisa kuteweza njira za milungu yawo; mbwenye ife tinati titeweze njira za MBUYA Mulungu wathu kwenda na kwenda.

⁶MBUYA akulonga kuti, “Ndzidzi ukudza unafuna ine dzagumanyisa anyakulamala; ndinagumanyisa anthu onsene adakwatwa kwenda kudziko ya unyaperezo, pontho ale adachitisa ine kutsukwala.

⁷Anyakulamala na anyakutamiswa onsene ndinabwezera kwawo; anyakusalira na moyo ale ndinaachitisa kukhala pontho dzinza yamphamvu. Ine MBUYA, ndinakhala mtongi wawo paphiri ya Zioni kubulukira nsiku yeneyo pontho kwenda na kwenda.”

⁸Kulonga pya iwe, iwe nsanja ya nyakulondali mabira, iwe mpanda wamphamvu wa Zioni, demelero yakutoma ile inabwezerwa kuna iwe; ufumu unabwerera mu Yerusalemu.

⁹Watani unakalala tenepa? Thangwi yache ninji ukuva mtswotswo ninga mkazi wamimba pakubala? Ayi iwe nkhabe mfumu? Kani mapungu ako amala kufa?

¹⁰Khukhunyika iwe Zioni, thangwi ya mtswotswo ninga mkazi wamimba pakubala. Thangwi chinchino wathema kubuluka mumzindamu mbukakhala mumsasa kutsanga. Iwe unati uende ku Babiloni; kwache kweneko iwe unati upulumuswe. Kweneko MBUYA anati akuombole m'manja mwa anyamalwako.

¹¹Kwache lero madzinza azinji agumanyikana kufuna kuchita nawe nkhondo. Iwo akulonga kuti, “Yerusalemu mbaswipiswe pyache. Maso athu mbayang'ane pana kuvungika kwa Zioni!”

¹²Kwache iwo nkhabe dziwa tayu manyerezero a MBUYA; iwo nkhabe vesa pinthu pimbasasanya iye tayu, iye ule ambaakulumanya ninga misumbu ya tirigu mbadza nayo pambuwa kuti ambubude.

¹³MBUYA akulonga kuti, “Iwe Zioni, lamuka mbuabubude thangwi ine ndinakupasa nyanga zasimbi; ine ndinakupasa njondo zamkuwa, tenepo unapondedza-pondedza madzinza azinji. Iwe unapereka m'manja mwa ine, MBUYA pinthu pyagumana iwo pakuchita upandu, unadzesa mfumawo kuna ine, Mbuya, mtongi wa dziko yonsene yapansi.”