Read cisena MIKA 5 Bible Online

MIKA 5 - cisena bible

MIKA 5

¹Anyankhondo ako mbalikitike, iwe mzinda wa anyankhondo, thangwi iwe wazungulirwa na anyamalwa. Iwo anamenya mtongi wa Israele paphutu na ndodo.

²MBUYA akulonga kuti, “Mbwenye iwe, Betelehemu wa mu Efurata, podi kwene kuti ndiwe wamng'onoletu pakati pa madzinza a Yuda, kubulukira muna iwe munaoneka mtongi ule anafuna dzatonga Israele, ule phatache njakale na kale, kubulukira ndzidzi wakutomaletu.”

³Natenepo MBUYA anapasa Israele nkhodolo kufikirana mkazi, ule ana mimba, abale. Tenepo abale ache anango onsene adatamiswa ale abwerera kwawo kukhala pabodzi na Aisraele anzawo.

⁴Iye anayang'anira anthu ache ninga makabuswa na mphamvu zakubulukira kuna MBUYA, pontho na ukulu wa MBUYA Mulungu wache. Iwo anakhala pakupata, thangwi ndzidzi wenewo ukulu wache unafika mpakana kumadolomero a dziko yapansi.

⁵Tenepo iye anaapasa mtendere. Aasiria angapita m'dziko mwathu mbafamba mulikiti m'mipandathu yamphamvu, ife tinaenda kamenyana nawo na atongi athu azinji, pontho na akadamu ene ankhondo,

⁶ale anafuna dzakunda dziko ya Asiria, na talasada, dziko ya Nimirodi na talasada yakuchololwa. Mfumu wathu anatipulumusa m'manja mwa Aasiria, iwo angapita m'dziko mwathu, mbafamba pamulikiti kupita m'madire mwathu.

⁷Anyakusalira na moyo a mbumba ya Yakobo anakhala pakati pa madzinza azinji ninga bume yakubulukira kuna MBUYA; iwo anakhala ninga mafazi akuwazira maudzu, ale nkhabe dikhira matongero a munthu tayu penu kudembuka thangwi ya munthu tayu.

⁸Anyakusalira na moyo a mbumba ya Yakobo anakhala pakati pa madzinza azinji, ninga nkhalamu pakati pa pirombo pyam'tsanga, ninga mwana nkhalamu pakati pa mabira, ule ambafamba mbaanumphira na kuapwetedza mbapasowa na mbodzi ene wakuapulumusa.

⁹Imwe Aisraele munati mukunde anyamalwanu mbaavunga onsenewo, pontho anyakukuzondani onsene anamala vungwa.

¹⁰MBUYA akulonga kuti, “Pandzidzi wenewo ine ndinavunga akavalo anu mbandigujula-gujula pingolo pyanu pyankhondo.

¹¹Ndinavunga mizinda yonsene ya m'dziko mwanu mbandigwisa mipandanu yonsene yamphamvu.

¹²Ine ndinamalisa matsenganu onsene, mbandikhonda siya na nyakuombedza ene.

¹³Ine ndinavunga mifanikizo yanu yonsene pontho piguwa pyanu pyonsene pyakupambulika; imwe nkhabeve dzagodamira tayu pinthu pyasasanywa imwe na manjanu.

¹⁴Ndinatchikhula pakati panu adzimunthu onsene a milungu Ashera mbandivunga mizindanu.

¹⁵Na kuzhangali kwanga pontho ukali wanga ndinati nditchunyuse madzinza, adakhonda kundivera ale.”