Read cisena MIKA 6 Bible Online

MIKA 6 - cisena bible

MIKA 6

¹Veserani mafala a MBUYA kulonga kuti, “Lamukani mbamudembetere mseru wanu kuna mapiri; pitunda mbapive pinafuna imwe longapyo.

²Vani imwe mapiri, mseru wa MBUYA, veserani imwe, maziko akukhala na kukhala a dziko yapansi. Thangwi MBUYA ana mseru na anthu ache; iye anafuna apokanyisane na Aisraele.”

³MBUYA akulonga kuti, “Anthu anga, ayi chachita ine ninji kuna imwe? Ayi ndakunensani? Nganditawireni mphapo!

⁴Ine ndidakubulusani m'dziko ya Iguputo; mbandikuombolani kudziko yaubitchu. Ndidatuma Mose dzakutsogolerani, pontho Aroni na Miriamu.

⁵Anthu anga, kumbukani uphungu udapereka Balaki, mfumu wa Moabu, pontho kutawira kudachita Balamu mwana Beori. Kumbukani ulendo wanu kubulukira ku Shitimu kwenda ku Giligala, towera mukwanise kudziwa mabasa akulungama a MBUYA.”

⁶Ninji chinafuna ine kwata kuti ndidze nacho pamaso pa MBUYA mbandigodamira Mulungu Wakudzulu-dzulu? Ayi ndidze pamaso pache na nsembe yakupyerera, na anamphulu a chaka chibodzi?

⁷Ayi MBUYA anakomerwa napyo ndingadza kuna iye na mabira pikwi-pikwi penu mikulo pikwi khumi ya mafuta aolivi? Ayi ndipereke nsembe mwananga wautombo thangwi ya umambalanga, mwana wakubuluka m'chuno mwanga, thangwi ya pyakudawa pya moyo wanga?

⁸Iye akuonesa kale, iwe munthu, kuti chadidi ntchipi. Chinafuna iye kuna ife ntchichi: kuchita chilungamo, kuonesa kufunana kukulu, na kukhala na moyo wakupichepesa pamaso pa Mulungu.

⁹Kukhala na nzeru nkhugopa MBUYA. MBUYA akuchemera mzinda wa Yerusalemu kuti, “Veserani, imwe dzinza, ile imbagumanyikana mumzindamo!

¹⁰Ayi ndathema kulekerera, imwe dzinza ya anyakuipa, thangwi ya mfumanu idagumana imwe mwakubayo, pontho mdida wakunama wa efa ule ngwakutembererwa?

¹¹Ayi ndathema kuyesa nyakukhonda dawa munthu wakuphatisa basa midida yakunama wakukhala na mkuku wa miyezo yakuba?

¹²Amuna a mumzindamo akufuma ale ngakuzunguzika; anthu ache kunama nkhudya kwawo, pontho iwo ngakutapira m'kanwa.

¹³Natenepo ine ndatoma[2] kale kukuvungani, kukusakazani thangwi ya pyakudawa pyanu.

¹⁴Imwe munadya, kwache nkhabe dzakhuta tayu; imwe munakhala basi mimba kade-kade. Imwe munakoya pinthu, kwache m'thumba yakuphoka, pontho na ping'ono pene pyakoya imwe pile ndinapichitisa kuvungika pankhondo.

¹⁵Munabzala mbewu, kwache nkhabe kuzivuna tayu; imwe munasikinya mafuta aolivi, kwache imwe maka nkhabe kuaphatisa basa tayu; imwe munatchitchitha vinyu, kwache vinyuyo imwe nkhabe kummwa tayu.

¹⁶Imwe mwatewera pifunziso pya Mfumu Omri, mbamutewezambo makhaliro akuipa a mwanache, Mfumu Ahabu na banjache ene. Imwe mwatsanzira mitemo yawo, natenepo ndinati ndikusakazeni, pontho madzinza anango[3] anakuimbirani nswinyo; iwo anakuselusani.”