Read cisena MIKA 7 Bible Online

MIKA 7 - cisena bible

MIKA 7

¹Ine ndatsukwaladi kwene! Ine ndakhala ninga munthu wanjala wakuchimwana kugumana nsapo ndzidzi wa malimwe, pontho ndzidzi wakutchola mfesa; nkhabe na tsaputu ene yakuti ndinadya tayu, nkhabe na makuyu ene akuchimbiza kufira kuti ndinakwanisa kuva chamaba tayu.

²Anyakukhulupirika pamaso pa Mulungu onsene amala tswairwamo m'dzikomo; nkhabe nyakulungama asalira tayu. Onsene ambabisala kufuna kuchuchisa chiropa; munthu onsene ambateyera mbaleache msampha.

³Onsene mbanthu aluso kuchita pyakuipa; mathubu kwawo nkhafuna kutambira mitukwa basi, anyakutonga miseru ambafuna pya kudyekerwa, Anyamphamvu ambachita kutonga pinafuna iwo; iwo onsene ambapangana pyakuipa.

⁴Pyadidiletu pinakwanisa iwo kuchita pyakhala ninga ntcheswa; chakulungama chinakwanisa iwo kuchita ntchakuipaletu kupiringana nyakhanche. Nsiku yafika inafuna Mulungu kutchunyusa anthu, malingana na kuacheuza kudachita iye kudzera muna anyakulondali awo, maprofeti. Chinchino ndi ndzidzi unafuna iwo zunguzika msolo.

⁵Munthu mbaleke nyindira tsanthembache; penu kunyindira shamwaliache. Munthu mbachite mphole-mphole na malongero ache podi na kuna ule akhumbatira iye pagangafuwa pache.

⁶Thangwi mwana wamamuna akutikana babache, mwana wamkazimbo akupandukira mache, mkwenya nkhabe lemedza mebzalache tayu; anyamalwa a munthu mbanthu a pamsuwo pache.

⁷Mbwenye kulonga pya ine, maso anga ali pana MBUYA, ine ndinati ndimdikhire Mulungu Nyankhombo wanga; Mulungu wanga anati andive.

⁸Lekani kundiseka, imwe anyamalwanga. Podi kwene kuti ndagwa, ndinati ndilamuke pontho. Podi kwene kuti ndikukhala mumdima, MBUYA ndiye anafuna khala cheza changa.

⁹Podi ine ndamdawira MBUYA, ine ndathema kuona nyatwa na ukali wache kufikirana andiikhire kunduli pamseru wanga, pontho andichitire chilungamo. Iye anati andibuluse mumdima kundidzesa kuna cheza; ine ndinaona chipulumuso chache.

¹⁰Tenepo anyamalwanga anaona penepi mbachitiswa manyadzo pikulu pene, ale adalonga kuna ine mbati, “Ali kupi MBUYA Mulungu wako?” Maso anga anaona kuvungika kwawo; podi na lero, iwo akupondedzwa pansi ninga matope m'njira.

¹¹Anthu a ku Yerusalemu, ndzidzi unafika unafuna imwe dzamanga mpanda wa mzinda, ndzidzi unafuna imwe dzafumulira madire anu.

¹²Ndzidzi wenewo anthu anabwerera kuna imwe kubulukira ku Asiria na kumizinda ya Iguputo, kubulukira ku Iguputo mpakana kumkulo wa Yufurate, kubulukira kubara mpakana kubara, kubulukira kumapiri mpakana kumapiri.

¹³Dziko inasanduka thando yatchetcha, thangwi ya pyakudawika pya anyakukhala mwenemo.

¹⁴MBUYA, dyesani mwadidi anthu anu na ndodo yanu, mkumbi wa mabira wa dzinzanu, ule uli okha ene m'tsanga, podi kwene kuti ali chifupi na mpovu. Alekeni akadye pyawo mu Bashani pontho Gileadi ninga mukhachitira iwo kale ene.

¹⁵MBUYA akulonga kuti, “Ninga mukhali ipyo ndzidzi udabuluka imwe m'dziko ya Iguputo, ine ndinakuonesani pyakudodomesa pyanga.”

¹⁶Madzinza anati apione penepi mbachita manyadzo, onsene mbamala khutchwa mano. Iwo anati aphate pakanwa pawo pontho makutu awo anagontha.

¹⁷Iwo anabwira fumbi ninga nyoka, ninga nyama zakukambadza. Iwo anasokoloka mwamantha m'madzimba mwawo; iwo anafika mwakutetemera pamaso pa MBUYA Mulungu wathu, pontho anachita naye mantha.

¹⁸Mbani pontho unango ninga imwe, Mulungu, nyakufudza pyakudawa pya anthu pontho nyakulekerera pyakudawa pya anyakusalira na moyo pakati pa anthu ache? Imwe nkhabe zhangali kwenda na kwenda tayu, mbwenye mumbakomerwa na kuavera nsisi.

¹⁹Imwe munava pontho nafe nyambalo; munapondedza pyakudawa pyathu pansi pa manyalo anu, mbamuponya pabara yakuzwika umambalathu onsene.

²⁰Imwe munakhulupirika kuna Yakobo, mbamukomera mtima Abrahamu, malingana na kudumbira kudachita imwe kale ene kuna makolo athu.