Read cisena NAHUMU 1 Bible Online

NAHUMU 1 - cisena bible

NAHUMU 1

¹Izi ndi mphangwa zakubulukira kuna Mulungu zakulonga pya masomphenya adaona Nahumu wa ku Elikoshi pya mzinda wa Ninevi.

²MBUYA ndi Mulungu wantchanje pontho wakubwezera; MBUYA ambabwezera; pontho ngwakudzala na ukali. MBUYA ambabwezera anyakumzonda, ukali wache mbuthimiza kukhala pana anyamalwache.

³MBUYA nkhabe chipsu tayu, pontho mphamvu zache nsikulu pyakwanga; MBUYA nkhabe dzaleka kwene anyakudawa okhonda kuatchunyusa tayu. Njirache imbafamba na iye ile ili m'chivumbulu pontho m'chonzi, makole ndi fumbi ya kumanyalo kwache.

⁴Iye ambalongera bara iyombo mbiumiratu kakata; iye ambachitisa mikulo yonsene kuuma gugudu. Minda ya Bashani na Phiri ya Karimele pimbamala unyala, pontho maluwa a ku Lebanoni ambafyokotoka.

⁵Mapiri ambatekenyeka pamaso pache; pitunda pimbamala nyunguluka. Dziko yapansi imbatetemera pamaso pache, dziko yapansi na onsene ambakhala mwenemo ale.

⁶Mbani anakwanisa kupirira na shungu yache? Mbani anakwanisa kupirira kuzhangali kwache kwakugoswa? Ukali wache wakhuthuka ninga moto; miyala mikulu-mikulu imbapeyeka pamaso pache.

⁷MBUYA ngwadidi, iye ndi mbuto yakupata ndzidzi wa nyatwa. Iye ambatsalakana mwadidi anyakumnyindira ale.

⁸Kwache ninga madzi makulu, iye anavunga monsene mwene anyakumzonda[1] ale. Iye anathamangisira anyamalwache kumdima.

⁹Pyakuipa pyonsene pinasasanya iwo kupokanyisana na MBUYA, iye anati apimalise. Anyamalawache nkhabe dzabwera kachiwiri tayu.

¹⁰Iwo anamangika pakati pa minga, pontho ninga madombe iwo amala ledzera; iwo anapiswa ninga maudzu akuuma.

¹¹Kubulukira kuna iwe, Ninevi, padza munthu unango, ule ambasasanya pyakuipa kupokanyisana na MBUYA, pontho ule ambapereka uphungu wakudawika.

¹²MBUYA akulonga tenepa kuna anthu ache Aisraele: “Podi kwene kuti Aasiria ngamphamvu pontho akuinjipa, onsenewo anati amale vungwa mbakhonda dzaoneka pontho. Podi kwene kuti imwe anthu a ku Yuda ndidakuchitisani ndine kubonera, kwache ine nkhabe dzapichita pontho tayu.

¹³Chinchino ndinati ndiswe magoli-goli a Aasiria kuabulusa m'khosi mwanu na kudumula nkhambala zidamangwa na imwe zile.”

¹⁴MBUYA apereka matongero awa pya imwe, Aasiria: “Imwe nkhabe dzakhala na pidzukulu tayu, pile pinafuna dzakoya dzinanu. Ine ndinati ndivunge mifanikizo yanu, ile ili m'nyumba zanu zakupembedzeramo milungu, mifanikizo ya miti na ntove ene mbandiitayira kunja. Ine ndinakusasanyirani masiye thangwi imwe mwasanduka chivunde!”

¹⁵Ngayang'ana pamapiri manyalo a munthu wakudza na Mphangwa Zadidi, ule ambalalika pya mtendere! Sekera maphwando ako, iwe Yuda mbuchitise kukwana-kwana pinthu pidadumbira iwe pile. Nkhabeve anyakudawika anapita pontho m'dziko mwako tayu; iwo anamala vungwa monsene mwene.