Read cisena NAHUMU 2 Bible Online

NAHUMU 2 - cisena bible

NAHUMU 2

¹Nyakusosa akudza kuna iwe, Ninevi. Londali mpandako wamphamvu, tchinjiriza misewu yako! Pivazike wekha ene pida pyankhondo; mangani matimbira kusasanyikira nkhondo!

²MBUYA anabwezera demelero ya Yakobo, ya Israele ninga mukhali ipyo kale, podi kwene kuti anyakuvunga adamsandusa madembe pontho kuti adamala pwayula mfesa zache.

³Pyakugedera matswimo pya anyankhondo ache pili piriwiri; anyankhondo ache amphamvu amala vala pyakufira. Pisimbi pya pingolo pili yeti-yeti kusasanyikira nsiku inafuna ipyo dzaphata basa; akavalo[2] akufukula-fukula pansi.

⁴Pingolo pili fumbi nyodo m'misewu kuthamanga uku na uku m'pithando pya mzinda. Ipyo pikuyerima ninga nsakali, pontho kumbuluka ninga ching'ani-ng'ani.

⁵Akadamu ankhondo akuchemereswa, kwache iwo akwenda mbagwegweduka pyawo. Iwo akuchimbiza kwenda kumafufu a mpanda wa mzindawo; pontho anyakuphatira pyakugedera matswimo amala khala m'mbuto zawo.

⁶Mwakufungira mikulo mwamala funguka; nyumba yachifumu yagwa.

⁷Matongero aperekwa kuti anthu a mumzindawo akwatwe unyaperezo;[3] anyabasache achikazi akulira ninga nkhangaiwa mbakhumata thangwi ya kutsukwala.

⁸Ninga madzi akubaula thawale, anthu a ku Ninevi akubulukamo. Kulira kukuveka kuti, “Ngaimirani! Ngaimirani!” Kwache nkhabe na mbodzi ene akubwerera tayu.

⁹Pokoserani siliva! Pokoserani golidi! Mfumache nkhabe mala tayu, pontho njokhonda lengeseka.

¹⁰Ninevi amala vungwa, iye apokoserwa pinthu pyache mbasala chipezi-pezi! Mitima ikunyunguluka, mabondo akugedemera na mantha, manungo akutetemera, pontho nkhope yonsene ikubuluka kaluma thangwi ya mantha.

¹¹Apo ili kupi nkhwimba ya nkhalamu, mzinda wa Ninevi, kumbuto kukhadyesera iwo anawo kule kule kukhaenda nkhalamu imuna na ikazi, pontho anawo mbakhala pakupata?

¹²Nkhalamu idapha nyama yakukwanira anache mbaikhwadzula-khwadzula nyama ile kuti mkazache adye; mbadzaza nkhwimbache na nyama yapha iye ile, pontho nyumbache na nyama yakhwadzula iye ile.

¹³MBUYA Wamphamvu zonsene akulonga kuti, “Ine ndina mseru na imwe. Ine ndinapisa pingolo pyanu, pontho talasada inakhamwadza ana nkhalamu. Ine nkhabe dzakusiyirani nyama tayu yakuti mudye padziko yapansi. Fala ya anyamphangwanu nkhabe dzaveka pontho tayu.”