Read cisena NAHUMU 3 Bible Online

NAHUMU 3 - cisena bible

NAHUMU 3

¹Dzedze kuna mzinda wachirope, wakudzala na pyakunama, wakudzala na pyakupokosera, wakuti nkhabe leka chita pyaupandu.

²Veserani kulira kwa mtswamu, ugwegwere-gwegwere wa magaleta, mchiti wa akavalo, pontho ugubudu-gubudu wa pingolo.

³Anyakupakira akavalo apomokera, matalasada akuchetuma-chetuma, madipa akuyetimira! Anthu azinji amala kuwazwa, milu ya anyakufa, mitembo yokhonda lengeseka mwakuti anthu akuchita kugwegweduka nayo!

⁴Pyonsenene pyachitika thangwi ya kuzuda kwa puta weneyu, Ninevi, mkazi wakudziwa kutopola na mchenache, ule na uputache adakwesha madzinza azinji, pontho na matsengache adabausa anthu azinji.

⁵MBUYA Wamphamvu zonsene akulonga kuti, “Ndinati ndikutchunyuse iwe, Ninevi! Ndinakukunjula nguwo mpakana kumsolo mbandionesa pezi pako kuna madzinza pontho maufumu anaona manyadzo ako.

⁶Ine ndinakukapira pyakunyansa. Ine ndinati ndikululupise, mbandikuchitisa kukhala chakusekesa.

⁷Onsene anafuna kuona anakuchalira mbalonga kuti, ‘Ninevi asala madembe ene pyache! Mbani anafuna kumsintili?’ Nkhupi kunafuna ine kagumana nyakukupukuta misozi?”

⁸Ayi iwe Ninevi, ndiwe wadidi kupiringana Tebesi, wakukhala pamkulo wa Nailo, uku azungulirwa na madzi? Mkulo ndiye ukhamtchinjiriza, madzi mbakhala mafufu ache.

⁹Kushi na Iguputo ndiye akhali mphamvu zache zokhonda mala; Puti na Libia ndiye akhali kukhundu kwache.

¹⁰Kwache iye adakwatwa unyaperezo mbaendeswa kudziko yantomi. Anache adamalwa nyedzwa-nyedzwa pankhomo yonsene ya njira. Akulu-akulu ache onsene amala tapatwa; anyakuaphata aachitira ntsango kuagawana.

¹¹Iwembo unaledzera; unaenda kabisala mbukasaka mbuto yakupata kuthawa anyamalwako.

¹²Mipandako yonsene yamphamvu yakhala ninga miti yamkuyu yakukhala na nsapo zache zakutoma fira; mitiyo ingatekenyeka makuyu ambagwera m'kanwa mwa anyakuadya.

¹³Ngayang'ana magulu ako ankhondo, onsene mbakazi okhokha! Misuwo ya mpanda m'dziko mwako ili khanang'ana pamaso pa anyamalwako; moto wamala pisa mphinga zache.

¹⁴Tungiratu madzi ndzidzi mbudzati fika wakuzungulirwa na anyamalwa wangisa pyakukutchinjiriza napyo! Phatisa basa dongo pontho munya mataka, umba njerwa!

¹⁵Kweneko kwene moto unakuvunga; talasada inakugwanda-gwanda, ninga mabobo kutedza-tedza mapira. Mwaswana ninga nthete, mwainjipa ninga nyadzombe!

¹⁶Imwe mwainjipisa anyamalondanu kufikirana iwo ainjipa kupiringana nyenyezi za kuthambo. Kwache mwakhala ninga nyadzombe, ule adamala sakaza dziko mbathawa pyache.

¹⁷Anyakulondali anu akhala ninga nyadzombe, mathubu anu akhala ninga uwumbi-wumbi wa nyadzombe, ule ambaphama m'mafufu pandzidzi wakutonthola, mbwenye dzuwa ingagaka onsene ambamala mbuluka pontho nkhabe na mbodzi ene ambadziwa kwaenda iye tayu.

¹⁸Iwe, mfumu wa ku Asiria, amakabuswako akuodzira; mathubu ako ali gunundu-gunundu kupuma. Anthu ako ali balala-balala m'mapiri, wakusowa na mbodzi ene wakuagumanyisa.

¹⁹Nkhabe mtombwe unakwanisa kuchiza chironda chako tayu chirondacho chasanduka njinda. Munthu onsene ule ava pyakuchitikira pile ambaimba m'manja thangwi ya kuvungwa kwako, thangwi mbani adakhonda lawa kukala mtima kwako kokhonda mala.