Read cisena HABAKUKU 1 Bible Online

HABAKUKU 1 - cisena bible

HABAKUKU 1

¹Izi ndi mphangwa zidatambira mprofeti Habakuku kubulukira kuna Mulungu:

²Mpakana lini MBUYA, ndichemere kufuna chiphedzo, kwache imwe nkhabe kundivesera tayu? Penu kulira kuna imwe kuti, “Upandu!” Mbwenye imwe nkhabe kupulumusa tayu?

³Thangwi yache ninji munandichitisa kuyang'ana pinthu pyakusowa chilungamo? Mwatani munatawirisa pyakudawika kuchitika? Kuvungika na upandu pyandizungulira, nthonga na mapoko-poko pyafika pachimache.

⁴Natenepo mwambo wamala mphamvu, pontho chilungamo nkhabe chitikave tayu. Anyakudawika akuponda pamsolo anyakulungama, mwakuti chilungamo chikupotozwa.

⁵Natenepo MBUYA adalonga kuna anthu ache mbati, “Chitani maso kwize pana madzinza anangowa mbamuone, pontho mbamudodome monsene mwene. Thangwi ine ndinati ndichitepo pinthu pandzidzi wa moyo wanu, mwakuti imwe nkhabe kupikhulupira tayu podi kwene kuti munthu unango achite pyache kukupangani tani.

⁶Ine ndinachitisa Ababiloni kukhala na mphamvu, dzinza ya anthu avinga pontho akuzunguzika ile, ale anafuna dzatswaira dziko yonsene yapansi kupokosera mbuto zakukhalamo zile si zawo tayu.

⁷Iwo ndi dzinza ya anthu akugoswa pontho akugopeka; iwo ambakwata mwambo m'manja mwawo mbapigumanira okha ene chilemedzo.

⁸“Akavalo awo ngakuthamanga pyakwanga kupiringana nyalugwe, ngakugoswa pyakwanga kupiringana thika m'chidodo. Anyakavalo akudza kubulukira kudziko yakutali; akavalo awo akufukula-fukula pansi. Iwo ambambuluka ninga mphamba kufuna kugonkha mwanapiye.

⁹“Onsenewo akudza na upandu ukulu. Magulu awo ankhondo akudza ninga mphepo ya m'thando yatchetcha mbagumanyisa anyaperezo khala ninga tchetcha.

¹⁰Iwo ambaselusa mafumu mbalulupisa atongi. Mizinda yonsene yakutchingwa na mpanda iwo ambaisedegula; iwo adamuluka milu ya mataka kutsamira mpanda mbaigwisa.

¹¹Tenepo iwo ambathamanga mbagwanda pyawo ninga mphepo, amuna akudawika, ale amphamvu zawo ndi milungu yawo.”

¹²MBUYA, ayi si imwe ule tayu mulipo kubulukira pakutomaletu? Mulungu wanga, Nyakuchena wanga, ule ambakhala na moyo kwenda na kwenda. MBUYA imwe mwaasankhula kuti atitchunyuse; imwe Phanzwi, mwaapasa mphamvu, towera ationese nyatwa.

¹³Maso anu ngakuchena pyakwanga mwakuti imwe nkhabe yang'ana pyakuipa; imwe nkhabe kwanisa kupirira na pyakuipa tayu. Apo thangwi yache ninji munayang'ana kwene mphandu kuchita pinafuna izo? Mwatani munakhala kwene mulomo phoo, mwenemo iwo akuvunga anthu, ale ngakulungama kupiringana iwo?

¹⁴Mwatani mwasandusa anthu kukhala ninga nsomba za m'bara, ninga pyakulengwa pya m'madzi pile nkhabe mtongi tayu?

¹⁵Ababiloni akuchita kuamedza anthuwo na chimedzo, penu kuamanga na malitchera, iwo ambaagumanyisa onsenewo na kokotawo; natenepo ambakomerwa na kusekera.

¹⁶Tenepo iwo akupereka nsembe kuna malitcherawo mbafukiza pyakununkhira kuna kokotawo, thangwi na malitcherawo iwo ambakhala na tsenzo mbakomerwa na kudya pyakudya pyadidiletu.

¹⁷Ayi iwo athema kuthimiza basi kuonja malitcherawo pontho kuvunga madzinza mwakusowa nsisi?