Read cisena HABAKUKU 2 Bible Online

HABAKUKU 2 - cisena bible

HABAKUKU 2

¹Ine ndinakhala ninga nyakulondali mbindikwira pansanja. Ndinaimira penepo kuti ndione chinafuna longa MBUYA kuna ine, pontho kutawira kunafuna iye[1] chita thangwi ya kudungunya kweneku.

²Tenepo MBUYA adatawira mbati, “Lemba mwakuoneka mwadidi papyakulemberapo pya miyala pyonsene pinafuna ine kukutchululira, towera nyakuwerenga onsene awerenge mwakukhonda nensa.

³Thangwi kutchulululwa kweneku kudikhira nsiku yache yakusankhulika; ipyo pikulonga pya mamalisiro pontho nkhabe dzalonga pyakunama tayu. Podi kwene kuti pichite nthontho tani, lila dikhira kwene basi; ipyo pinati pidze mbapikhonda dembuka.

⁴“Ngayang'anani, anyakuipa anamala kufa, kwache anyakulungama anati akhale na moyo thangwi ya kukhulupirika kwawo kuna Mulungu.”

⁵Ndimomwene mfuma imbanamiza; anyakutumbama nkhabe puma tayu. Podi kwene kuti iwo ngamtima ninga masiye pontho ninga imfa, iwo nkhabe khuta tayu, ambapigumanyira okha ene madzinza mbaphata unyaperezo anthu azinji ene.

⁶Ayi onsene a iwo nkhabe dzamsanyisa, kumtikana pontho kumsedegula tayu kuti, “Dzedze kuna iye ule ambapiinjipisira pinthu pyakuba mbapifumisa yekha ene na kudyera anango nkope-kope? Ayi penepi pyathema kuchitika mpakana lini?”

⁷Ayi anyamalwako nkhabe dzavumbuluka kabodzi kene tayu? Ayi iwo nkhabe dzalamuka mbakuchitisa mantha tayu? Tenepo iwo anapokosera pinthu pyako pyonsene.

⁸Na thangwi yakuti iwe wapokosera pinthu pya madzinza azinji ene, anyakusalira na moyo ale anati apokoserembo pinthu pyako. Thangwi iwe wachuchisa chiropa cha anthu azinji; iwe wavunga madziko pontho mizinda na anthu onsene a mwenemo.

⁹Dzedze kuna nyakumanga musache na njira zakupotoka, nyakumanga chisa chache padzulu, kufuna kuthawa kuvungika.

¹⁰Iwe wasasanya pyakuvunga madzinza azinji, kwache penepyo pyagwera iwe ene mwenechiroache kuchitisa manyadzo musako pontho kuvunga moyo wako.

¹¹Miyala ya mpanda inalira, pontho mphalupalu zinatayirira.

¹²Dzedze kuna nyakumanga mzinda thangwi yakuchuchisa chiropa mbakhazikisa luwani na kuchita pyaupandu.

¹³Ayi MBUYA Wamphamvu zonsene nkhabe funa tayu kuti basa yonsene yakupha yaphata anthu isanduke ninga nkhuni zakuphatisira moto, pontho kuti kaluma yonsene yabulusa madzinza a anthu isanduke yakusowa basa?

¹⁴Thangwi dziko inadzala na udziwisi wa demelero ya MBUYA, ninga mumbachitira madzi kudzala bara.

¹⁵Dzedze kuna nyakupasa tsanthembache chakumwa cha ukali wa MBUYA, kumchitisa kuledzera thophi-thophi towera amuonere pezi.

¹⁶Iwe unachita manyadzo pikulu pene m'mbuto mwa kukhala na demelero. Lerombo pyagwera iwepo! Imwa mbuonekembo pezi! Khomitcho ya kudzanja ya madyo ya MBUYA ikudza pana iwe, pontho demelero yako inasanduka manyadzo.

¹⁷Pyakuzunguzika pyonsene pyachita iwe kuna Lebanoni pinati pikuvunge, pontho kuvunga nyama konsene kudachita iwe kunati kukuchitisembo mantha. Thangwi wachuchisa chiropa cha anthu; iwe wavunga madziko pontho mizinda na anthu onsene a mwenemo.

¹⁸Ayi mfanikizombo una basa yanji, podi wachitwa kusemwa na munthu? Penu dzimunthu ule ambafunzisa pyakunama? Thangwi yache ninji nyakupisasanya onsene ambanyindira pinthu pidasasanya manjache? Iye ambasasanya mifanikizo, ile nkhabe kwanisa kulonga tayu.

¹⁹Dzedze kuna munthu ule ambalonga kuna thabwa kuti, “Khala m'maso!” Penu kulonga kuna mwala wakusowa muya kuti, “Ngalamukave!” Ayi icho chinakwanisa kumpanga munthu nzeru? Icho chakukutizwa na siliva pontho golidi, icho nkhabe muya tayu.

²⁰Kwache MBUYA ali m'Nyumbache yakuchena; dziko yonsene yapansi mbimatame pamaso pache.