Read cisena HABAKUKU 3 Bible Online

HABAKUKU 3 - cisena bible

HABAKUKU 3

¹Kuna nyakutchemula nyimbo na anyakatangale. Kupemphera kwa mprofeti Habakuku.[2]

²MBUYA, kuveka kwanu m'makutu mwanga kwafika, ine mabasanu, MBUYA, ndili nawo tetete. Achitiseni kukhala atswa nsiku zathu zino, achitiseni kudziwika pandzidzi wathu uno; tivereni nsisi, podi kwene kuti mwazhangali.

³Mulungu akudza kubulukira ku Temani;[3] Nyakuchena akudza kubulukira kuphiri ya Parani. Demelero yache yampsampsira kudzulu, pontho ukulu wache wamala dzala padziko yapansi.

⁴Demelero yache ikhali ninga kubuluka kwa dzuwa; cheza chidachetuma kubulukira m'manja mwache mudabisala mphamvu zache mule.

⁵Muliri udenda patsogolo pache; imfambo idaponda mphondero yache.

⁶Iye angaimira, dziko yonsene teke-teke; iye angayang'ana madzinza ambatetemera na mantha. Mapiri akale ambadidimuka pontho pitunda pya mvula zakale pimbalikitika. Njira zache nsakwenda na kwenda.

⁷Ine ndidaona anthu a ku Kushi kuchita mantha pontho anyakukhala ku Midiani kusanyika mtima pikulu pene.

⁸MBUYA, ayi imwe mudazhangalira mikulo? Ayi ukali wanu ukhali pana mikhwawa? Ayi imwe mudazhangalira bara, ndzidzi udapakira imwe pa akavalo anu pontho pingolo pyanu pyakukunda napyo?

⁹Imwe mudasolola utanu m'chakuikhiramo mwache mbamuchemeresa matswimo azinji ene. Dziko yapansi imwe mudaing'amba na mikulo,

¹⁰mapiri adakuonani mbakhunyata. Madzi makulu adatswaira; bara yakuzwika idavunduka mbikapiza mabimbi ache mpakana m'dzulu.

¹¹Dzuwa na mwezi pidaimira kudzulu na kuyetimira kwa matswimo anu akuthamanga, pontho na kuona uchetu-chetu wa madipanu.

¹²Na kuzhangali kwanu, imwe mudagwanda na padziko yapansi pontho na ukali wanu, imwe mudabubuda madzinza.

¹³Imwe mudenda kaombola anthu anu; kupulumusa nyakudzozwanu. Imwe mudapeya mkadamu wa dziko yakudawika imwe mudamdulisa nguwo kubulukira kumsolo mpakana kumanyalo.

¹⁴Na mombache onthowo, imwe mudamulasa nawo msolo wache, pidatiwumbikira anyankhondo ache kuti atibalalise. Iwo akhasekera khala ninga akhafuna kukhudyula anyakusowa mphamvu akhabisala ale.

¹⁵Imwe mudapondedza bara na akavalo anu, kuvundula madzi makulu.

¹⁶Ine ndidava pyonsenepi mtimanga mbudima, milomo yanga idagedemera na mantha, makhono anga adatonthola, pontho miyendo yanga idagogobodoka. Kwache ndinati ndidikhire mwakupirira nsiku ya nyatwa kudza pana madzinza anachita na ife nkhondowa.

¹⁷Podi kwene kuti muti wamkuyu nkhabe chita maluwa tayu, pontho mtawi wamfesa nkhabe bala msapo tayu; podi kwene kuti miti yaolivi ichimwane pyayo kubala tani, pontho minda kuchimwana kubulusa phoso; podi kwene kuti mabira amale pyawo kufa pontho mathanga mbasowa pyawo ng'ombe tani,

¹⁸kwache ndinasekera basi thangwi ya MBUYA, ndinakomerwa thangwi ya Mulungu Nyankhombo wanga.

¹⁹MBUYA Mulungu ndiye mphamvu zanga; manyalo anga iye ambaachitisa kukhala ninga manyalo a nyasa, iye ambandichitisa kwenda pamapiri.