Read cisena ZEFANIA 2 Bible Online

ZEFANIA 2 - cisena bible

ZEFANIA 2

¹Gumanyikanani, gumanyikani pabodzi, imwe dzinza yakuchitisa manyadzo

²mbudzati fika ndzidzi unafuna imwe dzatswairwa ninga masundu-sundu, mbukudzati fika pana imwe kuzhangali kwakugoswa kwa MBUYA, nsiku ya ukali wa MBUYA mbidzati fika pana imwe.

³Saka-sakani MBUYA, imwe anyakupichepesa a m'dzikomo, imwe ale mumbavera matongero ache. Chitani pyakulungama, pontho khalani akupichepesa; mwinango munakwanisa dzagumana pakuoserapo pansiku ya kuzhangali kwa MBUYA.

⁴Nthemba ya Gaza inapaswa nkhodolo, pontho Ashikeloni anasala madembe. Dzuwa ili ngerengende[3] Ashidodi anathamangiswa m'dziko mwawo, pontho Ekroni anamala dulwamo.

⁵Dzedze kuna imwe anyamgombe, imwe anthu a ku Kereti; MBUYA akulonga mwakupokanyisana nawe, iwe Kanani, dziko ya Afilisti. “Ine ndinati ndikuvungeni, pontho nkhabe na mbodzi ene anafuna dzasala na moyo tayu.”

⁶Dziko ile ili m'khundu-khundu mwa bara, kule kumbakhala Akereti, inakhala mbuto yakudyeserapo pifuyo pontho mathanga a mabira.

⁷Iyo inakhala m'manja mwa anyakusalira a m'banja ya Yuda; kweneko iwo anagumanako mpovu. Na mosiku iwo anagona m'nyumba za Ashikeloni. MBUYA Mulungu wawo anaayang'anira mwadidi; iye anachitisa pontho pinthu pyawo kufamba mwadidi.

⁸MBUYA Wamphamvu zonsene akulonga kuti, “Ine ndava kutikana kumbachita Amoabu, pontho ndaona kupidula kumbachita Aamoni, ale adatikana anthu anga mbaathuswa m'dziko mwawo monthomo.

⁹Natenepo ine ninga Mulungu wa moyo, MBUYA Wamphamvu zonsene, pontho Mulungu wa Israele, ndikudumbira kuti: Moabu anati asanduke ninga Sodomu, Amonimbo ninga Gomora, mbuto yakuphopha na tsanga, pontho madzenje a munyu, mbuto yakusowa basa kwenda na kwenda. Anyakusalira na moyo a anthu anga anati apokosere pinthu pyawo; pontho anyakupulumuka a dzinzanga anapita mbakwata dziko yawo.”

¹⁰Penepi ndiye pinafuna iwo dzapagalwi, thangwi ya kunyada kwawo, thangwi ya kutikana pontho kusedegula anthu a MBUYA Wamphamvu zonsene.

¹¹MBUYA anakhala wakugoswa kuna iwo; iye angavunga milungu yonsene m'dzikomo. Anyamgombe a madzinza onsene anati ampembedze, kada munthu m'dziko mwache.

¹²“Imwembo anthu a ku Kushi munati muphiwe na talasadanga.”

¹³MBUYA anafuthula mkono wache kupokanyisana na anthu akumpoto mbavunga Asiria. Ninevimbo anasaliratu pyache madembe, mbasanduka wakuuma kakata ninga thando ya tchetcha.

¹⁴Mikumbi ya mabira na ng'ombe pinagona kweneko gunundu-gunundu, pyakulengwa pya mtundu onsene. Ng'ombe-ng'ombe na muyi pinaphama pamadembe. Kulira kwa madzidzi kunatayirira na m'mazhanera, makhungubwe anakhala m'misuwo yawo. Mphalupalu zamkungudza zinasala nyimwa.

¹⁵Wenewu ndiye mzinda ule akhapiona ninga kuti uli pakupata pontho wakukhazikika, ule mumtima mwache ukhalonga kuti, “Ndine ene basi, nkhabepo pontho unango!” Apo lero ngayang'anani kuvungika kwachita iwo. Iwo wasanduka msitu wakukhala nyama zam'tsanga. Munthu onsene wakugwanda na penepo anasedegula mbapidula.