Read cisena ZEFANIA 3 Bible Online

ZEFANIA 3 - cisena bible

ZEFANIA 3

¹Dzedze kuna Yerusalemu, mzinda wa anyakupondereza, anyakupandukira pontho anyakukhonda chena pamaso pa Mulungu.

²Iye nkhabe vesera munthu na mbodzi ene tayu. Iye nkhabe tawira tayu kusumululwa. Iye nkhabe nyindira MBUYA, penu kudza chifupi na Mulungu wache tayu.

³Mathubu ache akhala ninga nkhalamu zakubangula, pontho atongi ache akhala ninga matika na mosiku, ale nkhabe siya mkhutche tayu kuti adye mangwana mwache na machibese.

⁴Maprofeti ache ngakutumbama; iwo mbanthu okhonda nyindirika. Anyansembe ache aswipisa mbuto yakuchena, pontho ambapotoza mwambo kufuna kupiganyalisa.

⁵Kwache MBUYA ngwakulungama mumzindamo; iye nkhabe chita chakuipa tayu. Na machibese onsene okhonda tchotchesa iye ambatonga na chilungamo. Kwache anyakukhonda lungama ambathimiza kudawa, mbakhonda chita napyo manyadzo.

⁶MBUYA akulonga kuti, “Ine ndamala vunga madzinza; mipandawo yamphamvu ndamala kuigwisa. Misuwo yawo yamala phopha tsanga mwakuti nkhabe na mbodzi ene ambagwanda namo tayu. Mizindawo yamala vungwa; nkhabe ubodzi wasala, nee na ubodzi ene tayu.

⁷Ine ndidanyerezera kuti anthu anga anati andigope mbatawira kusumululwa! Penepo ine nkhabe dzaatchunyusa penu dzaabulusa mbuto zawo tayu, Kwache iwo adakakamira basi kuchita pyakupotoka papyonsene pikhachita iwo.”

⁸MBUYA akulonga kuti, “Ndidikhireni, dikhirani nsiku inafuna ine dzatonga mseru. Ine ndanyerezera pya kugumanyisa madzinza na maufumu onsene mbandikhuthulira ukali wanga pana iwo, kuzhangali kwanga konsene. Dziko yonsene yapansi inamala kupya na moto wa ukali wantchanje yanga.

⁹“Tenepo ine ndinasandusa lulume ya madzinza onsene kukhala yangwiro, towera iwo onsene akwanise kuchemera dzina ya MBUYA na kumtumikira mwakuphatizana.

¹⁰Podi kutali kumikulo ya Kushi, anthu anga adabalalikana ale, anabwera na pyakupereka pyawo kuna ine.

¹¹Pansiku yeneyo imwe, anthu anga, nkhabe dzachitiswa manyadzo tayu, thangwi ya pyakudawa pyonsene pidachita imwe kuna ine pile. Ine ndinathamangisa mumzindamo anthu ale ambagaya na kutumbama kwawo, pontho imwe nkhabeve dzandipandukira paphiri yanga yakuchena tayu.

¹²Mbwenye pakati panu ndinati ndisiye anyakufulika na anyakupichepesa, ale ambanyindira ine, MBUYA.

¹³Anyakusalira na moyo a Israele nkhabe dzachita pyakudawa tayu; iwo nkhabe dzalonga pyakunama, penu pyakunama kubuluka pakanwa pawo nkhabe. Iwo anadya mbagona pyawo gadaa, mbapasowa munthu na mbodzi ene wakuathuswa.”

¹⁴Imbani, imwe anthu a ku Zioni; galuzani fala imwe Aisraele! Komerwani pontho sekerani na mtima onsene, imwe anthu a ku Yerusalemu!

¹⁵MBUYA abulusa kukutchunyusani kukhafuna iye kukuchitani; iye athamangisa anyamalwanu. MBUYA, Mfumu wa Israele, ali pakati panu; imwe nkhabe dzachita mantha tayu na chakugoswa.

¹⁶Pansiku yeneyo iwo analonga kuna Yerusalemu kuti, “Leka chita mantha iwe, Zioni; manjako mbaleke chita chiwewa.

¹⁷MBUYA Mulungu wako ali nawe, iye ngwamphamvu pyakwanga mwakuti anakwanisa kukupulumusa. Iye anakomerwa nawe pyakwanga pene, iye anakuthondoza na kukufuna kwache, iye anakuimbira nyimbo zakusekera nazo,

¹⁸ninga mumbachitira anthu pansiku za maphwando awo akupambulika.” MBUYA akulonga kuti, “Ine ndinakubulusira dzedze, thangwi mphyakunensa kuna iwe, pontho mphyakukululupisa.

¹⁹Pandzidzi wenewo ine ndinatchunyusa anthu onsene akhakuponderezani ale. Ine ndinapulumusa anyakulamala mbandigumanyisa onsene ale akhadabalaliswa. Ndinaapasa chilemedzo, pontho ndinaachitisa kusimbwa m'dziko monsene mule mukhadachitiswa iwo manyadzo.

²⁰Pandzidzi wenewo ndinakugumanyisani; pandzidzi wenewo ndinakudzesani kwanu. Ine ndinakupasani chilemedzo, mbamusimbwa na anthu pakati pa madzinza onsene a padziko yapansi ndingachitisa pontho pinthu pyanu kufamba mwadidi imwe mukuona maso. Ndalonga ndine MBUYA.”