Read cisena HAGAI 1 Bible Online

HAGAI 1 - cisena bible

HAGAI 1

¹Chaka chachiwiri Dariusi mbali mfumu, pansiku yakutoma ya mwezi wachitanthatu, MBUYA adalonga kuna Zerubabele mwana Shealatiele, mkulu wa boma ya Yuda, pontho kuna Yoswa mwana Yehozadaki Nyansembe Wamkulu kudzera muna mprofeti Hagai kuti:

²“Ine, MBUYA Wamphamvu zonsene ndikulonga tenepa: Anthu enewa ambalonga kuti, ‘Ndzidzi hudzati kwana tayu wakuti Nyumba ya Mulungu imangwe.’ ”

³Tenepo MBUYA adalonga kudzera muna Hagai kuti,

⁴“Imwe anthu anga, ayi penepi mphyadidi kuti imwe mukhale m'nyumba zakumangwa mwadidi, mwenemo Nyumbanga yasanduka madembe?

⁵“Chinchino ine, MBUYA Wamphamvu zonsene ndikulonga tenepa: Nyerezerani mwadidi pinthu pinakuchitikiranipi.

⁶Imwe mwabzala pizinji, kwache mwavuna pyakuchepa. Imwe mumbadya, kwache nkhabe khuta tayu. Imwe mumbamwa, kwache nkhabe kwana tayu. Imwe mumbavala nguwo, kwache nkhabe khumbirwa tayu. Imwe mumbatambira kobiri, kwache mumbaziikha m'mabudu akuphoka.

⁷“Ine, MBUYA Wamphamvu zonsene ndikulonga tenepa: Nyerezerani mwadidi pinthu pinakuchitikiranipi.

⁸Ndokoni kumapiri mbamukasake matabwa kuti mumange pontho Nyumbanga, towera ndikwanise kukomerwa nayo mbanditambirambo chilemedzo. Ndalonga ndine MBUYA.”

⁹“Imwe mukhadikhira kuvuna pizinji pene, kwache yang'anani pyavuna imwe pili kwene jada. Pyakuvuna pidadza na imwe kumusa ndidamala kupimbulusa na mphepo. Penepo ine, MBUYA Wamphamvu zonsene ndikulonga kuti: Apo thangwi yache ninji? Ndi thangwi ya Nyumbanga ile yamala sanduka madembe, mwenemo munthu onsene wa imwe ali kaluma tolo-tolo kumanga nyumbache.

¹⁰Natenepo na thangwi ya imwe, ine ndaiphata mvula, pontho mindanu nkhabemo mbewu tayu.

¹¹Ine ndadzesa njala ikulu padziko, pamapiri, m'minda yamapira, m'minda yamfesa na m'minda yaolivi, pambuto ponsene pale pambamera pyakumera, pana anthu na nyama zene pontho na pana pinthu pyonsene pyaphatira imwe basa.”

¹²Kubuluka penepo Zerubabele mwana Shealatiele, Yoswa mwana Yehozadaki, Nyansembe Wamkulu, na anthu onsene ale akhadabwera kubulukira kudziko ya unyaperezo adavera matongero a MBUYA Mulungu wawo, pontho mphangwa zidadza na Hagai, thangwi akhadamtuma ndi MBUYA Mulungu wawo. Tenepo anthu adagopa MBUYA.

¹³Natenepo Hagai, nyamphangwa wa MBUYA, adalonga kuna anthu mphangwa zakubulukira kuna MBUYA mbati, “Ine ndili namwe. Ndalonga ndine MBUYA.”

¹⁴MBUYA adapereka chipapu kuna Zerubabele, mkulu wa boma ya Yuda, pontho Yoswa, Nyansembe Wamkulu, pontho na kuna anthu onsene ale akhadabwerera ale. Iwo adadza mbatoma basa yakumanga pontho Nyumba ya Mulungu wawo, MBUYA Wamphamvu zonsene,

¹⁵pansiku ya makumawiri na chinayi ya mwezi wachitanthatu chaka chachiwiri Dariusi mbali mfumu.