Read cisena ZEKARIA 1 Bible Online

ZEKARIA 1 - cisena bible

ZEKARIA 1

¹Mwezi wachisere, chaka chachiwiri Dariusi mbali mfumu wa Peresia, MBUYA adalonga kuna mprofeti Zekaria, mwana Berekia, mdzukuluache Ido.

²MBUYA Wamphamvu zonsene adapanga Zekaria kulonga kuna anthu mbati, “Ine MBUYA ndazhangali pyakwanga na makolo anu,

³mbwenye chinchino ndikulonga tenepa: Bwererani kuna ine, inembo ndinabwerera kuna imwe. Ndalonga ndine MBUYA Wamphamvu zonsene.

⁴Lekani khala ninga makolo anu, ale adava mphangwa zidalalika maprofeti akale zile. MBUYA Wamphamvu zonsene adalonga tenepa: ‘Bulukani kuna njira zanu zakuipa, pontho lekani mabasanu akuipawo.’ Kwache iwo hadapivesere, penu kupiikha konta tayu kuna pinthu pikhalonga ine. Ndalonga ndine MBUYA.

⁵Chinchino makolo anu ali kupi? Apo maprofeti ana moyo kwenda na kwenda?

⁶Kudzera muna anyabasanga maprofeti ine ndidapereka matongero kuna makolo anu pontho kuacheuza, kwache iwo hadaavesere tayu, mbaoneswa nyatwa? M'nduli mwache iwo adatchunyuka mbalonga mbati, ‘MBUYA Wamphamvu zonsene achita kuna ife malingana na mabasathu pontho makhaliro athu akuipa ninga montho mukhadapisasanyira iye.’ ”

⁷Pansiku ya makumawiri na chinayi ya mwezi wa khumi na chibodzi, mwezi wa Shebati, chaka chachiwiri Dariusi mbali mfumu, MBUYA adalonga kuna mprofeti Zekaria, mwana Berekia, mdzukuluache Ido.

⁸Na mosiku ine ndidaona kumasomphenya munthu apakira kavalo wakufira. Iye akhaimira pakati pa mikesha mumkhwawa. Kunduli kwache kukhali akavalo anango akufira, akuswipirira na akuchena.

⁹Ine ndidavunza kuti, “MBUYA, penepi pikulonganji?” Mngelo akhalonga na ine ule adatawira mbati, “Ine ndinati ndikupange kuti penepi pikulonganji.”

¹⁰Tenepo munthu akhaimira pakati pa mikesha ule adalonga mbati, “Enewa mbale atumwa na MBUYA kuti afambire dziko yonsene yapansi.”

¹¹Iwo adapanga mngelo wa MBUYA, ule akhaimira pakati pa mikesha mbati, “Ife tafambira dziko yonsene yapansi mbatigumana kuti anthu akupuma pyawo, pontho ali pamtendere.”

¹²Tenepo Mngelo wa MBUYA adalonga mbati, “MBUYA Wamphamvu zonsene, imwe mwazhangalira Yerusalemu na mizinda ya Yuda pyaka makumanomwe. Ayi panakwata ndzidzi ukulu tani imwe mbamudzati kuavera nsisi?”

¹³MBUYA adamtawira mngelo akhalonga na ine ule na mafala akumthondoza nawo.

¹⁴Penepo mngelo akhalonga na ine ule adalonga mbati, “Lalika mafala awa: MBUYA Wamphamvu zonsene akulonga tenepa: Ine ndina ntchanje pyakwanga na Yerusalemu pontho Zioni,

¹⁵kwache ndazhangalira pyakwanga madzinza ale ali pakupata ndzidzi uno. Ine ndikhadaazhangalira kwene pang'ono basi, mbwenye iwo adathimiza kuvuya anthu anga.

¹⁶“Natenepo MBUYA akulonga tenepa: Ine ndabwerera pontho kuna Yerusalemu kuti ndivere nsisi mzindawu. Nyumbanga inamangwa pontho. Nkhambala yakudzongolera fufu inaikhwa pana Yerusalemu. Ndalonga ndine MBUYA Wamphamvu zonsene.

¹⁷“MBUYA Wamphamvu zonsene akulonga tenepa: Thimiza kulalika kuti maluwani anga pinthu pyawo pinaafambira mwadidi, pontho MBUYA anathondoza Zioni mbasankhula Yerusalemu.”

¹⁸Tenepo ndidakwiza maso mbandiona kumasomphenya nyanga zinayi!

¹⁹Ndidavunza mngelo akhalonga na ine ule kuti, “Ninji penepi?” Iye adatawira kuti, “Nyanga zenezi zikuimirira anyamphamvu a dziko yapansi ale adabalalisa anthu a ku Yuda, Israele na Yerusalemu.”

²⁰Kubuluka penepo MBUYA adandionesa anyakusema-sema anayi.

²¹Ine ndidavunza kuti, “Ayi enewa adzeranji?” Iye adatawira mbati, “Enewa ndi nyanga zinayi, ale adabalalisa anthu a mu Yuda, towera paleke khala unango wakukwanisa kuyenusa msolo. Mbwenye anyakusema-sema adza dzaathuswa na kukunda manyanga enewa a madzinzawo ale akudima na nyangawo dziko ya Yuda na kubalalisa anthu ache.”