Read cisena ZEKARIA 11 Bible Online

ZEKARIA 11 - cisena bible

ZEKARIA 11

¹Fungula misuwo yako, iwe Lebanoni, towera moto upyereze miti yako yamkungudza![4]

²Kalalani, imwe miti ya paina, thangwi mikungudza yamala limbuka; miti imbanyadira dziko ile yamala vungika! Lirani imwe miti yamthundu ya ku Bashani msitu wakuphopha ule miti yache yamala temwa!

³Ngaveserani kukalala kunachita amakabuswa; mpovu wawo onsene wamala vungwa! Veserani kubangula kwa nkhalamu; msitu wakupata wa Yorodani lero uli mphalanga-mphalanga.

⁴MBUYA Mulungu wanga adalonga kuna ine mbati, “Dyesa mwadidi mabira anafuna dzaphiwa ale.

⁵Anyakuagula ale ambaapha, kwache iwo nkhabe tchunyuswa tayu. Anyakuagulisa ambalonga kuti, ‘MBUYA mbakuzwe, ine ndafuma!’ Amakabuswawo[5] ene nkhabe dzavera nsisi mabirawo tayu.

⁶Thangwi ine nkhabe dzaverave nsisi anthu a m'dziko yeneyi tayu. Anthu onsene ndinaapereka m'manja mwa atsanthembawo, pontho m'manja mwa mafumu awo. Iwo anapondereza dziko, tenepo ine nkhabe dzaapulumusa tayu m'manja mwawo. Ndalonga ndine MBUYA.”

⁷Natenepo ine ndidadyesa mwadidi mabira akhafuna dzaphiwa na anyakuagulisa ale,[6] Tenepo ndidakwata ndodo ziwiri, ibodzi ndidaithula Kukoma mtima, inangomboyo ndidaithula Mphatizano. Ine ndidadyesa mwadidi mabira.

⁸Pidakwana mwezi ubodzi ndidabulusa amakabuswa atatu ale. Mkumbi wa mabira udaipirwa nane, tenepo inembo sidakwanise kupirira nawo tayu,

⁹mbandilonga kuti, “Ine sinakhalave makabuswanu tayu. Bira anafuna kufa mbafe pyache, ule anafuna kutayika mbatayike pyache. Anyakusalirambo na moyo ale mbadyane pyawo.”

¹⁰Penepo ine ndidakwata ndodo yanga yakuchemerwa Kukoma mtima ile, mbandiikhumula pyanga, kukhonda chiverano chidachita ine na madzinza onsene.

¹¹Chiveranocho chidamala pansiku yeneyo, tenepo anyakugula na kugulisa mabira akhandiyang'ana ale, adapidziwa kuti pidachita ine zikhali mphangwa zakubulukira kuna MBUYA.

¹²Ine ndidalonga kuna iwo kuti, “Ngakhala pinakukomerani ndipagalinitu mphapo; mbwenye ngakhala nkhabe, koyani pyanu kobiri zanu.” Tenepo iwo adandipagali masiliva makumatatu.

¹³MBUYA adalonga kuna ine mbati, “Ziponye kobirizo m'chakukoyeramo kobiri,”[7] konta ya kobiri idalonga iwo kuti ndathema kuitambira ile! Tenepo ndidakwata masiliva makumatatu ale, mbandiaponya m'chakukoyeramo kobiri cha m'Nyumba ya Mulungu.

¹⁴Kubuluka penepo ndidakhumula ndodo inango yakuchemerwa Mphatizano ile, kufudza ubale wa pakati pa Yuda na Israele.

¹⁵Tenepo MBUYA adalonga kuna ine mbati, “Kwata pontho basa ya makabuswa, kwache mbuchite ninga makabuswa wakupupwa.

¹⁶Thangwi ine ndinaikha makabuswa m'dzikomo, ule nkhabe dzatsalakana mabira akutayika, penu kwenda kasaka anawo, penu kumanga pironda pya mabira akukuwazika, penu kudyesa mabira adidi tayu. Mbwenye anadya nyama ya mabira adidi makawo kubulusa na njondo zawo zene.

¹⁷“Dzedze kuna makabuswa wakupupwa wakuthawa mabirache! Talasada mbikhamwadze mkono wache pontho diso yache ya madyo. Mkono wache mbulamale diso yache ya madyo mbileke na kuona kwene.”