Read cisena ZEKARIA 12 Bible Online

ZEKARIA 12 - cisena bible

ZEKARIA 12

¹Awa ndi mafala a MBUYA akulonga pya Israele, MBUYA ule adafuthula thambo, ule adaikha maziko a dziko yapansi, pontho ule adasasanya mzimu wa munthu. Iye akulonga kuti,

²“Ine ndinachitisa Yerusalemu kukhala khomitcho ya vinyu, ule anafuna dzachitisa madzinza azinji ene kuledzera. Yuda na Yerusalemu ene anazungulirwa na anyamalwa.

³Pansiku yeneyo madzinza onsene a padziko yapansi angagumanyikana pabodzi pene kachita naye nkhondo, ndinachitisa Yerusalemu kukhala ninga mwala okhonda thukuswa kuna madzinza onsene. Onsene anayesera kuuthukusa anapikuwaza yekha ene.

⁴Pandzidzi wenewo kavalo onsene ndinamuikha pampani-pani, pontho kusandusa nsala anyakuapakira onsene. Ndalonga ndine MBUYA. Maso anga anakhala pana Yuda, kwache ndinachitisa akavalo onsene a madzinza anango kusanduka maboli-boli.

⁵Penepo akadamu a Yuda analonga okha ene kuti, ‘Anthu a ku Yerusalemu ngamphamvu pyakwanga, thangwi MBUYA Wamphamvu zonsene ndiye Mulungu wawo.’

⁶“Pandzidzi wenewo ndinachitisa akadamu a Yuda kukhala ninga khala ya moto pamilu ya nkhuni, pontho ninga nsakali yakugaka pakati pa misumbu ya maudzu. Iwo anavunga kumadyo na kumabzere kwene madzinza onsene akuazungulira. Kwache mu Yerusalemu anthu anathimiza basi kukhala pakupata.

⁷“Chakutoma ine MBUYA ndinapulumusa anthu a ku Yuda, towera chilemedzo chonsene cha dzinza ya Davite na anyakukhala mu Yerusalemu chileke piringana chilemedzo china Yuda chile.

⁸Pandzidzi wenewo MBUYA anatchinjiriza anyakukhala mu Yerusalemu, towera podi na anyakusowa mphamvu ene pakati pawo akhale ninga Davite, tenepo dzinza ya Davite inakhala ninga Mulungu ene, ninga angelo a MBUYA kwenda patsogolo pawo.

⁹Pandzidzi wenewo ndinaenda kavunga madzinza onsene anachita nkhondo na Yerusalemu ale.

¹⁰Ndinaikha pana dzinza ya Davite na anyakukhala mu Yerusalemu mzimu wakukoma mtima pontho wakupemphera. Iwo anayang'ana pana ine, munthu adalasa iwo ule, pontho iwo anamlira ninga munthu kulirira mwanache mbodzi ene basi, mbatsukwala naye pikulu pene ninga munthu kutsukwala mwanache wautombo wamamuna.

¹¹Pandzidzi wenewo mu Yerusalemu munakhala chiliro chikulu ninga chiliro cha Hadadi-Rimoni[8] m'phedi ya Megido.

¹²Dziko inasintili, kada mbumba kupisintili yokha ene pontho na akazawo ene: Mbumba ya Davite na akazawo ene, mbumba ya Natani na akazawo ene,

¹³mbumba ya Levi na akazawo ene, mbumba ya Shimei na akazawo ene,

¹⁴pontho na mbumba inango yonsene na akazawo ene.