Read cisena ZEKARIA 14 Bible Online

ZEKARIA 14 - cisena bible

ZEKARIA 14

¹Nsiku ya MBUYA ikudza ile inafuna anyamalwanu dzagawana pamaso panu pinthu pidapokosera iwo.

²MBUYA anagumanyisa madzinza onsene dzachita nkhondo na Yerusalemu; mzinda unagwa, nyumba kusakazwa, pontho akazi kuphatirirwa. Khundu ibodzi ya mzindawo anthu ache anakwatwa kwenda kudziko ya unyaperezo, kwache khundu inango yakusalirayo nkhabe dzabuluswamo tayu mumzindamo.

³Tenepo MBUYA yekha ene anaenda kachita nkhondo na madzinza ninga mumbachitira iye pansiku ya nkhondo.

⁴Pansiku yeneyo iye anaimira pa Phiri ya Olivi kumabulukiro dzuwa a mzinda wa Yerusalemu. Tenepo phiri ya Olivi inagawanika pakati, kubulukira kumabulukiro dzuwa mpakana kumadokero dzuwa, kusasanya phedi ikulu pakati pache, khundu ibodzi ya phiri kwenda kumpoto, khundu inangoyo kwenda kumwera.

⁵Imwe munathawa na phediyi ya pakati pa phiri ya MBUYA, thangwi phediyo inafika mpakana ku Azele. Imwe munathawa ninga mudachitira imwe kuthawa chiteke-teke nsiku za Uzia mfumu wa Yuda. Penepo MBUYA Mulungu wanga anabwera pabodzi pene na anyakuchenache onsene.

⁶Pansiku yeneyo nkhabe dzakhala kutonthola penu bume tayu.

⁷Inakhala nsiku nyampita-pita, nee masikati penu mosiku tayu, nsiku yakudziwika na MBUYA. Mosiku ungakwana, panakhala cheza.

⁸Pansiku yeneyo madzi amoyo anakuka kubulukira ku Yerusalemu, khundu ibodzi kagwera m'Nyanza Yakufira kumabulukiro dzuwa, khundu inangoyo kagwera m'bara ya Mediterania kumadokero dzuwa. Madzi anakuka chaka chonsene chamumphu, m'mainja na m'malimwe ene.

⁹MBUYA anakhala mfumu wa dziko yonsene yapansi. Pansiku yeneyo MBUYA anakhala mbodzi ene basi, pontho dzinache mbikhala yontho ene basi.

¹⁰Dziko yonsene kubulukira ku Geba kwenda ku Rimoni, kumwera kwa Yerusalemu kunasanduka ninga Araba. Kwache Yerusalemu anakhala panthunda mbakhazikika pambuto pache, kubulukira ku Msuwo wa Benjemani mpakana kukhundu ina Msuwo Wakutoma ile, kwenda ku Msuwo Wapankhomo, pontho kubulukira ku Nsanja ya Hananele kwenda kudzenje yachifumu yakutchitchithira vinyu.

¹¹Mumzindamo munakhala na anthu; nkhabe dzavungwave tayu. Yerusalemu anakhala pakupata.

¹²Wenewu ndiye muliri unafuna MBUYA dzasanyisa nawo madzinza anamenyana na Yerusalemu ale: Manungo awo anavunda mwenemo iwo akali moyo, maso awo anavunda mwenemo ali pambuto pache, pontho lulume yawo inamala vunda m'kamwa mwawo.

¹³Pansiku yeneyo MBUYA anaachitisa kukhala pampani-pani mwakuti munthu anaphata mwanzache ana iye chifupi mbamenyana naye.

¹⁴Na anthu a ku Yuda enembo anamenya nkhondo mu[10] Yerusalemu. Mfuma yonsene ya madzinza akuzungulira inagumanyiswa, golidi na siliva mzinji ene, pontho na pyakuvala.

¹⁵Muliri ninga onthowu unapha akavalo, mabulu, ngamila na nyulu, pontho na pana nyama zonsene mumsasa wa anyamalwa.

¹⁶Tenepo anyakusalira na moyo pakati pa madzinza anango ale asosa Yerusalemu, anaenda kweneko chaka na chaka kapembedza Mfumu, MBUYA Wamphamvu zonsene, pontho kasekera Phwando ya Misasa.

¹⁷Ngakhala dzinza inango pakati pa anthu a padziko yapansi anakhonda kwenda ku Yerusalemu kapembedza Mfumu, MBUYA Wamphamvu zonsene, penepo iwo nkhabe dzaona mvula tayu.

¹⁸Ngakhala anthu a ku Iguputo nkhabe kwendako kachitambo na anthu pimbachitika kwenekopyo, iwo nkhabe dzaona mvula tayu. MBUYA anadzesa pana iwo muliri umbasanyisa na iye anthu ambakhonda kwenda kweneko kasekera Phwando ya Misasa ale.

¹⁹Kweneku ndiye kunafuna dzakhala kutchunyuswa kwa Iguputo, pontho madzinza onsene ambakhonda kwenda ku Yerusalemu kasekera Phwando ya Misasa ale.

²⁰Pansiku yeneyo podi na masimbi ene anafuna dzavala akavalo pankhondo analembwa kuti, “Kupambulika kuna MBUYA,” pontho pikalango pya m'Nyumba ya Mulungu pinakhala pyakupambulika ninga ndilo zakukhala patsogolo pa guwa yansembe.

²¹Pikalango pyonsene mu Yerusalemu na mu Yuda pinakhala pyakuchena kuna MBUYA Wamphamvu zonsene. Tenepo munthu onsene anafuna dzabwera kupereka nsembe ule anakwata pikalango pinango mbakapiphatisambo basa kupiterekera. Pansiku yeneyo m'Nyumba ya MBUYA Wamphamvu zonsene nkhabe dzakhalamove anyamalonda tayu.