Read cisena ZEKARIA 2 Bible Online

ZEKARIA 2 - cisena bible

ZEKARIA 2

¹Kubuluka penepo ndidakwiza maso mbandiona kumasomphenya munthu aphatirira mdida wa nkhambala m'manja mwache.

²Ine ndidavunza kuti, “Ayi ukwenda kupi?” Iye adanditawira mbati, “Ndikwenda kapima Yerusalemu kufuna kuona umimbache na ulaphiache ene!”

³Tenepo mngelo adalonga na ine ule adabulukapo, pontho mngelo unango adadza dzagumanikana naye,

⁴mbalonga kuna iye mbati, “Thamanga ndoko kapange mphale ana mdida ule kuti Yerusalemu anakhala mzinda wakusowa mpanda, thangwi ya kuinjipa kwa anthu na pifuyo pene.

⁵MBUYA adumbira kuti iye ene anakhala mpandache wa moto kuzungulira mzindawo, pontho demelero yache inakhala mwenemo.”

⁶MBUYA akulonga mbati, “Idzani, dzani, thawanimo m'dziko yakumpoto, thangwi ine ndakubalalisani kumakhundu onsene anayi a dziko yapansi. Ndalonga ndine MBUYA.

⁷“Tendeni, thawirani ku Zioni, imwe ale akhadakwatwa unyaperezo kudziko ya Babiloni!

⁸Munthu onsene anakukuwazaniyo iye akukuwaza mboni ya diso yanga.” Natenepo MBUYA Wamphamvu zonsene andilemedza mbandituma kuna madzinza ale akhadapokosera pinthu pya anthu ache na mphangwa zakuti:

⁹“Ine ene maka MBUYA ndinati ndimenyane nawo, pontho ale akhali mabitchu awo makawo anati apokosere pinthu pyawo.” Penepo iwo anapidziwadi kuti andituma ndi MBUYA Wamphamvu zonsene.

¹⁰MBUYA akulonga kuti, “Khuwani pontho komerwani, imwe anthu a ku Zioni. Ine ndikudza, pontho ndinati ndikhale pakati panu. Ndalonga ndine MBUYA.”

¹¹Madzinza azinji ene pandzidzi wenewo anakhala khundu ibodzi na MBUYA mbasanduka anthu ache. Iye anakhala pakati panu, tenepo imwe munapidziwa kuti MBUYA Wamphamvu zonsene ndiye andituma kuna imwe.

¹²Dziko ya Yuda inakhala khundu yache ene m'dziko yakuchena, pontho Yerusalemu unakhala mzindache wakusankhulika.

¹³Matamani, imwe anthu onsene pamaso pa MBUYA, thangwi iye akudza kubulukira kumbuto yache yakuchena kumbakhala iye kule.