Read cisena ZEKARIA 3 Bible Online

ZEKARIA 3 - cisena bible

ZEKARIA 3

¹Kumasomphenya anango MBUYA adandionesa Nyansembe Wamkulu Yoswa, uku aimira pamaso pa mngelo wa MBUYA, pontho Satana aimirambo kumadyo kwache kumsumira.

²MBUYA[1] adalonga kuna Satana mbati, “MBUYA akukulongera iwe Satana! MBUYA ule adasankhula Yerusalemu, akukusumulula. Ayi munthu weneyu hadakhale ninga chikuni chakubuluswa pamoto tayu?”

³Yoswa akhaimira pamaso pa mngelo ule uku avala nguwo zakukhonda chena.

⁴Mngelo ule adalonga kuna anthu akhadaimira pamaso pache ale mbati, “Mduleni nguwo zache zokhonda chenazi.” Penepo iye adalonga kuna Yoswa mbati, “Ngayang'ana, ine ndakubulusira pyakudawa pyako, tenepo ndinakuvazika nguwo zitswa.”

⁵Tenepo ine ndidalonga kuti, “Mvazikeni nduwira yakuchena mumsolo mwache.” Natenepo iwo adamvazika nduwira mumsolo mwache, pontho nguwo zakuchena, mwenemo mngelo wa MBUYA ali dzololo penepo.

⁶Mngelo wa MBUYA adapanga Yoswa kuti

⁷MBUYA Wamphamvu zonsene akulonga tenepa: “Ngakhala iwe unateweza njira zanga mbukoya matongero anga, penepo iwe unathimiza kukhala mkadamu wa Nyumbanga na pintalo pyache pene, pontho ndinakupasa utongi kukhala pabodzi pene na anango aimira pamaso panga ale.

⁸“Vesera iwe Yoswa Nyansembe Wamkulu, na anyansembe anzako onsene akhala pamaso pako ale, thangwi monsenene ndimwe chidzindikiro cha pinthu pyadidi pinafuna kudza m'tsogolo pile. Ine ndinati nditchulule nyabasanga ule ambachemerwa Nthambi.

⁹Yang'anani mwala waikha ine kutsogolo kwa Yoswa. Pamwala wenewu pana maso manomwe, pontho ndinati ndilembepo pakuchita kugoba mbindibulusa pyakudawa pya dziko yeneyi nsiku ibodzi ene basi. Ndalonga ndine MBUYA Wamphamvu zonsene.

¹⁰“Pansiku yeneyo munthu onsene wa imwe anachemera tsanthembache kachedza pansi pa mitawi yanu yamfesa na miti yamkuyu. Ndalonga ndine MBUYA Wamphamvu zonsene.”