Read cisena ZEKARIA 4 Bible Online

ZEKARIA 4 - cisena bible

ZEKARIA 4

¹Penepo mngelo akhalonga na ine ule adadza pontho mbandilamusa ninga mumbalamusirwa munthu kuchitulo.

²Iye adandivunza mbati, “Ayi ukuonanji?” Ine ndidatawira kuti, “Ndikuona chakuikhirapo nyale cha golidi chakukhala na ndilo padzulu pache pontho nyale zinomwe, nyale ibodzi yakukhala na matsakala anomwe.

³M'khundu mwache mukhali miti miwiri yaolivi, ubodzi kukhundu ya kumadyo, unangombo kukhundu ya kumabzere.”

⁴Ine ndidavunza mngelo akhalonga na ine ule kuti, “Ayi penepi ninji, mbuya?”

⁵Iye adatawira mbati, “Ayi iwe nkhabe dziwa tayu kuti penepi ninji?” Ine ndidatawira kuti, “Nkhabe tayu, mbuya.”

⁶Tenepo iye adalonga kuna ine mbati, “Enewa ndi mafala a MBUYA kuna Zerubabele: MBUYA Wamphamvu zonsene alonga kuti, ‘Nee na mphamvu, penu na nkhondo tayu, mbwenye na Mzimu wanga. Ndalonga ndine MBUYA Wamphamvu zonsene.’ ”

⁷Ayi iwe phiri ikulu, ndiwe ani? Pamaso pa Zerubabele iwe unasalazwa. Iye anamanga pontho Nyumba ya MBUYA, tenepo pinaikha iye mwala wa pankhomo anthu anakhuwa kuti, “Ikukoma m'maso! Ikukoma m'maso!”

⁸Tenepo MBUYA adalonga kuna ine mbati,

⁹“Manja a Zerubabele ndiye amanga maziko a Nyumba ya MBUYA, manjache ndiye anafuna kuimalisa. Penepo imwe munapidziwa kuti MBUYA Wamphamvu zonsene ndiye andituma kuna imwe.

¹⁰“Mbani analulupisa nsiku ya pinthu ping'ono? Anthu anasekera angaona mdida wa nkhambala m'manja mwa Zerubabele. “Enewa ndi maso anomwe a MBUYA, ale ambaona konsene kwene padziko yapansi.”

¹¹Tenepo ndidavunza mngelo ule kuti, “Apo miti yaolivi ili kumadyo na kumabzere kwa chakuikhirapo nyalechi mphyanji napyo?”

¹²Ine ndidavunza pontho kuti, “Ayi nthambi ziwiri zaolivi m'khundu mwa mipembe iwiri ya golidi, ile imbabulusa mafuta a golidi njanji nayo?”

¹³Iye adatawira mbati, “Ayi iwe nkhabe dziwa tayu kuti penepi ninji?” Ine ndidatawira kuti, “Nkhabe tayu, mbuya!”

¹⁴Natenepo iye adalonga mbati, “Enewa mbanthu awiri ale adzozwa kuti atumikire Mbuya wa dziko yonsene yapansi.”