Read cisena ZEKARIA 5 Bible Online

ZEKARIA 5 - cisena bible

ZEKARIA 5

¹Ndidakwiza pontho maso mbandiona mpukutu ukumbuluka.

²Iye adandivunza mbati, “Ayi ukuonanji?” Ine ndidatawira kuti, “Ndikuona mpukutu ukumbuluka, ule ulaphiache ndi makhono mafemba pontho manungo ache makhono manayi na kati ya khono.”

³Tenepo iye adalonga kuna ine mbati, “Yeneyi ndi dzedze inafuna dzagwera dziko yonsene yapansi; thangwi malingana na pinthu pidalembwa kukhundu ibodzi, mbava yonsene inati ibuluswe, pontho malingana na pinthu pidalembwa kukhundu inangomboyo, munthu onsene wakudumbira pyakunama anati abuluswe.

⁴Ine MBUYA Wamphamvu zonsene ndikulonga kuti ine ndinati ndiutumize, tenepo unapita m'nyumba mwa mbava, pontho na onsene nyakudumbira pyakunama na dzinanga. Mpukutuwo unathimiza kukhala m'nyumba mwachemo mbuvunga nyumbayo, matabwa na miyalache ene.”

⁵Kubuluka penepo mngelo akhalonga na ine ule adadza kuna ine mbalonga mbati, “Chita kwize maso mbuone chinthu chinadzacho.”

⁶Ine ndidavunza kuti, “Ayi chenechi ninji?” Iye adatawira mbati, “Wenewu ndi msekete, ule ukuimirira kudawa kwa anthu onsene a padziko yapansi.”

⁷Msekete ule ukhali na mphampha yasimbi. Pikhayang'ana ine, mphampha ile idafunguka tenepo ndidaonamo mkazi.

⁸Iye adalonga kuna ine mbati, “Penepi nkhudawika.” Tenepo iye adamfinyirira kumbwezera mumsekete monthomo, mbafunga na mphampha ile.

⁹Kubuluka penepo ndidakwiza maso mbandiona akazi awiri akumbuluka kudza kuna ine. Iwo akhali na maphaphido amphamvu ninga a chidokowe. Tenepo iwo adathukula msekete ule mbambuluka nawo chidzulu-dzulu.

¹⁰Ine ndidavunza mngelo akhalonga na ine ule kuti, “Ayi mseketewu akwenda nawo kupi?”

¹¹Iye adatawira mbati, “Akwenda nawo kudziko ya Babiloni kuti akaumangire nyumbache. Nyumbayo ingamala, mseketewo unaikhwa mwenemo.”