Read cisena ZEKARIA 6 Bible Online

ZEKARIA 6 - cisena bible

ZEKARIA 6

¹Ndidakwiza pontho maso mbandiona pingolo pinayi pikudza kubulukira pakati pa mapiri awiri, mapiri amkuwa.

²Chingolo chakutoma chikhali na akavalo akufira, chachiwiri chikhali na akuswipa,

³chachitatu chikhali na akavalo akuchena, pontho chachinayi chikhali na akavalo adotha a madamba-madamba, onsenewo akhali a mphamvu pyakwanga.

⁴Tenepo ine ndidavunza mngelo akhalonga na ine ule kuti, “Ayi penepimbo ninji, mbuyanga?”

⁵Mngelo adanditawira mbati, “Yeneyi ndi mizimu minayi ya kudzulu; iyo idadza kubulukira pamaso pa MBUYA wa dziko yonsene yapansi.

⁶Chingolo chile china akavalo akuswipa chikwenda kumpoto kudziko ya Babiloni, chingolo cha akavalo akuchena chikwenda kumabulukiro dzuwa, pontho chingolo cha akavalo adotha chikwenda kumwera.”

⁷Pidabuluka akavalo amphamvu kwenda, akhali na chipapu kufuna kufambira dziko yonsene yapansi. Tenepo mngelo adalonga mbati, “Ndokoni padziko yonsene yapansi.” Natenepo iwo adenda padziko yonsene yapansi.

⁸Tenepo iye adandichemera mbati, “Ngayang'ana, akavalo aenda kumpoto kudziko ya Babiloni ale ambombowesa ukali wa MBUYA.”

⁹MBUYA adalonga kuna ine mbati,

¹⁰“Kwata siliva na golidi kubulukira kuna Helidai, Tobia, na Yedaia, amuna ale adza kubulukira kudziko ya unyaperezo ku Babiloni. Na nsiku yonthoyo ndoko kunyumba ya Yosia mwana Zefania.

¹¹Kwata siliva na golidi mbusasanye chipewu chachifumu mbuchivazike mumsolo mwa Yoswa, Nyansembe Wamkulu, mwana Yehozadaki.

¹²Mpange kuti MBUYA Wamphamvu zonsene akulonga tenepa: ‘weneyu ndiye munthu ule dzinache ndi Nthambi, tenepo iye anaphwitha pambuto pache mbamanga Nyumba ya MBUYA.

¹³Iye ngule anafuna dzamanga Nyumba ya MBUYA, pontho iye anavala nguwo zachifumu mbakhala pampando wache wachifumu kutonga. Nyansembe anaimira chifupi na mpando wache wachifumu, pontho pakati pa awiriwa panakhala mtendere!’

¹⁴Chipewu chachifumu chinaperekwa kuna Helidai, Tobia, Yedaia, pontho Yosia[2] mwana Zefania ninga chikumbuso cha Nyumba ya MBUYA.

¹⁵“Anthu ali kutali anabwera mbaphedza kumanga Nyumba ya MBUYA, tenepo imwe munapidziwa kuti MBUYA Wamphamvu zonsene ndiye andituma kuna imwe. Penepi pinachitika ngakhala imwe munavera monsene mwene matongero a MBUYA Mulungu wanu.”