Read cisena ZEKARIA 7 Bible Online

ZEKARIA 7 - cisena bible

ZEKARIA 7

¹Chaka chachinayi Dariusi mbali mfumu, MBUYA adalonga kuna Zekaria pansiku yachinayi ya mwezi wachifemba, mwezi wa Kisilevi.

²Anthu a ku Betele akhadatuma Sharezere na Regemu-Meleki, pabodzi pene na amunawo ku Nyumba ya Mulungu Wamphamvu zonsene kapempha kukoma mtima kwa MBUYA,

³pontho kavunza anyansembe a ku Nyumba ya Mulungu, MBUYA Wamphamvu zonsene na maprofeti kuti, “Ayi ine ndathema kusintili na kupimana kudya mwezi wachishanu ninga montho mwachitira ine pyaka pizinji pene?”

⁴Tenepo MBUYA Wamphamvu zonsene adalonga kuna ine mbati,

⁵“Vunza anthu onsene a m'dzikomo pabodzi pene na anyansembe awo kuti, ‘Ndzidzi udapimana imwe kudya pontho kusintili mwezi wachishanu na wachinomwe pyaka makumanomwe pyagwandapyo, ayi kupimana kudya kweneku mukhakuchitiradi kundilemedza?

⁶Ndzidzi ukhadya imwe pontho kumwa, ayi imwe hamukhadya kwene tayu kufuna kupichitisa mwekha ene kukomerwa?

⁷Ayi enewa si mafala a MBUYA ale adalalikwa kudzera muna maprofeti akutoma tayu, mwenemo Yerusalemu na maluwani ache akuzungulira akhali pakupata pontho pinthu pyawo pikhaafambira mwadidi, pontho thando ya Negebu na maluwani a m'tchinde mwa phiri amala khazikika?’ ”

⁸Tenepo MBUYA adalonga pontho kuna Zekaria mbati,

⁹“MBUYA Wamphamvu zonsene akulonga tenepa: ‘Onesesani kuti chilungamo chikutewezwadi; komeranani mtima, pontho veranani nyambalo unango na mwanzache.

¹⁰Lekani pondereza amamfelwa penu ana amasiye, alendo penu anyakutcherenga. Lekani nyerezera mumtima mwanu pyakuchitirana pyakuipa unango na mwanzache.’

¹¹“Kwache anthu anga adakhonda kupiikha konta; mwakuuma mtima iwo adandipasa nkhodolo mbaphopha makutu awo.

¹²Iwo adaumisa mtimawo ninga mwala mbakhonda kuvera matongero anga penu mafala akhadatumiza ine MBUYA Wamphamvu zonsene na Mzimu wanga kudzera muna maprofeti akale ale. Natenepo ine MBUYA Wamphamvu zonsene ndidazhangali pyakwanga.

¹³“Ndzidzi udaachemera ine, iwo hadandivesere tayu, tenepo pidandichemerambo iwo, ine sidaavesere tayu. Ndalonga ndine MBUYA Wamphamvu zonsene.

¹⁴Ine ndidaabalalisa na chivumbulu pakati pa madzinza anango kudakhala iwo ninga alendo kule. Dziko yawo idasanduka madembe mwakuti nkhabe na mbodzi ene akhakwanisa kupita penu kubulukamo tayu. Mwenemu ndi mule mudasandusira iwo dziko yamphonje ile kukhala thando yatchetcha.”