Read cisena ZEKARIA 8 Bible Online

ZEKARIA 8 - cisena bible

ZEKARIA 8

¹MBUYA Wamphamvu zonsene adalonga pontho kuna ine mbati,

²“Ine MBUYA Wamphamvu zonsene ndikulonga tenepa: Ine ndina ntchanje pikulu na Zioni, ntchanje yache ina ineyo njamoto.

³“Ine MBUYA ndikulonga tenepa: Ine ndinati ndibwerere basi mu Zioni mbandikhala mu Yerusalemu. Penepo Yerusalemu anachemerwa Mzinda wa Pyakuonadi, pontho Phiri ya MBUYA Wamphamvu zonsene inachemera Phiri Yakuchena.

⁴“Ine MBUYA Wamphamvu zonsene ndikulonga tenepa: Amuna na akazi a mvula zakale anati akhale pontho m'misewu ya Yerusalemu, kada munthu mthondodzo wache m'manja thangwi ya kukalamba.

⁵Misewu ya mzinda munadzala na aphale na atsikana kusenzekamo.

⁶“Ine MBUYA Wamphamvu zonsene ndikulonga kuti penepi pinakwanisa kuoneka pyakuchimwanika kuna anyakusalira na moyo a dzinza yeneyi pandzidzi wenewo, kwache kuna ine penepi nkhabe dzakhala pyakuchimwanika tayu. Ndalonga ndine MBUYA Wamphamvu zonsene.

⁷“Ine MBUYA Wamphamvu zonsene ndikulonga tenepa: Ine ndinapulumusa anthu anga m'manja mwa anthu a kumadziko akumabulukiro na akumadokero dzuwa ene.

⁸Ine ndinaadzesa kuti akhale mu Yerusalemu; iwo anakhala anthu anga, inembo ndinakhala kuna iwo wakukhulupirika pontho wakulungama ninga Mulungu wawo.

⁹“Ine MBUYA Wamphamvu zonsene ndikulonga tenepa: Wangani mphamvu, towera mumange Nyumba ya MBUYA, imwe ale chinchino mwavesera mafala adalongwa na maprofeti, ale akhalipo ndzidzi udamangwa maziko a Nyumba ya Mulungu Wamphamvu zonsene.

¹⁰Ndzidzi wenewo mbudzati fika kukhali nkhabe kupagali nyaganyo penu nyama. Nkhabe na mbodzi ene akhali pakupata kuna anyamalwache tayu, thangwi ndidachitisa munthu kusandukira tsanthembache.

¹¹Mbwenye chinchino ine nkhabe chitave pinthu kuna anyakusalira na moyo a dzinza yeneyi ninga mudachitira ine m'nduli mule tayu. Ndalonga ndine MBUYA Wamphamvu zonsene.

¹²“Mbewu zinakula mwadidi, mfesa zinabala nsapo, mataka anapha phoso, pontho kudzulu kunagwisa bume. Ndinapereka pyonsenepi ninga mtsanzayiso kuna anyakusalira na moyo a dzinzanga.

¹³Ine ndinakupulumusani pontho kukutsanzayisani, imwe anthu a ku Yuda na Israele, podi kwene kuti mukhali chinthu chakutemberera nacho pakati pa madzinza. Lekani chita mantha, mbwenye wangani mphamvu.”

¹⁴MBUYA Mulungu akulonga tenepa: “Ninga montho mukhadapisasanyira ine kudzesa nyatwa pana imwe mbandikhonda kuva nsisi ndzidzi udandizhangalisa makolo anu, ine MBUYA Wamphamvu zonsene ndikulonga kuti

¹⁵chinchino ndasasanya kuchita pontho udidi kuna Yerusalemu na Yuda. Lekani chita mantha.

¹⁶Imwe mwathema kuchita pinthu ipi: Longani pyakuonadi kuna unango na mwanzache, pontho tongani miseru na chilungamo, towera kudzesa mtendere.

¹⁷Lekani sasanya kuchitira pyakuipa tsanthembanu, pontho lekani komerwa na kudumbira pyakunama. Ine ndimbazonda pyonsenepi. Ndalonga ndine MBUYA.”

¹⁸MBUYA Wamphamvu zonsene adalonga pontho kuna ine mbati,

¹⁹“Ine MBUYA Wamphamvu zonsene ndikulonga tenepa: Kupimana kudya kumbachita imwe pa mwezi wachinayi, wachishanu, wachinomwe na wakhumi kunasanduka maphwando akukomerwa na kusekera kuna anthu a ku Yuda. Natenepo funani pyakuonadi na mtendere.”

²⁰“Ine MBUYA Wamphamvu zonsene ndikulonga kuti madzinza azinji pontho anyakukhala m'mizinda izinji anabwera ku Yerusalemu.

²¹Anthu a kumzinda ubodzi anaenda kuna anthu a kumzinda unango mbakalonga kuti, ‘Ife tikwenda kapembedza MBUYA Wamphamvu zonsene mbatikampempha kuti akatikomere mtima. Tenepo tendeni nafe pabodzi pene!’

²²Tenepo anthu a madzinza azinji na amphamvu anabwera ku Yerusalemu dzapembedza MBUYA Wamphamvu zonsene pontho kupempha kuti aakomere mtima.”

²³“Ine MBUYA Wamphamvu zonsene ndikulonga kuti nsiku zenezo amuna khumi akubulukira kumadzinza a pilongero pyakusiyana-siyana anaphata mkhanjo wa Myuda mbodzi mbalonga mbati, ‘Ngatikwatembo tende nawe pabodzi, thangwi tava kuti Mulungu ali namwe.’ ”