Read cisena ZEKARIA 9 Bible Online

ZEKARIA 9 - cisena bible

ZEKARIA 9

¹Mphangwa zakubulukira kuna Mulungu MBUYA akupokanyisana na dziko ya Hadiraki; iye anati atchunyuse Damasiko, thangwi mzinda ukulu wa Aramu ngwa MBUYA, sasawambo madzinza onsene a Israele ngache.

²Mzinda wa Hamati ngwache pontho, ule ndi tsamadire wa Hadiraki; Turo na Sidoni ngache, podi kwene kuti iwo ngaluso pyakwanga.

³Turo apimangira yekha ene mpanda wamphamvu; iye apimulukira siliva ninga fumbi pontho golidi ninga mataka mumsewu.

⁴Kwache Mbuya anati ampokosere mfumache, mbatayira m'bara pyonsene pimbanyindira iye, pontho iye anati avungwe na moto.

⁵Ashikeloni anapiona mbachita mantha; Gaza anakhunyata thangwi ya kuva kupha, Ekroni chibodzi-bodzi, thangwi chidikhiro chache chinamala unyala. Gaza anataya mfumu wache, Ashikelonimbo anati asiyiwe yekha ene.

⁶Mtundu wakuvungazikana unakhazikika mu Ashidodi. MBUYA akulonga kuti, “Kunyada konsene kwa Afilisti ndinati ndikumalise.

⁷Ine ndinaakhondesa kudya nyama ikali na chiropa chache monthomo, penu pyakudya pinango pyokhonda chena. Anyakusalira na moyo ale anakhala ache a Mulungu wathu mbasanduka ninga dzinza ya Yuda; Ekroni anasandukambo ninga Ayebusi.[3]

⁸Kwache ine ndinalondali Nyumbanga, towera paleke gwanda nyamalwa na mbodzi ene, anyakupondereza nkhabe dzavuyave anthu anga tayu, thangwi maso anga ali pana iwo.”

⁹Sekerani pikulu pene imwe, anyakukhala mu Zioni, khuwani, imwe anthu a mu Yerusalemu! Ngayang'anani mfumu wanu akudza kuna imwe, wakulungama pontho wakukunda, wakupichepesa pontho uku apakira bulu, mwana bulu.

¹⁰MBUYA akulonga kuti, “Ine ndinapokosera pingolo pya Eferemu, pontho pingolo pyankhondo pya mu Yerusalemu, na mauta ankhondo ene anati akhumulwe. Mfumuyo anakhazikisa mtendere pakati pa madzinza onsene. Utongi wache unatanthawira kubulukira kubara mpakana kubara, pontho kubulukira kumkulo wa Yufurate mpakana kumadolomero a dziko yapansi.

¹¹Kulonga pya imwe, na thangwi ya chiverano chakutsikimizirwa na chiropa chidachita ine namwe chile, ndinasudzula anyaperezo onsene ale ali m'dzenje yakusowa madzi.

¹²Ngabwererani kumpanda kwanu, imwe anyaperezo akukhala na chidikhiro, podi chinchino ene pano ndikulalika kuti ndinati ndikubwezereni kawiri pinthu pikhadapokoserwa imwe pile.

¹³Ndinakukunga iwe Yuda ninga mumbachitira ine na utanga, pontho Eferemu anakhala ninga tswimo yanga. Anako iwe Zioni ndinaakwata kuti akamenyane na ana a Grisi, mbandikuchitisa kukhala ninga talasada yankhondo ya nyamphamvu.”

¹⁴Tenepo MBUYA anaonekera pakati pawo; matswimo ache anachetuma ninga ching'ani-ng'ani. MBUYA Mulungu analiza ngomache; iye anaenda na mlikiti na chonzi chakumwera.

¹⁵Tenepo MBUYA Wamphamvu zonsene ndiye anafuna dzakhala chakugedera matswimo chawo. Iwo anavunga mbakunda anyamalwawo pakuponyera miyala. Iwo anamwa chiropa chawo mbakhuwa ninga anthu akuledzera vinyu; iwo anakhuta ninga ndilo yakudzala yakuwazira nayo chiropa kunyanga za guwa yansembe.

¹⁶Pansiku yeneyo MBUYA Mulungu wawo anapulumusa anthu ache thangwi iwo ndi mabirache. Iwo anakhazimira m'dziko mwache ninga pyakuthemesera m'chipewu chachifumu.

¹⁷Iwo anakhala akusiririka pontho akubalika; aphale na atsikana anachitiswa kukhala amphamvu, thangwi ya kuinjipa kwa mapira na vinyu wachinchino.