Read cisena MALAKI 1 Bible Online

MALAKI 1 - cisena bible

MALAKI 1

¹Izi ndi mphangwa zakubulukira kuna MBUYA kwenda kuna Aisraele kudzera muna Malaki.

²MBUYA akulonga kuti, “Ine ndidakufunani pyakwanga.” “Mbwenye imwe mukuvunza kuti, ‘Imwe mwatifuna tani?’ ” MBUYA akulonga kuti, “Ayi Esau hakhali mbaleache Yakobo tayu? Kwache ine ndidamfuna Yakobo,

³mbindizondana na Esau; ine ndasandusa dziko yache yamapiri kukhala thando yatchetcha; dziko idampasa ine ile ndidaisandusa ya matika.”

⁴Edomu anakwanisa kulonga kuti, “Podi kwene kuti ife tapeyiwa, tinati timange pontho basi madembe.” Mbwenye MBUYA Wamphamvu zonsene akulonga kuti, “Iwo anakwanisa kumanga, kwache ndinapigomola pontho. Iyo inachemerwa dziko yakuipa, ile anthu ache azhangalirwa na MBUYA kwenda na kwenda.”

⁵Imwe Aisraele munapiona na maso anu mbamulonga kuti, “Ukulu wa MBUYA wafalikira konsene, podi na kunumpha madire ene a Israele.”

⁶MBUYA Wamphamvu zonsene akulonga kuti, “Mwana ambalemedza babache, pontho nyabasa ambalemedza mbuyache. Ngakhala ine ndine baba, apo chilemedzo chakundithemerambo chili kupi? Ngakhala ine ndine mbuya, apo chilemedzo chakundithemerambo chili kupi? “Ndimwepo anyansembe ale mumbalulupisa dzinanga! “Kwache imwe mumbavunza kuti, ‘Apo ife dzinanu tailulupisa tani?’

⁷“Imwe mumbapereka pyakudya pyakunyansa paguwanga ya nsembe. “Kwache imwe mumbavunza kuti, ‘Ayi ife takululupisani tani?’ “Pakulonga kuti guwa yansembe ya MBUYA njakululupiswa.

⁸Imwe mungadza na nyama yakusweka maso dzaipereka nsembe, ayi kweneko si kudawa tayu? Mungapereka nsembe nyama yakulamala penu yakudwala, ayi kweneko si kudawa tayu? Dzayeserenimbo kupipereka pinthu ninga penepi kuna mkulu wanu wa boma! Ayi iye anakomerwa namwe? Ayi iye anakukomerani mtima? Ndalonga ndine MBUYA Wamphamvu zonsene.”

⁹Imwe anyansembe, chinchino yeserani kupempha Mulungu kuti akukomereni mtima. Na pyakupereka pyanu ninga penepi, ayi iye nkhukukomerani mtima basi? MBUYA Wamphamvu zonsene akuthimiza kulonga kuti,

¹⁰“Mbapidakhala pyadidi mbodzi wa imwe mbadafungiratu misuwo ya Nyumbanga, towera muleke gasa moto wakusowa basa paguwanga yansembe. Ine nkhabe komerwa namwe tayu, pontho ine nkhabe dzatambira nsembe zimbapereka imwe tayu. Ndalonga ndine MBUYA Wamphamvu zonsene.

¹¹Dzinanga inakhala ikulu pakati pa madzinza, kutomera kumabulukiro dzuwa mpakana kumadokero dzuwa. Pambuto zonsene, pyakufukiza pyakununkhira na pyakupereka pyakuchena pinaperekwa kuna ine, thangwi dzinanga inakhala ikulu pakati pa madzinza. Ndalonga ndine MBUYA Wamphamvu zonsene.

¹²“Mbwenye imwe mumbandilulupisa pakulonga pya guwa yansembe ya MBUYA kuti, ‘Iyo yaipiswa,’ pontho kulonga pya pyakudya pyaikhwa penepo kuti ‘Mphyakunyansa.’

¹³Imwe mumbalonga kuti, ‘Penepi pyatopesa,’ pontho mumbandipidula. Imwe mungadza na nyama zakupheka, zakulamala, penu zakudwala mbamuzipereka ninga nsembe, ayi ine nkhupitambira basi penepyo? Ndalonga ndine MBUYA Wamphamvu zonsene.

¹⁴“Dzedze kuna munthu wakunama, ule ana bira wadidi wamamuna pa mkumbiache mbadumbira kumpereka, mbwenye m'nduli mwache mbapereka nsembe nyama yokhonda chena kuna Mbuya. Ine ndine Mfumu wamkulu, tenepo dzinanga yathema kugopiwa pakati pa madzinza. Ndalonga ndine MBUYA Wamphamvu zonsene.”