Read cisena MALAKI 3 Bible Online

MALAKI 3 - cisena bible

MALAKI 3

¹MBUYA Wamphamvu zonsene akulonga mbati, “Ngayang'anani, ine ndinatuma nyamphangwa patsogolo panga, ule anafuna dzandisasanyira njira. Tenepo mwakututumusa Mbuya ule anasaka-saka imwe anati adze ku Nyumbache; nyamphangwa anafuna imwe ule, anati adze dzalalika pya chiverano changa.”

²Kwache mbani anapirira pansiku inafuna iye kudza? Iye angabwera mbani anafuna dzaphanisira? Thangwi iye anakhala ninga moto wakunyungulusira utale, penu ninga sopo wa nyakufula nguwo.

³Iye anachita kukhalira pansi ninga misiri wakunyungulusa utale m'dzenje ya moto kubulusa masepu-sepu; iye anachenesa pidzukulu pya Levi mbaabulusa masepu-sepu ninga golidi na siliva. Kubuluka penepo MBUYA anakhala na anthu ale anafuna kumdzesera pyakupereka mwakulungama.

⁴Tenepo pyakupereka pya Yuda na Yerusalemu pinatawirwa pamaso pa MBUYA ninga montho mukhali ipyo kale pyaka pya m'ndulimu.

⁵MBUYA Wamphamvu zonsene akulonga kuti, “Natenepo ine ndinadza chifupi na imwe dzakutongani mseru. Ine ndinachimbiza dzalonga umboni wakupokanyisana na anyamatsenga, maputa na anyakutuna pamiseru; kupokanyisana na ale ambapagali anyabasawo mwakuabera; ale ambapondereza amamfelwa na ana masiye pontho mbakhonda chitira alendo chilungamo, kuna onsene ale ambakhonda kundigopa.”

⁶“Ine MBUYA nkhabe chinja tayu. Ndi thangwi yache imwe pidzukulu pya Yakobo nkhabe vungwa tayu.

⁷Na kale ene, kutomera ndzidzi wa makolo anu, imwe mwabauka kubuluka kuna matongero anga mbamukhonda kuakoya. Bwererani kuna ine, inembo ndinati ndibwerere kuna imwe. Ndalonga ndine MBUYA Wamphamvu zonsene. “Kwache imwe mumbavunza kuti, ‘Tinabwerera tani?’

⁸“Ine ndikukuvunzani kuti, ‘Ayi munthu nkhukwanisa kubera Mulungu?’ Kwache imwe mumbandibera. “Imwe mumbavunza kuti, ‘Ife timbakuberani tani?’ “Imwe mumbandibera pakukhonda kundipasa chakhumi na pyakupereka pinango.

⁹Imwe muna dzedze, thangwi imwe mukundibera; dzinzanu yonsenene.

¹⁰Dzani na chakhumi chonsene kumasubi akukoyeramo pinthu, towera m'Nyumba mwanga mukhale phoso. Ndiyesereni napyo ngakhala sinakufungulirani tayu misuwo yakudzulu mbandikukhuthulirani mtsanzayiso wakuti munasowa nawo mbuto yakukwanira kuukoyeramo. Ndalonga ndine MBUYA Wamphamvu zonsene.

¹¹Ine ndinakhondesa pirombo kuti pileke dzadya mbewu zanu, pontho mfesa zanu nkhabe dzambwera na pang'ono pene tayu. Ndalonga ndine MBUYA Wamphamvu zonsene.

¹²Penepo madzinza onsene anakuchemerani anyakutsanzaya, thangwi dziko yanu inakhala yakusiririka pyakwanga. Ndalonga ndine MBUYA Wamphamvu zonsene.

¹³“Imwe mwandilongera mafala a mkaka uwawi. “Kwache mumbavunza kuti, ‘Mafalache nganji alonga ife mwakupokanyisana namwe?’

¹⁴“Imwe mwalonga kuti, ‘Ntchinthu chapezi-pezi kutumikira Mulungu. Chimbaganyali ife ninji kuchita pinatonga iye, pontho kufamba khuma-khuma pamaso pa MBUYA Wamphamvu zonsene, thangwi ya pyakudawa pyathu?

¹⁵Kwache lero anyakutumbama ndiye anaona ife kuti ngakutsanzaya. Ndimomwene anyakuipa pinthu pyawo pimbaafambira mwadidi; podi na ale ene ambaketesana na Mulungu ambapaswa njira.’ ”

¹⁶Tenepo anyakugopa MBUYA adalongesana unango na mwanzache. Tenepo MBUYA adavesera mbava pinalonga iwo. Mpukutu wa chikumbuso udalembwa pamaso pache kulonga pya ale ambagopa MBUYA mbalemedza dzinache.

¹⁷MBUYA Wamphamvu zonsene akulonga mbati, “Iwo anakhala anthu apamtima panga, pansiku inafuna ine dzasankhula. Ine ndinaapulumusa ninga montho mumbachitira munthu wakuva nyambalo na mwanache ambamfiliviri ule.

¹⁸Pontho munaona kusiyana kwache pakati pa anyakulungama na anyakudawika, pakati pa anthu ale ambanditumikira, na ale ambakhonda kunditumikira.”