Read cisena MATEO 1 Bible Online

MATEO 1 - cisena bible

MATEO 1

¹Ufu ndi ndandanda wa makolo a Yesu Khristu, chidzukulu cha Davite, ule akhali chidzukulu cha Abrahamu.

²Abrahamu adabala Isake, Isake adabala Yakobo, Yakobo adabala Yuda na abale ache, Yuda adabala Perezi na Zera (mawo akhali Tamara), Perezi adabala Hezironi, Hezironi adabala Ramu, Ramu adabala Aminadabu, Aminadabu adabala Nashoni, Nashoni adabala Salimoni, Salimoni adabala Boazi (mache akhali Rahabi), Boazi adabala Obedi (mache akhali Rute), Obedi adabala Yese, Yese adabala Mfumu Davite.

⁶Davite adabala Solomoni (kale mache akhali mkazi Uria), Solomoni adabala Rehoboamu, Rehoboamu adabala Abia, Abia adabala Asa, Asa adabala Yehosafati, Yehosafati adabala Yoramu, Yoramu adabala Uzia, Uzia adabala Yotamu, Yotamu adabala Ahazi, Ahazi adabala Hezekia, Hezekia adabala Manase, Manase adabala Amoni, Amoni adabala Yosia, Yosia adabala Yekonia pabodzi na abale ache pandzidzi udakwatwa Aisraele kwenda kudziko ya Babiloni ninga anyaperezo.

¹²Kubulukira pa ndzidzi udabuluka Aisraele ku Babiloni nyandandanda wa makolo ache ukhali tenepa: Yekonia adabala Salatiele, Shealatiele adabala Zerubabele, Zerubabele adabala Abiudi, Abiudi adabala Eliakimu, Eliakimu adabala Azoro, Azoro adabala Zadoki, Zadoki adabala Akimu, Akimu adabala Eliudi, Eliudi adabala Eleazara, Eleazara adabala Matani, Matani adabala Yakobo, Yakobo adabala Yosefe, Yosefe mamunache Maria, Maria ule adabala Yesu wakuchemerwa Khristu.[1]

¹⁷Natenepo pakhali mifendu ya anthu khumi na minayi kubulukira pa ndzidzi wa Abrahamu kufikirana Davite, pontho mifendu khumi na minayi kubulukira pa ndzidzi wa Davite kufikirana pandzidzi udatamiswa anthu a Aisraele ku Babiloni, pontho mifendu khumi na minayi kubulukira penepo kufikirana pandzidzi wa kubalwa kwa Khristu.

¹⁸Kubalwa kwa Yesu Khristu kudachitika tenepa: Mache, Maria adavunzirwa na Yosefe, mbwenye mbadzati gona pabodzi, adapiona kuti iye anakhala na mwana kudzera muna Mzimu Wakuchena.

¹⁹Yosefe akhali munthu wakuchita pyakulungama ndzidzi onsene, mbwenye hadafune kuti achitise manyadzo Maria pakwecha tayu, natenepo adasasanya njira yakuti amwalane naye mwakukhonda dziwa anthu.

²⁰Pikhanyerezera Yosefe penepi, mngelo wa Mbuya adamuonekera kundoto mbalonga mbati, “Yosefe chidzukulu cha Davite, leka chita mantha, kwata Maria kuti akhale mkazako. Thangwi mimba ina iyeyo nja Mzimu Wakuchena.

²¹Iye anabala mwana wamamuna mbumthula Yesu, thangwi ndiye anapulumusa anthu ache kuna pyakudawa pyawo.”

²²Pyonsenepi pidachitika kuti pikwane-kwane pile pikhadalonga Mbuya kudzera muna mprofeti kuti,

²³“Mwali okhonda dziwa mamuna anakwata mimba mbabala mwana, pontho anamthula Emanuele” (kweneku nkhulonga kuti Mulungu ali nafe).

²⁴Tenepo pidalamuka Yosefe, adasemba Maria ninga mukhadampangira mngelo wa Mbuya kuti achite.

²⁵Mbwenye Yosefe na Maria hadagone pabodzi tayu kufikirana mwana adabalwa. Tenepo Yosefe adathula mwanayo Yesu.