Read cisena MATEO 10 Bible Online

MATEO 10 - cisena bible

MATEO 10

¹Yesu adachemera anyakufunzache khumi na awiri ale pabodzi mbaapasa utongi wakubulusira mizimu yakuipa, pontho kuwangisa utenda onsene.

²Madzina a anyakutumwa khumi na awiri ale mbawa: wakutoma, Simoni wakuthulwa Peturo na mbaleache Andrea; Yakobo na mbaleache Yohani, ana Zebedeo;

³Filipi na Batolomeo; Tomasi na Mateo, nyamisonkho; Yakobo mwana Alufeo, na Tadeo;

⁴Simoni mbodzi wa m'gulu ya Ayuda wakufuna kudzesa utumbe[10] kuna Israele ule na Yudasi Iskarioti, adapereka Yesu kuna anyamalwache ule.

⁵Yesu adatuma anyakutumwa khumi na awiriwa mbaapanga mbati, “Lekani kwenda kunthemba ya anthu okhonda khala Ayuda penu kumaluwani a Samaria.

⁶Mbwenye muende kuna anthu a ku Israele, ale akhala ninga mabira akutayika.

⁷Ndokoni mukalalike kuti, ‘Mulungu ali chifupi kukhazikisa Ufumu wache.’

⁸Kawangiseni atenda na anyamatanya, kalamuseni anyakufa, pontho kabuluseni mizimu yakuipa. Mwatambira okhonda pagali, tenepo kaperekeni okhonda pagalisa.

⁹Lekani kwata kobiri m'mabudu mwanu,

¹⁰penu mabudu a paulendo, mayala a papezi, nkhwaira penu mthondodzo tayu. Nyabasa athema kupaswa pinasowa iye.

¹¹“Mungafika muluwani penu m'mudzi, mukayang'ane munthu anafuna kukutambirani mwadidiyo. Kakhaleni naye pabodzi kufikirana mubuluke pambutopo.

¹²Mungakapita m'nyumba, kalongeni kuti, ‘Pyonsene pikhale pyadidi kuna imwe!’

¹³Ngakhala anthu a m'nyumbamo anakutambirani mwadidi, kaasiyireni mwenyikiro wanu wa mtendere; mbwenye ngakhala hanakutambirani mwadidi tayu, kathukuleni mwenyikiro wanuwo muende nawo pyanu.

¹⁴Ngakhala anthu a m'mudzi penu muluwani hanakutambirani mwadidi tayu, penu mbakhonda kukuveserani, bulukani pyanu pambutopo, pontho kagubudzeni fumbi kumanyalo kwanu kuonesa kuti mwaakhonda.

¹⁵Ndikukupangani pyakuonadi kuti pa Nsiku inafuna Mulungu dzatonga anthu mseru, iye anavera nsisi anthu a kumizinda ya Sodomu na Gomora kupiringana anthu a kuluwani yeneyo.

¹⁶“Ngavani! Ndikukutumani sasawa ninga mabira pakati pa mibinzi. Natenepo mukhale akuchenjera ninga nyoka, pontho akufulika ninga nkhangaiwa.

¹⁷Kakhaleni m'maso, thangwi panabwera anthu dzakumangani mbaenda namwe kuthando ya miseru, pontho anakukwapulani m'nyumba zakupemphereramo.

¹⁸Na thangwi ya ine, imwe munasumirwa kuna atongi na mafumu, kuti mulonge Mphangwa Zadidi kuna iwo na kuna anthu okhonda khala Ayuda.

¹⁹Angakuperekani kuthando ya miseru, lekani swipa mtima na pinafuna imwe kalonga, penu munakalonga tani, mbwenye ndzidzi ungakwana, munati mupaswe pyakuti mulonge.

²⁰Thangwi mafala anafuna imwe longawo hanakhala anu tayu, mbwenye anabulukira kuna Mzimu Wakuchena wa Babanu Mulungu kulonga kudzera muna imwepo.

²¹“Anthu anapereka abale awo kuti aphiwe, pontho ababambo anachita chibodzi-bodzi kuna anawo. Anambo anapandukira makolo awo mbaaphesa.

²²Anthu onsene anakuzondani thangwi ya ine. Mbwenye munthu anapirira mbafika kumamalisiroyo, anapulumuka.

²³Angakusanyisani m'mudzi ubodzi, muthawire kumudzi unangowo. Ndikukupangani pyakuonadi kuti nee munakwanisa kumalisa mabasanu tayu m'maluwani onsene a mu Israele, mwenemo Mwana Munthu mbadzati fika.

²⁴“Nkhabe nyakufunza anapiringana mfunzisi wache tayu; nkhabe bitchu anapiringana mbuyache tayu.

²⁵Tenepo mphyakukwana-kwana kuti nyakufunza akhale sasawa na mfunzisi wache, pontho bitchu kukhala sasawa na mbuyache. Ngakhala mkadamu wa banja akuthulwa Belezebule, anthumbo a m'banjamo anathulwa na dzina yakuipa kupiringana yeneyi.

²⁶“Natenepo lekani gopa anthu. Pinthu pyonsene pinabiswa ndzidzi unopi pinafununkhulwa, pontho pyachibiso-biso pyonsene pinadziwika.

²⁷Pinakupangani ine chibiso-bisopi munapilonga pakwecha, pontho pikhava imwe m'chiwere-were munapilalika na pansoyi ya nyumba.

²⁸Mphapo lekani gopa ale ambapha manungo okha, mbwenye iwo nkhabe kwanisa kupha mzimu tayu. Mbwenye chitani mantha na Mulungu ule anakwanisa kuvunga manungo anu na mzimu wanu ene pabodzi kugehena.

²⁹Ntchenga ziwiri zimbaguliswa na kobiri ibodzi, kwache nkhabe ntchenga na ibodzi ene imbagwa pansi Babanu mbakhonda kuidziwa.

³⁰Imwembo, na tsisi ene ya mumsolo mwanu yonsene yamala lengeswa.

³¹Natenepo lekani gopa, thangwi imwe ndimwe akufunika pyakwanga kupiringana ntchenga zizinji!

³²“Ngakhala munthu anatawira pamaso pa anthu kuti iye ngwanga, inembo ndinamchita chibodzi-bodzi pamaso pa Babanga wa kudzulu.

³³Mbwenye ngakhala munthu anandikhonda pamaso pa anthu, inembo ndinamkhonda pamaso pa Babanga wa kudzulu.

³⁴“Lekani nyerezera kuti ndadzera dzapereka mtendere padziko yapansi. Nkhabe, ine sidadza na mtendere tayu, mbwenye ndadza na nthonga.

³⁵Ndadzera dzalekanisa baba na mwanache wamamuna, mama na mwanache wamkazi, mebzala na mkwenyache.

³⁶Anyamalwache munthu anakhala anthu a m'banja mwache monthomo.

³⁷“Munthu anafuna babache na mache pyakwanga kupiringana ine, nee athema kukhala nyakufunzanga tayu; munthu anafuna mwanache wamamuna, penu wamkazi pyakwanga kupiringana ine, nee athema kukhala nyakufunzanga tayu.

³⁸Munthu anakhonda sasanyika kuona nyatwa penu na kufa kwene mbanditewera, nee athema kukhala nyakufunzanga tayu.

³⁹Munthu anafuna kupulumusa moyo wache, anautaya, mbwenye munthu anafuna kutaya moyo wache thangwi ya ineyo, anati aupulumuse.

⁴⁰“Munthu anakutambirani mwadidiyo, atambirambo na ine ene. Pontho munthu ananditambira mwadidiyo, atambirambo na adandituma ene ule.

⁴¹Munthu anatambira mwadidi nyabasa wa Mulungu, thangwi ndi nyabasa wa Mulungu, weneyo anafupwa sasawa ninga nyabasayo. Pontho munthu anatambira mwadidi munthu wakulungama, thangwi ngwakulungama, weneyo anafupwa sasawa ninga munthu wakulungamayu.

⁴²Munthu anapasa ndiko ya madzi akuthonthola kuna mbodzi wa anyakufunzanga wamng'onoletu, thangwi ndi nyakunditewera, ndikukupangani pyakuonadi kuti weneyo anati atambire mfupo wache.”