Read cisena MATEO 11 Bible Online

MATEO 11 - cisena bible

MATEO 11

¹Pidamala Yesu kulonga mafala enewa kuna anyakufunzache khumi na awiri, iye adabuluka pambutopo mbaenda kafunzisa na kulalika kumaluwani a chifupi na kweneko.

²Yohani Nyakubatiza mbali m'perezo, adava pyonsene pikhachita Khristu pile, tenepo adatuma anango mwa anyakufunzache kwenda kuna iye kamvunza. Iwo adamvunza mbati,

³“Ngatipangeni, ayi akhalonga Yohani kuti anabwera ule ndimwe, penu tidikhire unango ene?”

⁴Yesu adaatawira mbati, “Bwererani mbamukampange Yohaniyo pyava na pyaona imwepi.

⁵Maboli-boli akuona, anyamfutete akufamba, anyamatanya akucheneswa,[11] madodo akuva, anyakufa akulamuka, pontho Mphangwa zadidi zikulalikwa kuna anyakutcherenga.

⁶Ngwakutsanzaya munthu ule anakhonda taya chikhulupiro, thangwi ya pinachita ine.”

⁷Pikhaenda anyakufunza a Yohani Nyakubatiza, Yesu adalonga pya iye kuna mwinji ule mbati, “Pikhaenda imwe kuna Yohani kuthando yatchetcha, chikhadikhira imwe kaona ninji? Mtete wakutekenyeka na mphepo?

⁸Mudenda kaonanji? Munthu wakuvala nguwo zakufewa? Nkhabe, anthu akuvala tenepo ambakhala m'nyumba za mafumu.

⁹Ngandipangeni, mphapo, mudenda kaonanjii? Mprofeti penu? Andedi, mbwenye mudaona wakupiringana mprofeti.

¹⁰Thangwi Yohani ngule analongwa m'Malemba kuti, ‘Mulungu adalonga kuti ndinatuma nyakutumwanga patsogolo pako dzakusasanyira njirako.’ ”

¹¹Ndikukupangani pyakuonadi kuti Yohani Nyakubatiza ngwamkulu pyakwanga kupiringana anthu onsene adakhala na moyo pansi pano. Mbwenye munthu wamng'onoletu mu Ufumu wa Kudzulu ngwamkulu kupiringana Yohani.

¹²Kutomera pandzidzi ukhalalika Yohani mphangwa zache kufikirana lero, Ufumu wa Kudzulu wasoswa pikulu,[12] pontho anthu amphamvu zawo akuyesa kuuvunga.

¹³Kufikirana ndzidzi wa Yohani, maprofeti onsene, pontho na mwambo wa Mose adalongeratu pya pinthu pinafuna dzachitika;

¹⁴mphapo ngakhala munakwanisa kutawira mphangwa zawozi, Yohani ndi Elia, ule adalongwa kuti anabwera.

¹⁵Ule ana makutu akuva, mbave!

¹⁶“Chinchino ndinaasangiza nanji anthu a mwaka uno? Iwo akhala ninga ana akukhala pamsika. Gulu ibodzi mbilonga kuna gulu inango kuti,

¹⁷‘Tidakuimbirani nyimbo zakukazhali nazo, mbwenye imwe nee mudavina tayu! Tidakuimbirani nyimbo za pamaliro, mbwenye imwe nee mudalira tayu!’

¹⁸Pidadza Yohani, adapimana kudya, pontho hadamwe vinyu tayu. Mphapo anthu onsene adalonga kuti iye ana mzimu wakuipa!

¹⁹Pidadza Mwana Munthu, adadya na kumwa kwene, mphapo anthu onsene adalonga mbati, ‘Ngayang'anani, munthu wamtima, pontho dombeyi, shamwali wa anyamisonkho na anyakudawa.’ Nzeru za Mulungu zaoneswa na mabasazo kuti nsakuonadi.”

²⁰Tenepo Yesu adatoma kusumulula maluwani mudachita iye pyakudodomesa pizinji pene mule, na thangwi ya kukhonda kwawo kuleka pyakudawa mbati,

²¹“Una dzedze ndiwe luwani ya Korazini! Una dzedze ndiwe luwani ya Betesaida. Thangwi pyakudodomesa pidachitwa muna imwe mbapidachitwa m'mizinda ya Turo na Sidoni, anthu a kweneko mbadavala kale masakha na kupikhwaza dotha kuonesa kuti alekadi pyakudawa pyawo.

²²Ndikukupangani kuti Nsiku inafuna Mulungu dzatonga anthu mseru, iye anavera nsisi pikulu anthu a ku Turo na Sidoni kupiringana imwepo.

²³Mphapo iwembo Kafaranao! Ayi ukhafuna kupikwiza wekha ene kudzulu? Iwe unaponywa kugehena! Pyakudodomesa pidachitwa muna iwe pile, mbapidachitwa mumzinda wa Sodomu, mzindawo mbudakhala ulipo basi na lero!

²⁴Ndikukupangani kuti Nsiku inafuna Mulungu dzatonga anthu mseru, iye anavera nsisi pikulu anthu a ku Sodomu kupiringana imwe!”

²⁵Pandzidzi wenewo Yesu adalonga mbati, “Baba, Mbuya wa kudzulu na dziko yapansi, ndinapereka takhuta kuna imwe, thangwi mwaonesa kuna anthu okhonda funza pinthu pikhabisira imwe anthu anzeru na akufunza pile.

²⁶Ande, Baba, mwenemu ndiye mukhapifunira imwe kuti pichitike.

²⁷“Babanga andipasa utongi papinthu pyonsene. Nkhabe na mbodzi ene anadziwa Mwana tayu, mbwenye Baba yekha basi, pontho nkhabe na mbodzi ene anadziwa Baba tayu kupambula Mwana, pontho na ale ambasankhulwa na Mwanayo kuti iye adziwise Baba kuna iwo.

²⁸“Idzani kuno, imwe monsene akutopa na akulemerwa, ine ndinakupumisani.

²⁹Thukulani goli-goli yanga, pontho funzani bulukira kuna ine thangwi ine ndine wakufulika pontho wakupichepesa. Tenepo imwe munapumadi.

³⁰Thangwi goli-goli inafuna kukupasani ineyo njakukhonda nensa, pontho mtolo unafuna ine kukuthukulisaniwo ngwakululupa.”