Read cisena MATEO 12 Bible Online

MATEO 12 - cisena bible

MATEO 12

¹Kubuluka penepo Yesu akhagwanda na m'minda ya tirigu pa Nsiku Yakupuma. Tenepo anyakufunzache akhali na njala mbatoma kukwedzula ngala za tirigu mbanununa.

²Pidaona Afarisi penepi, adalonga kuna Yesu mbati, “Ngayang'ana pinachita anyakufunzakowa, kweneku nkhudawira mwambo wathu kuchita pinthu ninga penepi pa Nsiku Yakupuma!”

³Yesu adaatawira mbati, “Kadi imwe hamudawerenga tayu pidachita Davite na anzache ndzidzi udava iwo njala ule?

⁴Iye na anzache adapita m'Nyumba ya Mulungu mbakadyamo mikate ikhadaperekwa kuna Mulungu ile. Kweneku kukhali kudawira mwambo kuti iwo adye mikateyo, mbwenye anyansembe ene basi ndiye akhatawiriswa kudya mikateyo.

⁵Pontho imwe hamudawerenge tayu m'mwambo wa Mose kuti pa Nsiku Yakupuma yonsene anyansembe m'Nyumba ya Mulungu akhaswa mwambo, mbwenye imwe nee mudaayesa akudawa tayu.

⁶Ndikukupangani kuti pano pana chinthu chinango chakufunika pyakwanga kupiringana Nyumba ya Mulungu.

⁷Malemba akulonga kuti ‘Chinafuna ine ndi nsisi, nee nsembe za nyama tayu.’ Thangwi mbamudadziwa kuti penepi pikulonganji, nee mbamudalonga anthu okhonda dawa kuti adawa tayu;

⁸thangwi Mwana Munthu ndi Mbuya wa Nsiku Yakupuma.”

⁹Yesu adabuluka pambutopo mbaenda kunyumba yakupemphereramo.

¹⁰Mwenemo mukhali munthu wakulamala dzanja. Tenepo anthu anango akhali penepo kufuna teyera Yesu msampha wakuchita pinthu pyakudawika, natenepo adamvunza Yesu mbati, “Kani kuwangisa munthu pa Nsiku Yakupuma nkhudawira mwambo wa Mose?”

¹¹Yesu adaatawira mbati, “Ngakhala munthu unango pakati panu ana bira, tenepo birayo agwera m'dzenje pa Nsiku Yakupuma. Ayi hangambulusemo kabodzi kene tayu?

¹²Apo ndi tani na munthu, ule ngwakufunika pyakwanga kupiringana bira? Natenepo mwambo wathu umbatawirisa kuchita udidi pa Nsiku Yakupuma.”

¹³Tenepo iye adalonga kuna nyakulamala dzanja ule mbati, “Futhula dzanjako.” Iye adafuthuladi dzanjacheyo mbibwerera ninga mwakale, sasawa ninga inangoyo.

¹⁴Tenepo Afarisi adenda kasaka njira yakuphera Yesu.

¹⁵Pidava Yesu pikhafuna kuchita Afarisi pile, adabuluka kumbuto yeneyo; tenepo mwinji ukulu udamtewera. Iye adawangisa atenda onsene,

¹⁶mbaapanga kuti aleke kapanga anthu anango pya iye.

¹⁷Iye adachita tenepo kuti pile pidalonga Mulungu kudzera muna mprofeti Yesaya pikwane-kwane:

¹⁸“Uyu ndi nyabasanga, asankhula ine ule, iye ngwapamtima panga, pontho ndimbakomerwa naye pyakwanga. Ndinatumiza Mzimu wanga pana iye, tenepo iye analalika kuna madzinza onsene kuti ine ndimbatonga mseru mwakulungama.

¹⁹Iye hanapokanya, penu kukhuwa, penu kugaluza falache m'njira tayu.

²⁰Iye hanamalisa mtete wakuthyoka kale, penu kuthimisa nsakali yakupuchira tayu, kufikirana iye achitise kuti anthu avere matongero a Mulungu.

²¹Tenepo anthu a madzinza onsene anamnyindira.”

²²Anthu anango adadza kuna Yesu na munthu wakukhonda longa na kuona kwene, thangwi akhadaphatwa na mzimu wakuipa. Yesu adamuwangisa, tenepo iye adakwanisa pontho kulonga na kuona kwene.

²³Mwinji onsene udadodoma na pidachita Yesu pile mbavunza mbati, “Ayi angakhale Mwana Davite weneyu?”

²⁴Pidava Afarisi penepi, adatawira mbati, “Kubulusa mizimu yakuipa kumbachita iyeku, kumbabulukira kwinango tayu, mbwenye kuna Belezebule, mfumu wa mizimu yakuipa, ule ambampasa mphamvu zakuchitira penepi.”

²⁵Yesu adadziwa kale pikhanyerezera iwo, tenepo adaapanga mbati, “Dziko ingagawikana yokha ene m'magulu mbimenyana, hinakwanisa kwenda m'tsogolo tayu, pontho luwani penu banja ingagawikana yokha ene m'magulu mbimenyana, inafudzika.

²⁶Tenepo ngakhala gulu inamenyana na inzache mu ufumu wa Satana, kweneku nkhulonga kuti ufumuwo wagawikana kale m'magulu, tenepo chinchino unafudzika.

²⁷Imwe mukulonga kuti ndimbabulusa mizimu yakuipa thangwi ambandipasa mphamvu zakuchitira penepi ndi Belezebule. Mphapo mbani ambapasa anyakuteweranu mphamvu zakubulusa nazo mizimu yakuipa? Natenepo pimbachita anyakuteweranu pimbaonesa kuti pimbalonga imwe mphyakudawa.

²⁸Nkhabe, si Belezebule tayu, mbwenye ndi Mzimu wa Mulungu, ule ambandipasa mphamvu zakubulusira mizimu yakuipa kutsikimizira kuti Mulungu akhazikisa kale Ufumu wache pakati panu.

²⁹“Nkhabe munthu anakwanisa kuswa nyumba ya munthu wamphamvu mbakwata pinthu pyache pyonsene. Mbwenye chakutoma amange munthu wamphamvuyo. Angachita tenepo anakwanisa kupokosa pinthu pyonsene pya m'nyumbamo.

³⁰“Munthu anapokanyisana na ineyo, nee ngwanga tayu; nyakukhonda kundiphedza kugumanyayo, kunachita iyeko nkhumwaza.

³¹Natenepo ndikukupangani kuti anthu anakwanisa kulekererwa pyakudawa pyawo pyonsene na mafala onsene akudawika analonga iwo;[13] mbwenye munthu angalongera Mzimu Wakuchena pyakuipa, nee analekererwa pyakudawa pyache tayu.

³²Munthu analongera Mwana Munthu pyakuipa analekererwa, mbwenye munthu analongera Mzimu Wakuchena pyakuipayo, nee analekererwave kubulukira chinchino kwenda m'tsogolo tayu.

³³“Mungalonga kuti mutiwu ngwadidi, ndiye kuti nsapo zache nsadidi; mungalonga kuti mutiwu ngwakuipa, ndiye kuti nsapo zache nsakuipa. Muti umbadziwika na nsapo zimbabala iwo.

³⁴Imwe nyoka, mungakwanise tani kulonga pinthu pyadidi mwenemo ndimwe akuipa? Thangwi mulomo umbalonga pinthu pyakudzala mumtima.

³⁵Munthu wadidi ambalonga pinthu pyadidi pimbakoya iye mumtima mwache; munthu wakuipa ambalonga pyakuipa kubulukira m'pyakuipa pimbakoya iye mumtima mwache.

³⁶“Mbwenye ndikukupangani kuti pa Nsiku inafuna Mulungu dzatonga anthu mseru, munthu anakhala na mseru thangwi ya mafala apezi onsene alonga iye.

³⁷Mulungu anakutongani mseru na mafalanu ontho adalonga imwe, kukupangani ngakhala ndimwe adidi penu akuipa.”

³⁸Tenepo afunzisi anango a mwambo na Afarisi anango adalonga mbati, “Mfunzisi, tinafuna tikuoneni mukuchita chidzindikiro.”

³⁹Yesu adatawira mbati, “Anthu a mwaka unomwe, ndimwe akuipa pontho okhonda tsalakana pya Mulungu. Munafuna muone chidzindikiro? Nkhabe! Chidzindikiro chinafuna imwe paswa ntchile cha mprofeti Yona ene basi.

⁴⁰Ninga mudamalira Yona m'mimba mwa chinsomba nsiku zitatu mosiku na masikati, sasawambo Mwana Munthu anamala nsiku zitatu mosiku na masikati pansi m'mataka.

⁴¹Pa Nsiku inafuna Mulungu dzatonga anthu mseru, anthu a mumzinda wa Ninevi anaimira kupokanya anthu a mwaka uno, thangwi iwo adaleka pyakudawa pyawo pidava iwo kulalika kwa Yona. Chinchino ndikukupangani kuti pano pana unango wamkulu kupiringana Yona!

⁴²Pa Nsiku inafuna Mulungu dzatonga anthu mseru, mfumukazi wa kudziko ya Sheba anaimira kupokanya anthu a mwaka uno, thangwi iye adafamba nsinzo ukulu pyakwanga kavesera mafala a nzeru a Mfumu Solomoni. Chinchino ndikukupangani kuti pano pana unango wamkulu kupiringana Solomoni.

⁴³“Mzimu wakuipa ungabuluka muna munthu, umbazungulira-zungulira kunthemba zakusowa madzi kusaka mbuto yakuti upume. Ungakhonda kuigumana mbutoyo,

⁴⁴umbalonga okha ene kuti, ‘Ndinabwerera pyanga kunyumba kudabulukira ine kule.’ Tenepo umbabwereradi mbukagumana m'nyumbamo nkhabe pinthu, mwatswairwa, pontho mwamala sasanywa.

⁴⁵Tenepo umbaenda kakwata mizimu inzache minomwe yakuipa pikulu kupiringana iwo ene mbibwera dzakhala mwenemo. Pakumalisira pache makhaliro a munthuyo ambanyanyiratu kuipa kupiringana pakutoma. Penepi mphile pinafuna dzachitika kuna anthu akuipa a mwaka unowa.”

⁴⁶Yesu akhali m'kati kulonga kuna anthu ale pidafika mache na abale ache. Iwo adaimira panja mbapempha kuti alonge naye.

⁴⁷Tenepo munthu mbodzi penepo adalonga kuna Yesu mbati, “Ngayang'anani, manu na abale anu ali panjapa anafuna alonge namwe.”[14]

⁴⁸Yesu adatawira mbati, “Mama na abale anga mbani?”

⁴⁹Tenepo adathonya anyakufunzache mbalonga mbati, “Yang'anani, mama na abale anga mbawa ali panowa!

⁵⁰Thangwi munthu anachita pinafuna Babanga wa kudzulu weneyo ndi mbaleanga, nyamainganga na mamanga.”