Read cisena MATEO 13 Bible Online

MATEO 13 - cisena bible

MATEO 13

¹Nsiku yonthoyo Yesu adabuluka panyumbapo mbakakhala m'khundu-khundu mwa nyanza kufunzisa.

²Mwinji udagumanyikana mwakumzungulira penepowo udakula pyakwanga mwakuti adapakira m'mwadiya mbakhala pyache mwenemo, mwinjimbo ule udaimira pagombe.

³Iye adaphatisa basa misangani kuapanga pinthu pizinji mbati, “Pidachitwa na nyakulima unango, ule adenda kawaza mbewu m'munda mwache.

⁴Pikhawaza iye mbewuzo, zinango zidagwera m'njira, tenepo mbalame zidadza mbizidzonkhona mbewuzo.

⁵Mbewu zinango zidagwera pambuto yachimwala-mwala, pale pakhali na mataka akuchepa. Mbewuzo zidachimbiza kumera, thangwi mataka hadapite pansi mwakuzwika tayu.

⁶Mbwenye pidakwira dzuwa, idavula umerawo. Na thangwi yakuti mitsitsi hidapita pansi mwakuzwika tayu, umerawo udauma kabodzi kene.

⁷Mbewu zinango zidagwera m'matenthere a minga, ale adakula mbaphimbira umerawo.

⁸Mbwenye mbewu zinango zidagwera m'mataka adidi, tenepo mbewuzo zidabala; zinango zidaikha maso dzana, zinango makumatanthatu, zinangombo makumatatu kupiringana zidawazwa zile.”

⁹Tenepo Yesu adamalisa na kulonga mbati, “Ule ana makutu akuva, mbave!”

¹⁰Tenepo anyakufunzache adadza kuna iye mbamvunza mbati, “Thangwi ninji mungalonga kuna anthu mumbaphatisa basa misangani?”

¹¹Yesu adaatawira mbati, “Imwe mwapaswa udziwisi wa pinthu pyakubisika pya Ufumu wa Kudzulu, nee kuti pidapaswa kuna anthu enewa tayu.

¹²Thangwi munthu ana pinthu kaleyo anati apaswe pontho pinango; mbwenye nyakusowaletu pinthuyo anapokwa na pinkiti pene pina iye kale.

¹³Thangwi imbaphatisa ine basa misangani ndingalonga kuna iwo njakuti aone, mbwenye aleke onesesa, ave, mbwenye aleke vesesa.

¹⁴Tenepo mafala a mprofeti Yesaya akwane-kwane kuna iwo lero akuti, ‘Anthuwa anava na kuva, kwache hanavesa tayu, anayang'ana na kuyang'ana, kwache hanaonesesa tayu.

¹⁵Thangwi misolo yawo yafa, pontho aphopha makutu na kufunga maso awo. Mbadakhonda chita tenepo, maso awo mbadaona, makutu awo mbadava, pontho misolo yawo mbidavesa, tenepo mbadazungunukira kuna ine, alonga Mulungu, inembo mbandidaawangisa.’

¹⁶“Muna mwayi ndimwe, thangwi maso anu akuona, pontho makutu anu akuva.

¹⁷Ndikukupangani pyakuonadi kuti maprofeti azinji na anthu a Mulungu azinji adafuna pyakwanga kuona pinthu pinaona imwepi, kwache hadapione tayu. Iwo adafunambo kuva pinava imwepi, kwache hadapive tayu.

¹⁸“Ngavani, mphapo, mufunze kuti msangani wa nyakuwaza mbewu ukulonganji.

¹⁹Ale ambava mafala akulonga pya Ufumu wa Mulungu, mbwenye nee vesesa tayu, akhala ninga pidachita mbewu zidagwa m'njira zile. Satana, nyakuipa ule ambadza mbapokosera, pile pikhadawazwa mumtima mwawo.

²⁰Pidachita mbewu zidagwera pachimwala-mwala zile, mbale ambatambira mafalawo na kukomerwa pandzidzi unaava iwo.

²¹Mbwenye mafalawo nkhabe likha muna iwo tayu, tenepo hambamalave ndzidzi ukulu ene tayu. Natenepo nyatwa penu kusanyika pingadza thangwi ya mafalawo, iwo ambagweratu kabodzi kene.

²²Pidachita mbewu zidagwera m'matenthere a minga zile, mbale ambavadi mafalawo, mbwenye pyakunensa pya moyo uno, na kukhumba mfuma pimbaphimbira mafalawo. Tenepo iwo hambabalave tayu.

²³Pidachita mbewu zidagwera m'mataka adidi zile, mbale ambatambira mafalawo mbaavesesa. Iwo ambaikha maso azinji, anango dzana, anango makumatanthatu, anangombo makumatatu.”

²⁴Yesu adaapanga pontho msangani unango mbati, “Ufumu wa Kudzulu wakhala ninga tenepa. Munthu adabzala mbewu zadidi m'munda mwache.

²⁵Nsiku inango na mosiku mwenemo anthu onsene mbali m'chitulo, nyamalwa adadza mbabzala dawe pakati pa mapira mbaenda pyache.

²⁶Mapira adakula mbatoma kuonesa ngala, tenepo dawe adaonekambo.

²⁷Anyabasa a munthu ule adalonga mbati, ‘Mbuya, mbewu zidabzala imwe m'munda mwanu zile zikhali zadidi, apo dawemboyi abulukira kupi?’

²⁸Iye adatawira mbati, ‘Achita penepi ndi nyamalwa unango pontho.’ Iwo adavunza mbati, ‘Mphapo munafuna kuti tiende kadula daweyo?’

²⁹Iye adatawira mbati, ‘Tayu, thangwi mungakamdula mwinango munadula pabodzi na mapira ene.

³⁰Pilekeni pikulire pabodzi kufikirana ndzidzi wakuvuna. Tenepo ndinapanga anyakuvuna kuti chakutoma adule daweyo mbamgumanya m'makuku mbampisa. Angamala penepo agumanye mapirawo mbaaikha m'chikwa mwanga.’ ”

³¹Yesu adaapanga pontho msangani unango mbati, “Ufumu wa Kudzulu wakhala ninga tenepa. Munthu ambakwata mbewu ya chitowe mbakaibzala m'munda mwache.

³²Iyo ndi mbewu yakufinuka pyakwanga, mbwenye ingakula, imbapiringanaletu mbewu zonsene. Imbakula mbikhala thenthere ene mwakuti mbalame zimbadza mbizimanga pisa pyawo m'nthambi zachezo.”

³³Yesu adaapanga pontho msangani unango mbati, “Ufumu wa Kudzulu wakhala ninga tenepa. Mkazi ambakwata chakufufumisira mikate mbavungaza na ufa wakudzala ndowa kufikirana mpambo onsenewo ufufume.”

³⁴Yesu akhaphatisa basa misangani kupanga mwinji pinthu pyonsenepi; iye hakhalonga kwene okhonda phatisa basa msangani tayu.

³⁵Iye adachita tenepa kuti pikwane-kwane pidalongwa na mprofeti pile kuti, “Ndinaphatisa basa msangani kulonga kuna iwo. Ndinaapanga pinthu pyakubisika kutomera pidalengwa dziko yapansi.”

³⁶Pidabuluka Yesu pamwinji pale, adapita pyache m'nyumba, tenepo anyakufunzache adadza kuna iye mbalonga mbati, “Ngatipangeni, msangani wa dawe m'munda ukulonganji.”

³⁷Yesu adaatawira mbati, “Munthu adabzala mbewu zadidi ule ndi Mwana Munthu;

³⁸mundawo ndi dziko yapansi; mbewu zadidizo ndi anthu a mu Ufumu wa Mulungu; dawe ule ndi anthu a Satana, nyakuipa;

³⁹pontho nyamalwa adabzala dawe ule ndi Satana ene. Kuvuna kule nkhumala kwa dziko yapansi, tenepo anyakuvuna ale mbangelo.

⁴⁰Ninga mule mumbadulwa dawe mbapiswa pamoto, pinachitikambo sasawa pakumala kwa dziko yapansi.

⁴¹Mwana Munthu anatuma angelo ache dzagumanyisa mu Ufumu wache anthu onsene ale akhachitisa kuti anthu adawe, pontho na onsene anango akuchita pyakudawika

⁴²mbaaponya kung'anjo ya moto, kweneko analira na kukikita mano awo.

⁴³Tenepo anthu a Mulungu anachena ninga dzuwa mu Ufumu wa Babawo. Ule ana makutu akuva, mbave!”

⁴⁴“Ufumu wa Kudzulu wakhala ninga tenepa. Munthu angagumana mfuma yakubisika m'munda, ambaibisa pontho, tenepo ambakomerwa pyakwanga mwakuti ambaenda kagulisa pyonsene pina iye mbabwerera kagula munda ule.

⁴⁵“Pontho, Ufumu wa Kudzulu wakhala ninga tenepa. Munthu wakusaka-saka misanga yakudula,

⁴⁶iye angagumana usanga ubodzi wakubalika pyakwanga, ambaenda kagulisa pyonsene pina iye, angamala penepo, ambaenda kagula usangawo.

⁴⁷“Pontho, Ufumu wa Kudzulu wakhala ninga tenepa: Amisiri akugwesera kokotawo m'nyanza mbapha nsomba za mtundu na mtundu.

⁴⁸Kokotayo ingadzala, ambaikweyera kumtunda, mbakhala pansi kusankhula nsombazo: zadidi ambaziikha m'pitundu, mbwenye zakusowa basazo ambazitaya.

⁴⁹Pinakhala sasawa pakumala kwa dziko yapansi; angelo anaenda kagumanya anthu akuipa pakati pa anthu adidi.

⁵⁰Tenepo anaaponya m'ng'anjo ya moto, kweneko analira na kukikita mano awo.”

⁵¹Yesu adaavunza mbati, “Kadi imwe mukuvesa pinthu pyonsenepi?” Iwo adatawira mbati, “Ande.”

⁵²Natenepo Yesu adatawira mbati, “Penepi pikulonga kuti afunzisi onsene a mwambo ambasanduka nyakufunza mu Ufumu wa Kudzulu ale akhala ninga mwenechiro nyumba, ule ambakwata pinthu pyakale na pyachinchino kubulukira mumbakoya iye pinthu pyache mule.”

⁵³Pidamala Yesu kulonga misangani yeneyi, adabuluka pambutopo,

⁵⁴mbabwerera kuluwani ya kwawo. Iye adafunzisa m'nyumba yakupemphereramo, tenepo onsene adamvawo adadodoma mbavunza mbati, “Nzeru ninga yeneyi pontho mphamvu zakuchita nazo pyakudodomesa adaikwata kupi?

⁵⁵Weneyu si mwana nyampala matabwa ule tayu? Mache si Maria weneyu tayu, pontho abale ache si Yakobo, Yosefe, Simoni na Yudasi tayu?

⁵⁶Anyamaingache si enewa ali kunowa tayu? Mphapo pyonsenepi adapikwata kupi?”

⁵⁷Natenepo adamkhonda. Yesu adalonga kuna iwo mbati, “Mprofeti ambalemedzwa konsene kwene, kupambula kuluwani ya kwawo pontho na banjache.”

⁵⁸Na thangwi yakuti iwo hadakhulupire tayu, iye hadachiteko pyakudodomesa pizinji tayu.