Read cisena MATEO 14 Bible Online

MATEO 14 - cisena bible

MATEO 14

¹Pandzidzi wenewo Herodi mfumu wa ku Galilea, adava pya Yesu.

²Iye adalonga kuna mathubu ache mbati, “Iye ndiyedi Yohani Nyakubatiza, ule alamuka kuimfa. Ndi thangwi yache ana mphamvu zakuchita nazo pyakudodomesa.”

³Herodi akhadatonga kumangwa kwa Yohani. Iye akhadammangisa na njema mbamuikha m'perezo. Iye adachita penepi thangwi ya Herodia, mkazi wa mbaleache Filipi.

⁴Thangwi Yohani Nyakubatiza akhapanga Herodi mbati, “Nkhudawira mwambo kuti iwe usembe Herodia!”

⁵Herodi akhafuna kumpha kwache akhachita mantha na Ayuda, thangwi iwo akhayesa Yohani ninga mprofeti.

⁶Pansiku yakusekera kubalwa kwa Herodi, mwana wamkazi wa Herodia adavina mwadidi pamaso pa gulu yonsene mwakuti Herodi adakomerwa pyakwanga.

⁷Natenepo adampanga mbati, “Ndikudumbira kuti ndinakupasa chinthu chonsene chinandipempha iwe.”

⁸Na kufuna kwa mache, mwanayo adapempha mbati, “Ngandipaseni msolo wa Yohani Nyakubatiza m'palato chinchino pano!”

⁹Mfumu adatsukwala, mbwenye na thangwi ya kudumbira kudachita iye pamaso pa alendo ache onsene, iye adatonga kuti kufuna kwa mwana mtsikana kuchitike.

¹⁰Natenepo adatuma munthu kuperezo kagwanda msolo wa Yohani.

¹¹Msolowo udadzeswa m'palato kuna mwana mtsikanayo, iyembo adaukwata mbakaupasa mache.

¹²Anyakufunza a Yohani adadza mbathukula mtembo wache mbakauikha m'masiye. Tenepo iwo adenda kapanga Yesu.

¹³Pidava Yesu pya Yohani, adabuluka kweneko na mwadiya mbaenda kakhala kumbuto ya yekha ene. Pidava anthu penepi, iwo adabuluka m'maluwani mwawo mbatewera Yesu na pamtunda.

¹⁴Yesu adatchitha m'mwadiya mule, tenepo pidaona iye mwinji ukulu ule, mtimache udadzala na nsisi, tenepo adawangisa atenda.

¹⁵Na mawulo mwache, anyakufunzache adadza kuna iye mbalonga mbati, “Yang'anani kunjaku kwadoka, pontho kuna ife kuno nkhutsanga. Tenepo apangeni anthuwa aende kumidzi kuti akapigulire okha kudya.”

¹⁶Yesu adatawira mbati, “Mphyakufunika tayu kuti iwo aende. Imwe maka apaseni pyakudya!”

¹⁷Iwo adatawira mbati, “Pina ife pano ndi mikate mishanu na nsomba ziwiri basi.”

¹⁸Yesu adalonga mbati, “Idzani napyo kuno.”

¹⁹Iye adapanga anthu ale kuti akhale pansi pa maudzu; tenepo iye adakwata mikate mishanu na nsomba ziwiri zile, mbayang'ana kudzulu, tenepo adapereka takhuta kuna Mulungu. Iye adamenya-menya mikateyo mbaipereka kuna anyakufunza, anyakufunzambo adaigawiza anthu ale.

²⁰Onsene adadya mbakhuta, tenepo anyakufunza adathukula pitundu khumi na piwiri pyakudzala na pyakusalira.

²¹Konta ya anthu adadya ale akhali ninga amunakulu pikwi pishanu, nee kuvungazapo akazi na ana tayu.

²²Kubuluka penepo Yesu adapanga anyakufunza kupakira m'mwadiya kuti atsogole kumtunda unango wa nyanza, mwenemo iye akhagwinya anthu ale kwawo.

²³Pidamala iye kugwinya anthu ale, iye adenda yekha ene paphiri kapemphera. Tenepo pikhadoka kunja, Yesu akhali kweneko yekha ene.

²⁴Pandzidzi wenewu mwadiya ukhali kutali na kumtunda, ukhaona nyatwa na mabimbi, thangwi mphepo ikhadza mwakuyang'anisana nawo.

²⁵Pakati pa ora yachitatu na chitanthatu na machibese Yesu adadza kuna anyakufunza mwenemo akufamba pamadzi.

²⁶Pidamuona iwo akufamba pamadzi pale, iwo adagoswerwa pyakwanga mbakhuwa na mantha mbati, “Ndi mzukwa!”

²⁷Yesu adalonga kuna iwo kabodzi kene mbati, “Wangani mtima! Ndine pano. Lekani chita mantha.”

²⁸Tenepo Peturo adalonga mbati, “Mbuya, ngakhala ndimwedi, ndipangeni kuti ndidze kuna imwe na kufamba pamadzipa.”

²⁹Yesu adatawira mbati, “Idza!” Tenepo Peturo ule adatchitha m'mwadiya mbatoma kufamba pamadzi kwenda kuna Yesu.

³⁰Mbwenye pidaona iye kuti mphepo idakula, adachita mantha, mbatoma kulirima m'madzi. Tenepo adalira mbati, “Mbuya, ngandipulumuseni!”

³¹Kabodzi na kabodzi Yesu adafuthula dzanjache mbamphata mbalonga mbati, “Munthu wa chikhulupiro chakuchepa iwe! Thangwi ninji ukhapenuka?”

³²Onsene awiri pabodzi adapakira m'mwadiya, tenepo mphepo idamaliratu.

³³Tenepo anyakufunza m'mwadiya mule adapembedza Yesu mbati, “Andedi imwe ndimwedi Mwana Mulungu!”

³⁴Iwo adawambuka nyanza mbafika kuluwani ya Genesareti.

³⁵Kweneko anthu adamdzindikira Yesu, natenepo anthu adenda kakwata atenda onsene m'nthemba zakuzungulira mbadza nawo kuna iye.

³⁶Iwo adampempha Yesu kuti atawirise ale akhali na utenda kukhuya kwene chikhwayeti cha chakufinika chache; tenepo onsene adakhuya ale, adawanga.