Read cisena MATEO 15 Bible Online

MATEO 15 - cisena bible

MATEO 15

¹Tenepo Afarisi anango na afunzisi a mwambo adadza kuna Yesu kubulukira ku Yerusalemu mbamvunza mbati,

²“Thangwi yache ninji anyakufunzanu ambakhonda vera mitemo idatipasa makolo athu? Iwo hambasamba mwadidi m'manja tayu, angafuna kudya.”

³Yesu adatawira mbati, “Thangwi yache ninji imwe mumbakhonda vera mwambo wa Mulungu pakuteweza mitemo yanu?

⁴Thangwi Mulungu adatonga kuti: ‘Lemedza babako na mako,’ pontho ‘Munthu analulupisa babache na mache athema kuphiwa.’

⁵Mbwenye imwe mumbafunzisa kuti ngakhala munthu ana chinthu anakwanisa kuphedzera nacho babache na mache, mbwenye iye ambalonga kuti, ‘Penepi mphya Mulungu.’

⁶Tenepo iye nkhabe funika kulemedza babache.[15] Pakuchita tenepo, mumbalulupisa mwambo wa Mulungu, towera muteweze mitemo yanu.

⁷Imwe mfaka-faka! Mprofeti Yesaya adalonga pyakuonadi pidalonga iye pya imwe kuti,

⁸‘Mulungu adalonga kuti: Anthu enewa ambandilemedza na m'kanwa mwawo mwene basi, mbwenye mitimawo ili kutali na ine.

⁹Kundipembedza kwawo nkhwakusowa basa, thangwi iwo ambafunzisa matongero akusasanywa na anthu khala ninga asasanywa na Mulungu.’ ”

¹⁰Tenepo Yesu adachemera mwinji kuna iye mbalonga nawo mbati, “Vesereni kuno, pontho muvese mwadidi,

¹¹si pyakupita m'kanwa mwa munthu pimbamswipisa pamaso pa Mulungu tayu, mbwenye pyakubuluka m'kanwa mwache, ndiye pimbamswipisa.”

¹²Penepo anyakufunza adadza kuna iye mbalonga mbati, “Kani mukupidziwa kuti Afarisi adaipirwa na pidalonga imwe pile?”

¹³Yesu adatawira mbati, “Mbewu zonsene zile zidakhonda bzalwa na Babanga wa kudzulu zinadulwa.

¹⁴Alekeni pyawo, maboli-boliwa, ale mbanyakutsogolera maboli-boli; boli-boli angaphata nsenji boli-boli mwanzache, onsene uwiriawo anagwera m'dzenje.”

¹⁵Peturo adalonga mbati, “Ngatipangenimbo msanganiwu ukulonganji?”

¹⁶Yesu adalonga kuna iwo mbati, “Kani misolo yanu yafa?

¹⁷Kani imwe nkhabedi vesa tayu? Chinthu chingapita m'kanwa mwa munthu chimbaenda kapita m'mimba mbachikabuluka kunja kwa manungo ache.

¹⁸Mbwenye pinthu pyakubuluka m'kanwa pimbabulukira mumtima. Tenepo penepi mphinthu pimbaswipisa munthu.

¹⁹Thangwi kubulukira mumtima mwache mumbabuluka pikhumbo pyakuipa pile pimbamgwinyira kapha, kachita uputa, pontho kachita pyakudzedzeduka, kuba, kunama na tsweda.

²⁰Penepi mphinthu pimbaswipisa munthu. Mbwenye kudya okhonda samba manja nkhabe swipisa munthu tayu.”

²¹Yesu adabuluka pambutopo mbaenda pyache kunthemba ya chifupi na mizinda ya Turo na Sidoni.

²²Kweneko mkazi wa kudziko ya Kanani ule akhakhala kunthemba yeneyo adadza kuna Yesu mbalira mbati, “Mbuya, Mwana Davite, ndiverenimbo nsisi ine! Mwananga wamkazi ana mzimu wakuipa, pontho akusanyika pikulu.”

²³Mbwenye Yesu hadalonge chinthu na chibodzi chene kuna iye tayu. Anyakufunzache adadza kuna iye mbampempha mbati, “Mpangeni aende! Thangwi iye akutitewera, pontho akutinyangula!”

²⁴Tenepo Yesu adatawira mbati, “Mulungu adandituma kuna anthu a Israele okha basi, thangwi akhala ninga mabira akutayika.”

²⁵Penepo mkazi ule adadza mbagodama pamaso pa Yesu mbalonga mbati, “Mbuya, ndiphedzenimbo ine.”

²⁶Yesu adatawira mbati, “Si pyadidi tayu kukwata kudya kwa ana mbatiponyera anambwa.”

²⁷Iye adatawira mbati, “Ndimomwene, Mbuya, mbwenye anambwa ambadya mambwera-mbwera ambagwera pansi kubulukira pa thebulu ya mbuyawo.”

²⁸Tenepo Yesu adamtawira mbati, “Iwe ndiwe mkazi wa chikhulupiro chakuinjipa! Chinapempha iwechi chinati chichitike kuna iwe.” Na ndzidzi onthowo mwanache adawangiratu.

²⁹Yesu adabuluka kweneko mbaenda pyache na m'khundu-khundu mwa nyanza ya Galilea. Iye adakwira paphiri mbakakhala pansi penepo.

³⁰Mwinji ukulu udadza kuna iye na anyamfutete, maboli-boli, anyakulamala, anthu okhonda longa, na atenda anango onsene, mbaaikha pamanyalo pa Yesu. Iyembo adaawangisa.

³¹Anthu adadodoma na pidaona iwo kuti anthu okhonda longa akhakwanisa kulonga, anyakulamala akhawanga, anyamfutete akhafamba, pontho maboli-boli akhaona; tenepo iwo adakuza Mulungu wa Israele.

³²Penepo Yesu adachemera anyakufunzache kudza kuna iye mbalonga mbati, “Ndikuva nyambalo na anthuwa, thangwi akhala na ine nsiku zitatu, apo chinchino nkhabe chakuti adye. Sinafuna kuti ndiagwinye m'misa mwawo na njala tayu, thangwi anati akomokere m'njira.”

³³Anyakufunza ale adamvunza mbati, “Nkhupi m'tsanga muno kunakwanisa munthu kagumana kudya kwakukwana kudyesa mwinjiwu?”

³⁴Yesu adavunza mbati, “Muna mikate mingasi?” Iwo adatawira mbati, “Minomwe, pontho na pinsomba ping'ono-ping'ono pyakuchepa.”

³⁵Tenepo Yesu adatonga mwinji ule kukhala pansi.

³⁶Tenepo iye adakwata mikate minomwe na nsomba zile mbapereka takhuta kuna Mulungu. Iye adapimenya-menya mbapipereka kuna anyakufunzache. Iwombo adapikwata mbapigawiza mwinji ule.

³⁷Onsene adadya mbakhuta. Tenepo anyakufunza ale adathukula pitundu pinomwe pyakudzala na pyakusalira.

³⁸Konta ya anthu adadya ale akhali amunakulu pikwi pinayi, nee kuvungazapo akazi na ana tayu.

³⁹Tenepo Yesu adagwinya anthu ale kwawo, iyembo mbapakira m'mwadiya kwenda kunthemba ya Magadani.