Read cisena MATEO 16 Bible Online

MATEO 16 - cisena bible

MATEO 16

¹Afarisi anango na Asaduki ale akhadadza kuna Yesu akhafuna kumteyera msampha, tenepo adapempha Yesu kuti aachitire chidzindikiro kuonesa kuti iye akhalidi na mphamvu za Mulungu.

²Mbwenye Yesu adaatawira mbati, “Dzuwa ingadoka, imwe mumbalonga kuti, ‘Mangwana kunja kunakhala pyadidi, thangwi ya kufira kwa thambo.’

³Pontho na machibese mumbalonga kuti, ‘Lero kunavumba mvula, thangwi thambo yafira pontho yaswipa.’ Imwe mumbadziwa kutchulula pidzindikiro pya nsiku pakuyang'ana kuthambo, kwache nkhabe dziwa kutchulula pinthu pinachitika ndzidzi uno tayu.

⁴Anthu amwaka uno ngakuipa, pontho ngokhonda tsalakana pya Mulungu; iwo ambafuna pidzindikiro! Ayi mukundipempha kuti ndichite chidzindikiro? Nkhabe! Chidzindikiro chinafuna imwe kupaswa ntcha Yona chene basi.” Tenepo iye adaasiya mbaenda pyache.

⁵Pidawambuka anyakufunza kukhundu inango ya nyanza, akhadaduwalira kukwata mkate na ubodzi ene.

⁶Yesu adalonga kuna iwo mbati, “Khalani m'maso, pontho onesesani mwadidi pyakufufumisira mikate pya Afarisi na Asaduki.”

⁷Iwo adatoma kulonga okha ene mbati, “Yesu akulonga tenepa, thangwi ife nkhabe mkate.”

⁸Yesu adadziwa pikhalonga iwo pile, natenepo adaavunza mbati, “Thangwi ninji munalonga mwekha mwene pyakuti imwe nkhabe mkate? Imwe anthu a chikhulupiro chakuchepa.

⁹Kadi na pano imwe nkhabedi kuvesa? Kadi imwe nkhabe kumbuka ndzidzi udadyesa ine amunakulu pikwi pishanu na mikate mishanu? Mudadzaza pitundu pingasi?

¹⁰Pontho na pidadyesa ine amunakulu pikwi pinayi na mikate minomwe? Mudadzaza pitundu pingasi pya mikate?

¹¹Mphapo ninji mudakhonda kuvesa kuti ndikhalonga na imwe pya mikate tayu? Mupiyang'anire mwekha mwene pa pyakufufumisira mikate pya Afarisi na Asaduki!”

¹²Tenepo anyakufunza ale adavesa kuti iye hadaacheuze kuti apiyang'anire mwadidi pa pyakufufumisira mikate tayu, mbwenye pa pifunziso pya Afarisi na Asaduki.

¹³Yesu adenda kunthemba ya chifupi na luwani ya Kesarea-Filipi. Kweneko iye adavunza anyakufunzache mbati, “Anthu ambalonga kuti Mwana Munthu mbani?”

¹⁴Iwo adatawira mbati, “Anango ambalonga kuti ndimwe Yohani Nyakubatiza; anango ati ndimwe Elia; anangombo ati ndimwe Yeremia, penu mbodzi wa maprofeti.”

¹⁵Iye adaavunza mbati, “Mphapo imwembo, mumbalonga kuti ndine ani?”

¹⁶Simoni Peturo adatawira mbati, “Ndimwe Khristu, Mwana Mulungu wamoyo!”

¹⁷Yesu adatawira mbati, “Nyakutsanzaya ndiwe Simoni, Mwana Yohani, thangwi penepi nee pidabulukira kuna munthu tayu, mbwenye pyaoneswa kuna iwe kubulukira kuna Babanga wa kudzulu.

¹⁸Peturo, ndikukupanga kuti ndiwe phanzwi, tenepo paphanzwi yeneyi ndinamangapo mpingo wanga. Tenepo nkhabe chinthu chinafuna dzaukunda tayu, nee na imfa ene tayu.[16]

¹⁹Ndinakupasa mfungulo wa misuwo ya Ufumu wa Kudzulu; pinthu pinakhondesa iwe pansi pano pinati pikhondeswembo kudzulu, pontho pinthu pinatawirisa iwe pansi pano pinati pitawiriswembo kudzulu.”

²⁰Tenepo iye adapanga anyakufunzache ale kuti aleke panga munthu na mbodzi ene kuti iye akhali Khristu.

²¹Kubuluka ndzidzi wenewo Yesu adatoma kulonga pakwecha kuna anyakufunzache mbati, “Ndathema kwenda ku Yerusalemu kule kunafuna kasanyiswa ine pikulu na akulu-akulu, anyansembe akulu na afunzisi a mwambo. Ndinati ndikaphiwe, mbwenye pangagwanda nsiku zitatu ndinati ndilamuke mbandikhala na moyo.”

²²Penepo Peturo adenda naye pakhundu mbatoma kumsumulula mbati, “Nkhabe Mbuya! Mulungu aleke tawirisa kuti pinthu penepi pikuchitikireni.”

²³Mbwenye Yesu adazungunuka kuna Peturo mbalonga mbati, “Buluka pana ine, Satana! Iwe wakhala ninga chitsa cha m'njira mwanga, thangwi manyerezero akowa nkhabe bulukira kuna Mulungu tayu, mbwenye kuna anthu.”

²⁴Tenepo Yesu adalonga kuna anyakufunzache mbati, “Ngakhala munthu anafuna kunditewera athema kupikhonda yekha ene, pontho asasanyike kuona nyatwa na kufa kwene, tenepo anditewere.

²⁵Thangwi munthu anafuna kupulumusa moyo wacheyo anati autaye; mbwenye ule anataya moyo wache thangwi ya ine anati aupulumuse.

²⁶Munthu anaganyalinji angakwata dziko yonsene yapansi, mbataya kwene moyo wache? Nkhabe tayu! Ninji chinafuna iye dzapagali kuti akwate pontho moyo wache?

²⁷Thangwi Mwana Munthu ali chifupi kudza mudemelero ya babache pabodzi na angelo. Tenepo iye anafupa anthu onsene kutewezana na mabasawo.

²⁸Ndikukupangani pyakuonadi kuti pano pana anango ale hanafa tayu kufikirana aone Mwana Munthu adza dzakhala Mfumu wa anthu onsene.”