Read cisena MATEO 17 Bible Online

MATEO 17 - cisena bible

MATEO 17

¹Pidagwanda nsiku zitanthatu Yesu adakwata Peturo, Yakobo pabodzi pene na Yohani mbaleache Yakobo mbakwira nawo padzulu paphiri yakulapha mbakhala okha ene penepo.

²Pikhali iwo m'kati kuyang'ana, adaona Yesu akusanduzika. Nkhope ya Yesu ikhayetima ninga dzuwa, pontho nguwo zache zidachena ninga cheza.

³Tenepo anyakufunza atatu ale adaona Mose na Elia akulonga na Yesu.

⁴Natenepo Peturo adalonga kuna Yesu mbati, “Mbuya, mphyadidi kuti ife tili pano! Imwe mungapifuna ndinati ndikumangireni makumbi matatu pano, ibodzi yanu, inango ya Mose, inangombo ya Elia.”

⁵Pikhali iye m'kati kulonga, makole akuchena adaagudumira, tenepo fala idaveka kubulukira m'makolemo kuti, “Weneyu ndi Mwananga wapamtima; ndakomerwa naye pyakwanga, mvesereni!”

⁶Pidava anyakufunza falayo, adagoswera pyakwanga mwakuti adapigwisa pansi na fufumimba.

⁷Yesu adadza kuna iwo mbaaphata mbalonga mbati, “Lamukani, lekani goswerwa!”

⁸Tenepo adakwiza maso awo mbaonapo nee munthu unango, mbwenye Yesu ene basi.

⁹Pikhatchitha iwo paphiri pale, Yesu adaapanga mbati, “Lekani kapanga munthu na mbodzi ene pinthu pyaona imwe kumasomphenyapi, kufikirana Mwana Munthu alamuswa kuimfa.”

¹⁰Tenepo anyakufunza ale adavunza Yesu mbati, “Afunzisi a mwambo ambalongeranji kuti Elia ndiye athema kutoma kudza?”

¹¹Yesu adatawira mbati, “Elia ndiye anatomadi kudza dzasasanyiratu pinthu pyonsene.

¹²Mbwenye ndikukupangani kuti Elia adadza kale, mphapo anthu hadamdzindikire tayu, mbwenye iwo adamchitira pinthu pyonsene pidakhafuna iwo. Tenepo iwo anati achite chibodzi-bodzi kusanyisa Mwana Munthu.”

¹³Penepo anyakufunza ale adavesa kuti Yesu akhaapanga pya Yohani Nyakubatiza.

¹⁴Pidafika iwo kuna mwinji ule, mamuna unango adadza dzagodama pamaso pa Yesu

¹⁵mbalonga mbati, “Mbuya, veranimbo nsisi mwananga wamamuna. Iye ana njiri-njiri, pontho ambasanyika pyakwanga. Ndzidzi uzinji iye ambagwera pamoto na m'madzi.

¹⁶Ine ndidadza naye kuna anyakufunzanu, kwache iwo adachimwana kumuwangisa.”

¹⁷Yesu adatawira mbati, “Anthumwe kukhonda khulupira na kudawa kweneku nkhwanji? Ndikhale namwe kufikirana lini? Ndipirire namwe kufikirana lini? Idzani naye kuno mphaleyo!”

¹⁸Yesu adatonga mzimu wakuipa ule kuti ubuluke, tenepo mzimuwo udabulukadi muna mphaleyo. Na ndzidzi onthowo mphale ule adawangiratu.

¹⁹Tenepo anyakufunza ale adadza kuna Yesu mbamvunza pa yekha ene mbati, “Apo ife tidachimwana tani kubulusa mzimu wakuipa ule?”

²⁰Yesu adatawira mbati, “Thangwi yache njakuti imwe nkhabe chikhulupiro chakukwana tayu. Ndikukupangani pyakuonadi kuti ngakhala imwe muna chikhulupiro chakukwana ninga mbewu ya chitowe, munakwanisa kulonga kuna phiriyi kuti, ‘Buluka pano, uende apo!’ Iyombo inaendadi. Munakwanisa kuchita pinthu pyonsene!”[17]

²²Pidagumanyikana anyakufunza onsene mu Galilea, Yesu adalonga kuna iwo mbati, “Mwana Munthu ali chifupi kuperekwa m'manja mwa anthu,

²³ale anafuna dzampha, mbwenye pangagwanda nsiku zitatu anati alamuke mbakhala na moyo.” Anyakufunza ale adatsukwala pyakwanga.

²⁴Pidadza Yesu na anyakufunzache pabodzi kuluwani ya Kafaranao, anyamisonkho a ku Nyumba ya Mulungu adadza kuna Peturo mbavunza mbati, “Ayi mfunzisi wanuyi ambakhoma msonkho wa ku Nyumba ya Mulungu?”

²⁵Peturo adamtawira mbati, “Ande, ambakhoma.” Pidapita Peturo m'nyumba, Yesu ndiye adatoma kuvunza Simoni mbati, “Iwe Simoni, ukunyerezera tani? Mbani ambakhoma msonkho kuna mafumu a padziko pano? Alendo penu mzika?”

²⁶Simoni adatawira mbati, “Alendo.” Yesu adatawira mbati, “Tenepo mzika nkhabe funika kukhoma msonkho tayu?

²⁷Mbwenye ife nkhabe funa kuzhangalisa anthuwa. Natenepo ndoko kunyanza ukamedze. Nsomba inatoma iwe kumangayo ukaikanule kukanwa, tenepo unakagumanamo kobiri zakukwana-kwana kukhomera msonkho wako na wanga ene wa ku Nyumba ya Mulungu. Tenepo ukakwate kobirizo mbukakhomere msonkho.”