Read cisena MATEO 18 Bible Online

MATEO 18 - cisena bible

MATEO 18

¹Pandzidzi wenewo anyakufunza adadza kuna Yesu mbavunza mbati, “Mkululetu mbani mu Ufumu wa Kudzulu?”

²Tenepo Yesu adachemera kamwana mbakaimisa pamaso pawo

³mbalonga mbati, “Ndikukupangani pyakuonadi kuti mungakhonda sanduza makhaliro anu mbamukhala ninga piana, nee munapitabi mu Ufumu wa Kudzulu.

⁴Mkululetu mu Ufumu wa Kudzulu ngule ambapichepesa yekha ene kukhala ninga kamwanaka.

⁵Munthu onsene anatambira mwadidi kamwana ninga keneka thangwi ya ine, atambirambo na ine ene.

⁶“Ngakhala munthu anadawisa mbodzi wa piana pimbandikhulupirapi, mbipidakhala pyadidi kuna munthu weneyo kuti amangirirwe libwe ikulu m'khosi mwache, pontho abizwe m'nyanza yakuzwika.

⁷Dzedze kuna dziko yapansi, thangwi ya pinthu pimbachitisa iyo kuti anthu ataye chikhulupiro chawo. Pinthu ninga penepi pinati pichitike, mbwenye dzedze kuna munthu anapichitisa ule!

⁸“Ngakhala dzanja penu dzinyalo yako ikukudawisa, igwande mbuitaye! Mphyadidi kuti ukapite kumoyo okhonda mala okhonda dzanja penu dzinyalo kusiyana nakuti ukoye manja, na manyalo ako onsene mawiri mbukaponywa kumoto okhonda thima.

⁹Pontho ngakhala diso yako ikukudawisa, ikonombole mbuitaye! Mphyadidi kuti ukapite kumoyo okhonda mala na diso ibodzi basi kusiyana nakuti ukoye maso onsene mawiri mbukaponywe kumoto wa kugehena.

¹⁰“Muonesese mwadidi kuti muleke kululupisa na mbodzi ene wa pianapi. Ndikukupangani kuti angelo awo a kudzulu ndzidzi onsene ambakhala pamaso pa Babanga wa kudzulu.[18]

¹²“Mukunyerezera tani ngakhala munthu ana mabira dzana, mbwenye mbodzi nkhutayikapo? Ayi iye hangasiye mabira makumafemba na mafemba ale paphiri mbaenda kasaka bira mbodzi adatayika ule tayu?

¹³Iye angamgumana kwene, ndikukupangani pyakuonadi kuti ambakomerwa pyakwanga na bira mbodzi ule kupiringana mabira onsene makumafemba na mafemba adakhonda tayika ale.

¹⁴Montho-monthomo Babanu[19] wa kudzulu hambafuna kuti mbodzi wa pianapi atayike tayu.

¹⁵“Ngakhala mbaleako akudawira,[20] mphyadidi uende kampanga kudawa kwache. Mbwenye uchite mwakukhonda dziwa anthu, pikhale pakati pa iwe na iye. Angavesera pinalonga iwepyo penepo wambweza mbaleako.

¹⁶Mbwenye angakhonda kukuvesera, ndoko ukakwate munthu mbodzi penu awiri uende nawo pabodzi kuna iye, towera ‘mseru onsene utsikimizwe na mboni ziwiri penu zizinji’ ninga munalongera Malemba.

¹⁷Tenepo iye angakhonda kuvesera anthu enewa, ndoko ukapange mpingo pya mseru onsenewu. Mbwenye angachimwanikaletu kuvesera pinalonga mpingo, umuyese pyako ninga munthu okhonda dziwa Mulungu, penu nyamisonkho.

¹⁸“Natenepo ndikukupangani pyakuonadi kuti pinthu pinakhondesa imwe pansi pano pinakhondeswambo kudzulu, pontho pinthu pinatawirisa imwe pansi pano pinatawiriswambo na kudzulu kwene.

¹⁹“Ndikukupangani pontho kuti uwirianu mungaphatizana pansi pano kupempha chinthu chonsene kuna Babanga wa kudzulu, iye anakuchitirani.

²⁰Thangwi panagumanyikana anyakundikhulupira awiri penu atatu, inembo ndili ponthopo nawo pabodzi.”

²¹Tenepo Peturo adadza kuna Yesu mbavunza mbati, “Mbuya, ngakhala mbaleanga anandidawira kazinji kene, ndimulekere kangasi? Kanomwe?”

²²Yesu adatawira mbati, “Nkhabe, kanomwe tayu, mbwenye makumanomwe na kanomwe.[21]

²³Thangwi Ufumu wa Kudzulu wakhala ninga tenepa: Pidachitwa na mfumu unango, ule adanyerezera kuti anyabasache onsene apagali mangawa akhadakwata iwo ale.

²⁴Pidatoma iye kulengesa, nyabasa akhali na mangawa mbondo pikwi-pikwi ule, adendeswa kuna iye.

²⁵Nyabasa ule akhali nkhabe kobiri zakukwana kupagali nazo mangawache ale tayu, natenepo mfumu ule adatonga kuti iye pabodzi na mkazache na anache aguliswe ninga mabitchu, pontho na pyonsene pikhali na iye piguliswe, towera apagali mangawache.

²⁶Nyabasa ule adagodama pamaso pa mfumu mbapempha mbati, ‘Ndidikhireni pang'ono ndinati ndikupagalini pyonsene!’

²⁷Mfumu adava naye nsisi, tenepo adamfudzira mangawache ale mbampanga kuti aende pyache.

²⁸“Mphapo nyabasa ule pidabuluka iye panja, adagumanikana na mbodzi wa anyabasa anzache akhadamfiyalimbo mbondo zakuchepa ule. Iye adamphata pakhosi mbatoma kumting'inda mbalonga mbati, ‘Ndipagali pidandifiyali iwe pile.’

²⁹Nyabasa mwanzache ule adapigwisa pamanyalo pache kumbulumundira mbalonga mbati, ‘Ndidikhireni pang'ono ndinati ndikupagalini!’

³⁰Mbwenye iye adakhonda mbamuikhisa m'perezo kufikirana apagali mangawache ale.

³¹Pidaona anyabasa anango pidachitika pile, adaipirwa napyo pyakwanga mbaenda kapanga mfumu.

³²Tenepo mfumu ule adachemera nyabasa ule mbalonga mbati, ‘Nyabasa wakuipa iwe! Ine ndidakufudzira mangawa onsene adandifiyali iwe ale, thangwi iwe udandibulumundira.

³³Ayi iwe mbudamverambo mwanzakoyu nsisi tayu ninga mudachitira ine kuna iwe?’

³⁴Mfumu ule adazhangali napyo pyakwanga mbatumiza nyabasa ule kuperezo kuti akatchunyuswe kufikirana apagali mangawa onsene ale.”

³⁵Yesu adamalisa na kulonga mbati, “Babanga wa kudzulu anachita chibodzi-bodzi kuna imwe monsene ngakhala munakhonda lekerera abale anu kubulukira pansi pa mtima.”