Read cisena MATEO 19 Bible Online

MATEO 19 - cisena bible

MATEO 19

¹Pidamala Yesu kulonga mafala enewa, adabuluka ku Galilea mbaenda kunthemba ya Yudea kukhundu inango ya mkulo wa Yorodani.

²Mwinji ukulu udamtewera, tenepo iye adaawangisa kweneko.

³Afarisi anango adadza kuna iye mbayesera kumtapa m'kanwa pakumvunza mbati, “Ayi mwambo wa Mose umbatawirisa kuti mamuna amwalane na mkazache pathangwi yonsene inafuna iye?”

⁴Yesu adaatawira mbati, “Kani imwe hamudawerenge tayu Malemba akuti pakutoma Nyakulenga pyonsene ‘adasasanya iwo mamuna na mkazi’?

⁵Tenepo Mulungu adathimiza kulonga mbati, ‘Na thangwi yeneyi mamuna anasiya babache na mache mbakaphatikana na mkazache, tenepo awiriwa anakhala ninga munthu mbodzi.’

⁶Natenepo iwo halive awiri tayu, mbwenye mbodzi. Pinthu pidaphataniza Mulungu pile, munthu mbaleke kupimwalanisa.”

⁷Afarisi ale adavunza Yesu mbati, “Mphapo ninji Mose adapereka mwambo wakutawirisa mamuna kuti apase mkazache kalata ninga msiku mbabuluse mkaziyo pabanjapo?”

⁸Yesu adatawira mbati, “Mose adakutawirisani kumwalana na akazanu thangwi ndimwe anthu akufa msolo. Mbwenye nee pikhali tenepo tayu pandzidzi udalenga Mulungu anthu.

⁹Ndikukupangani, mphapo, kuti ngakhala mamuna anamwalana na mkazache na mathangwi anango ene, nee kuti mkaziyo achita uputa tayu, mbasemba mkazi unango, mamuna achitira uputa mkazache wakutomayo.”

¹⁰Anyakufunzache adalonga kuna iye mbati, “Ngakhala penepi pili tenepo pakati pa mamuna na mkazache, mphyadidi kukhala okhonda semba.”

¹¹Yesu adatawira mbati, “Nee, si anthu onsene anakwanisa kutambira penepi tayu, mbwenye okha ene apipaswa na Mulungu ale.

¹²Thangwi pana mathangwi akusiyana-siyana akuti munthu akhonde semba; anango ndi thangwi yakuti adabalwa tenepo; anango thangwi ya kufuna kwa anthu; anangombo thangwi yakutumikira Mulungu. Ule anakwanisa kuchitambira, atambire chifunzisochi.”

¹³Anthu anango adadza na ana kuna Yesu kuti iye aasanjike manja pontho aapempherere, mbwenye anyakufunza adalongera anthu ale.

¹⁴Yesu adalonga mbati, “Alekeni ana adze kuna ine, pontho lekani kuakhondesa, thangwi Ufumu wa Kudzulu ngwa anthu akukhala ninga anawa.”

¹⁵Iye adaasanjika manja mbaenda pyache.

¹⁶Mphale unango adadza kuna Yesu mbamvunza mbati, “Mfunzisi ndichitenji chadidi kuti nditambirembo moyo okhonda mala?”

¹⁷Yesu adatawira mbati, “Unandivunziranji kuti chadidi ntchipi? Pana Mbodzi ene basi wadidi. Ngakhala unafuna kapita kumbuto ya moyo okhonda mala uvere matongero a Mulungu.”

¹⁸Iye adavunza mbati, “Matongero ache ngapi?” Yesu adatawira mbati, “Leka kupha, leka chita uputa, leka kuba, leka pambizira mwanzako,

¹⁹lemedza babako na mako, pontho funa mwanzako ninga mumbapifunira iwe wekha ene.”

²⁰Mphale ule adatawira mbati, “Ine ndateweza matongero onsenewa. Chasala na ine ninji pontho chakuti ndichite?”

²¹Yesu adalonga kuna iye mbati, “Ngakhala iwe unafuna kukhala wakuthema monsene mwene, ndoko kagulise pinthu pyako pyonsene, pontho ukapereke kobirizo kuna anyakutcherenga, tenepo iwe unakhala na mfuma kudzulu. Tenepo idza unditewere.”

²²Pidava mphale ule penepi, adenda pyache wakutsukwala, thangwi akhali wakufuma pyakwanga.

²³Yesu adalonga kuna anyakufunzache mbati, “Ndikukupangani pyakuonadi kuti pinakhaladi pyakunensa kuti anthu akufuma akapite mu Ufumu wa Kudzulu kusiyana nakuti ng'ombe ipite na pabenga ya nsingano.”

²⁵Pidava anyakufunza ale penepi, ndiye adanyanyiratu kumalwa nzeru mbavunza mbati, “Apo mbani anakwanisa kupulumuka?”

²⁶Yesu adaayang'ana mbalonga mbati, “Penepi mphyakuchimwanika kuna munthu, mbwenye kuna Mulungu pyonsene mphyakukwanisika.”

²⁷Peturo adamtawira mbati, “Yang'anani, ife tasiya pinthu pyathu pyonsene mbatitewera imwepo. Apo ninji chinafuna ife dzafupirwa?”

²⁸Yesu adalonga kuna iwo mbati, “Ndikukupangani pyakuonadi kuti Mwana Munthu angakhala pampando wache wachifumu wademelero pandzidzi unasasanywa pinthu pyonsene pyachinchino, khumi na awiri angamwe munakhalambo pamipando yachifumu kutonga mseru madzinza khumi na awiri a anthu a Israele.

²⁹Tenepo anthu onsene ale adasiya nyumba, penu abale, penu anyamainga, penu baba, penu mama, penu ana, penu minda, thangwi ya ineyo, anatambira madzana-madzana a pidasiya iye pile, pontho anatambira moyo okhonda mala.

³⁰Mbwenye azinji ale chinchino ngakutoma anakhala akumalisira, pontho azinji ale chinchino ngakumalisira anakhala akutoma.”