Read cisena MATEO 2 Bible Online

MATEO 2 - cisena bible

MATEO 2

¹Yesu adabalwa muluwani ya Betelehemu, m'nthemba ya Yudea, pandzidzi wa Mfumu Herodi. Penepo pene amuna anango, anyakudziwisa pya nyenyezi, adabwera ku Yerusalemu kubulukira kumabulukiro dzuwa

²mbavunza mbati, “Mwana ule abalwa kukhala mfumu wa Ayuda ali kupi? Tidaona nyenyezi yache kumabulukiro dzuwa, tenepo ife tabwera kuti tidzamulambire.”

³Pidava Mfumu Herodi pabodzi na anthu onsene akukhala mumzinda wa Yerusalemu penepi, adasanyika mumtima.

⁴Iye adachemeresa anyansembe akulu onsene na afunzisi a mwambo mbaavunza mbati, “Khristu anabalirwa kupi?”

⁵Iwo adamtawira mbati, “Muluwani ya Betelehemu m'nthemba ya Yudea. Thangwi penepi ndi pile pidalemba mprofeti kuti:

⁶‘Betelehemu m'nthemba ya Yudea, si iweve mzinda ung'ono tayu pakati pa mizinda yonsene ya mu Yudea; thangwi muna iwepo munabuluka mkadamu ule anafuna dzatsogolera anthu anga Aisraele.’ ”

⁷Tenepo Herodi adachemera alendo ale chibiso-biso mbaavunza ndzidzi maka-maka udaoneka nyenyezi ile.

⁸Iye adaatumiza kwenda ku Betelehemu na kuatonga mbati, “Ndokoni mukamsake-sake mwadidi mwanayo. Mungamgumana mudze na kuno dzandidziwisa kuti ine ndiendembo kamulambira.”

⁹Natenepo iwo adenda, mbali panjira adaona nyenyezi yontho ile ikhadaona iwo kumabulukiro dzuwa. Pidaiona iwo, adakomerwa pyakwanga pene. Iyo idenda patsogolo pawo kufikirana idakaimira padzulu pambuto pakhali mwana pale.

¹¹Iwo adapita m'nyumbamo. Tenepo pidaona iwo mwana na mache ene Maria pabodzi, adagodama pansi mbamulambira. Iwo adabulusa mitukwawo yakudula ya golidi, pyakununkhira pyakuchemerwa libano, na mafuta akununkhira akuchemerwa mure mbapipereka kuna Yesu.

¹²Tenepo adabwerera kwawo na njira inango, thangwi Mulungu adaacheuza kundoto kuti aleke dzera kuna Herodi.

¹³Pikhadenda iwo, mngelo wa Mbuya adaonekera kuna Yosefe kundoto mbalonga mbati, “Herodi anasaka-saka mwanayu towera amphe. Natenepo lamuka ukwate mwana pabodzi na mache ene muthawire kudziko ya Iguputo, mbamukakhale kweneko kufikirana ndakupangani kuti mubulukeko.”

¹⁴Yosefe adalamuka na mosiku mbakwata mwana na mache mbaenda ku Iguputo,

¹⁵kule kudakhala iwo kufikirana ndzidzi udafa Herodi. Penepi pidachitwa kuti pikwane-kwane pikhadalonga Mbuya kudzera muna mprofeti kuti: “Ndidachemera mwananga kubuluka ku Iguputo.”

¹⁶Pidapidziwa Herodi kuti alendo a kumabulukiro dzuwa adachita pyaunthawatawa, adazhangali pyakwanga. Iye adatonga kuti ana onsene achimuna mu Betelehemu na m'nthemba zache zakuzungulira a pyaka piwiri na pyakuchepera athema kuphiwa. Penepi pidatewezana na pikhadava iye kubulukira kuna anyakudziwisa nyenyezi a kumabulukiro dzuwa ale pandzidzi ukhadaonekera nyenyezi.

¹⁷Na njira yeneyi pidakwana-kwana pile pidalonga mprofeti Yeremia kuti:

¹⁸“Mkhuwo ukuveka muluwani ya Rama, mkhuwo wakulira na kubuma kukulu, Rakele akulirira anache mbakhonda funa pukutwa misozi, thangwi amala kufa.”

¹⁹Pidafa Herodi, mngelo wa Mbuya adaonekera kuna Yosefe kundoto mu Iguputo

²⁰mbampanga mbati, “Lamuka, kwata mwana na mache mubwerere kudziko ya Israele, thangwi ale akhayesa kupha mwanayu afa.”

²¹Natenepo Yosefe adalamuka mbakwata mwana na mache mbabwerera ku Israele.

²²Mbwenye pidapiva Yosefe kuti Arikelao akhadapita m'mbuto ya babache, Mfumu Herodi, kunthemba ya Yudea, iye adachita mantha kwendako. Iye adacheuzwa kundotoko, tenepo adenda kunthemba ya Galilea

²³mbakakhazikika muluwani ya Nazareti. Natenepo pidakwana-kwana pikhadalonga maprofeti kuti: “Iye anachemerwa Mnazareti.”