Read cisena MATEO 20 Bible Online

MATEO 20 - cisena bible

MATEO 20

¹“Ufumu wa Kudzulu wakhala ninga tenepa: Pidachitwa na mwenechiro munda, ule adenda na machibese kasaka anyaganyo kuti akaphate basa m'munda mwache wamfesa.

²Iye adapangana nawo kuapagali pansiku kobiri ibodzi ya siliva, mbaagwinya kaphata basa kumunda kwache.

³Paora yachifemba iye adenda pontho kumsika mbaona amuna anango akukhala kwene akusowa chakuphata.

⁴Tenepo iye adaapanga mbati, ‘Ndokonimbo mukaphate basa kumundanga wamfesa, ndinakupagalini mwakuthemerana.’

⁵Tenepo iwo adendadi. “Iye adachita chibodzi-bodzi pa ora yakhumi na chiwiri masikati, pontho paora yachitatu na mawulo.

⁶Ndzidzi ukhali chifupi kuti ukwane ora yachishanu kumawulo mukhaenda iye kumsika mbaona amuna anango azinji akukhala kwene pyawo penepo. Iye adaavunza mbati, ‘Mwatani munakhala pano nsiku yonseneyi okhonda chinthu chakuphata?’

⁷“Iwo adatawira mbati, ‘Nkhabe munthu adatichemera kuti tikamphatire basa tayu.’ “Iye adaapanga mbati, ‘Mphapo, ndokonimbo mukaphate basa kumundanga wamfesa.’

⁸“Pidathobila dzuwa, mwenechiro munda ule adapanga mkadamu wache mbati, ‘Ndoko kachemere anyaganyo onsene towera uapagali kobiri zawo. Utome na ale adamalisira kulembwa ganyo, mbumalisire na adatoma lembwa ale.’

⁹“Amuna adatoma kuphata basa ora yachishanu na mawulo ale adatambira kobiri ibodzi ya siliva kada munthu.

¹⁰Tenepo pidadza amuna akhali akutoma kulembwa basa ale dzapagalwi, adanyerezera kuti anatambira zizinji; mbwenye iwombo adatambira kobiri ibodzi ya siliva kada munthu.

¹¹Iwo adakwata kobiri zawo zile mbakadungunya kuna mwenechiro munda ule

¹²mbati, ‘Amuna adalembwa basa pakumalisira ale aphata basa ora ibodzi basi. Ife tatcherenga na kuphata basa nsiku yonseneyi mbationa nyatwa na dzuwa, mphapo imwe mwaapagali sasawa na ife!’

¹³“Mwenechiro munda ule adatawira mbodzi wa iwo mbati, ‘Ngava kuno, shamwali, ine nee sidakubere tayu. Ayi si iwe tayu udatawira kupagalwi pansiku kobiri ibodzi ya siliva?

¹⁴Tenepo kwata kobiri zakupagali ine uende kwanu. Nkhufuna kwanga kuti ndipase adalembwa pakumalisirayu sasawa na iwepo.

¹⁵Kadi ine nkhabe utongi wakuchita pinafuna ine na kobiri zanga tayu? Kani iwe una bivu thangwi ndine wakufewa manja?’ ”

¹⁶Tenepo Yesu adamalisa na kulonga mbati, “Akumalisira anakhala akutoma, pontho akutoma anakhala akumalisira.”

¹⁷Pikhaenda Yesu kumzinda wa Yerusalemu adenda pakhundu na anyakufunza khumi na awiri ale mbalonga kuna iwo mbati,

¹⁸“Ngavani kuno! Tikwenda ku Yerusalemu, kule kunafuna kaperekwa Mwana Munthu m'manja mwa anyansembe akulu na afunzisi a mwambo. Iwo anatonga kuti iye aphiwe

¹⁹mbampereka kuna anthu okhonda khala Ayuda, ale anafuna dzamselusa, dzamkwapula, pontho kumkhomera pamtanda; mbwenye pangagwanda nsiku zitatu anati alamuswe mbakhala pontho na moyo.”

²⁰Tenepo mkazi Zebedeo adadza na anache awiri achimuna kuna Yesu. Iye adamgodamira Yesu kuti ampemphe chinthu.

²¹Yesu adamvunza mbati, “Unafunanji?” Iye adatawira mbati, “Ndinafuna mudumbire kuti mungakhala mu Ufumu wanu, ananga awiriwa akhalembo mbodzi kumadyo kwanu, unangombo kumabzere kwanu.”

²²Yesu adatawira ana awiri ale mbati, “Imwe nkhabe dziwa tayu chinapempha imwe. Ayi imwe munakwanisa kumwa khomitcho ya nyatwa inafuna dzamwera ine?” Iwo adatawira mbati, “Tinakwanisa.”

²³Yesu adaapanga mbati, “Imwe munamwadi pyakumwa pya m'khomitcho mwanga, mbwenye ine nkhabe utongi wakusankhula nyakukhala kumadyo penu kumabzere kwanga tayu. Mbuto zenezi nsa ale adasasanyirwa na Babanga.”

²⁴Pidapiva anyakufunza anango khumi ale, adazhangalira awiri ale.

²⁵Tenepo Yesu adaachemera onsene pabodzi mbalonga mbati, “Imwe mukupidziwa kuti atongi a anthu okhonda dziwa Mulungu ana mphamvu pana anthu awo, pontho akadamu awo ana utongi wakumalisikiratu.

²⁶Kwache penepi pileke khala tenepa pakati panu. Ngakhala unango wa imwe anafuna kukhala wamkulu, athema kukhala nyabasa wa anango onsene;

²⁷pontho ngakhala unango wa imwe anafuna kukhala wakutoma, athema kukhala bitchu wanu

²⁸ninga Mwana Munthu ule hadadzere dzatumikirwa tayu, mbwenye dzatumikira pontho kupereka moyo wache kuombola anthu azinji.”

²⁹Pikhabuluka Yesu na anyakufunzache mu Yeriko, mwinji ukulu ukhaatewera.

³⁰Maboli-boli awiri, ale akhakhala m'khundu-khundu mwa njira, adava kuti Yesu akhagwanda na penepo. Tenepo iwo adatoma kukhuwa mbati, “Mbuya, Mwana Davite, tiverenimbo nsisi ife!”

³¹Mwinji ule udaalongera mbaapanga kuti amatame. Mbwenye iwo adanyanyiratu kukhuwa pyakwanga pene mbati, “Mbuya, Mwana Davite, tiverenimbo nsisi ife!”

³²Yesu adaimira mbaachemera. Iye adaavunza mbati, “Munafuna kuti ndikuchitireninji?”

³³Iwo adatawira mbati, “Mbuya, tinafuna tione!”

³⁴Yesu adava nawo nsisi mbakhuya maso awo. Kabodzi na kabodzi iwo adakwanisa kuona mbamtewera.