Read cisena MATEO 21 Bible Online

MATEO 21 - cisena bible

MATEO 21

¹Pikhali Yesu na anyakufunzache chifupi kufika mumzinda wa Yerusalemu, adafika m'mudzi wa Betifage, paphiri ya Olivi. Kweneko Yesu adatuma awiri mwa anyakufunzache

²mbaapanga mbati, “Ndokoni m'mudzi uli patsogolo panuwo, kabodzi kene munagumana bulu amangirirwa pabodzi pene na mwanache m'khundu mwache. Kaasudzuleni mudze nawo kuno.

³Tenepo ngakhala munthu analonga pinthu, kampangeni kuti Mbuya[22] akuafuna; mbwenye anati aabweze chinchino pano.”

⁴Penepi pidachitika kuti pikwane-kwane pile pikhadalonga mprofeti mbati,

⁵“Kapangeni mzinda wa Zioni kuti, ‘Yang'ana mfumu wako akudza kuna iwe. Iye ngwakupichepesa, pontho apakira bulu, mwanabulu.’ ”

⁶Tenepo anyakufunza ale adenda mbakachitadi ninga mukhadaapangira Yesu mule.

⁷Iwo adadza na bulu pontho na mwanache ene, mbathasika pyakufinika pyawo pamsana pa mabulu ale, tenepo Yesu adapakira.

⁸Mwinji ukulu udathasika pyakufinika pyawo m'njira, mwenemo anangombo akhagwanda matsamvu a miti mbaathasika m'njira.

⁹Anthu akhafamba patsogolo na m'nduli mwa Yesu ale, akhakhuwa mbati, “Lemedzwani Mwana Davite. Mulungu mbatsanzayise nyakudza na dzina ya Mbuya. Lemedzwani Mulungu.”

¹⁰Pidapita Yesu mu Yerusalemu, mzinda onsene udatekenyeka. Anthu adavunza mbati, “Mbani weneyu?”

¹¹Anthu akubulukira m'mwinji mule adatawira mbati, “Weneyu ndi mprofeti Yesu wa ku Nazareti m'nthemba ya Galilea.”

¹²Yesu adapita m'Nyumba ya Mulungu mbakabulusa kunja onsene ale akhagula na kugulisa malonda mwenemo. Iye adagudubula mathebulu a anyakuchinja kobiri na mipando ya ale akhagulisa nkhangaiwa,

¹³mbalonga kuna iwo mbati, “Pyalembwa m'Malemba kuti Mulungu adalonga mbati, ‘Nyumbanga inachemerwa nyumba yakupemphereramo.’ Mbwenye imwe mukuisandusa nyumba yakubisaliramo mbava!”

¹⁴Maboli-boli na anyakulamala adadza kuna iye m'Nyumba ya Mulungu mule, tenepo iye adaawangisa.

¹⁵Anyansembe akulu na afunzisi a mwambo adazhangali na pidaona iwo pinthu pyakudodomesa pikhachita iye, pontho kuti ana akhakhuwa m'Nyumba ya Mulungu mule mbati, “Lemedzwani Mwana Davite!”

¹⁶Natenepo iwo adavunza Yesu mbati, “Ayi iwe ukuva pinalonga anawa?” Yesu adatawira mbati, “Ande, ndikupiva. Kani imwe chipo mudzati mwawerenga tayu malemba akulonga kuti, ‘Imwe mwafunzisa ana na akachiya ene kukulemedzani mwadidi?’ ”

¹⁷Tenepo Yesu adaasiya mbaenda pyache kuluwani ya Betania, kudakhala iye mosiku wenewo kule.

¹⁸Bzobzo mangwana mwache, pikhabwerera Yesu kumzinda kule, adava njala.

¹⁹Iye adaona muti wamkuyu m'khundu mwa njira mbaenda penepo. Iye hadagumanemo makuyu tayu, mbwenye masamba ene basi. Tenepo iye adalonga kuna muti wamkuyu ule mbati, “Hunabalave nsapo tayu!” Kabodzi kene muti ule udaumiratu.

²⁰Pidaona anyakufunza penepi, adadodoma napyo mbavunza mbati, “Mutiwu wauma tani mwakuchimbiza tenepa?”

²¹Yesu adatawira mbati, “Ndikukupangani pyakuonadi kuti mungakhulupira mbamukhonda penuka, munakwanisa kuchita ninga pyachita ine kuna muti wamkuyuwu. Si pyokhapyo tayu, mbwenye munakwanisa kupanga phiriyi kuti, ‘Lamuka ukapiponye wekha ene m'nyanza,’ tenepo iyo inaendadi.

²²Mungakhulupira, munatambira pinthu pyonsene pinapempha imwepyo kuna Mulungu.”

²³Yesu adabwerera ku Nyumba ya Mulungu, tenepo pikhafunzisa iye, anyansembe akulu na akulu-akulu adadza kuna iye mbamvunza mbati, “Una utongi wanji wakuchita nawo pinthu penepi? Adakupasa utongi wenewu mbani?”

²⁴Yesu adaatawira mbati, “Ndinakuvunzanimbo chinthu chibodzi chene basi. Munganditawira, ndinati ndikupangeni utongi una ine wakuchita nawo penepi.

²⁵Utongi wa Yohani wakubatiza nawo udabulukira kupi? Ayi udabulukira kuna Mulungu, penu kuna munthu?” Iwo adatoma kupokanyisana okhokha mbati, “Tinalonganji? Tingalonga kuti, ‘Udabulukira kuna Mulungu,’ iye anati alonge kuti, ‘Mudakhonderanji, mphapo, kukhulupira pidalonga Yohani?’

²⁶Mbwenye tingalonga kuti, ‘Udabulukira kuna munthu,’ penepa tikugopa anthu, thangwi onsene akupidziwadi kuti Yohani akhali mprofeti.”

²⁷Natenepo iwo adamtawira Yesu mbati, “Ife nkhabe kupidziwabi.” Tenepo Yesu adaatawira mbati, “Inembo sinakupangani tayu utongi una ine wakuchita nawo pinthu penepi.

²⁸“Mphapo, mukunyerezera tani? Pidachitwa na munthu unango, ule akhali na ana awiri achimuna. Iye adenda kuna mwanache wamkulu mbalonga mbati, ‘Mwananga, lero uende kaphata basa kumunda wamfesa.’

²⁹Iye adatawira mbati, ‘Sinafuna tayu.’ Mbwenye m'nduli mwache adasanduza manyerezero mbaenda kumunda kule.

³⁰Tenepo baba ule adendambo kuna mwanache wamng'ono mbalonga chibodzi-bodzi kuna iye. Iye adatawira mbati, ‘Ande baba, ndinaenda.’ Mbwenye hadendeko tayu.

³¹Pakati pa awiriwa, ngupi adachita pidafuna babache?” Iwo adatawira mbati, “Wamkulu ule.” Tenepo Yesu adalonga kuna iwo mbati, “Ndikukupangani pyakuonadi kuti anyamisonkho pontho maputa akupita mu Ufumu wa Mulungu patsogolo panu.

³²Thangwi Yohani Nyakubatiza adadza kuna imwe kukuonesani njira yakulungama yakuti musankhule, mbwenye imwe hamudamkhulupira tayu; mbwenye anyamisonkho na maputa adamkhulupira. Na pidaona imwe kwene penepi, imwe nee mudasanduza manyerezero mbamukhulupira tayu.

³³“Ngavani kuno msangani unangowu. Pidachitwa na mwenechiro munda ule adabzala mfesa m'munda mwache. Iye adamanga mpanda kuzungulira mundawo, adasasanya pontho dzenje yakutchitchithira vinyu m'mundamo, mbamanga pontho nsanja yakuonera nayo mundawo. Kubuluka penepo adabwerekesa mundawo kuna anyantchoche mbaverana nawo kuti iwo ampagali pandzidzi wakuvuna, tenepo adenda pyache paulendo.

³⁴Pidakwana ndzidzi wakutchola mfesa zile, iye adatuma bitchu wache kuna anyantchoche ale kuti akampase khundu yache ya nsapo ikhadaverana iwo ile.

³⁵Anyantchoche ale adaaphata anyabasa ale; mbodzi adammenya, unango adampha, unangombo adamponyera miyala.

³⁶Mwenechiro munda ule adatuma pontho anyabasa anango azinji kupiringana pakutoma, tenepo anyantchoche ale adaachitirambo chibodzi-bodzi.

³⁷Pakumalisira pache iye adatuma mwanache kuna iwo mbalonga mbati, ‘Ndikupidziwadi kuti mwananga anati akamulemedze.’

³⁸Mbwenye pidamuona anyantchoche mwana ule, adalonga okha ene mbati, ‘Anafuna dzasala na mfuma ya mwenechiro mundawu ule ngweneyu. Tendeni timphe, towera mfumayi ikhale yathu.’

³⁹Natenepo iwo adamphata, mbamkwekwetera kunja kwa munda mbampha.”

⁴⁰Yesu adavunza mbati, “Apo, mwenechiro munda ule angadza, anachitanji kuna anyantchoche ale?”

⁴¹Iwo adatawira mbati, “Iye anati aphe anthu akuipa ale mbabwerekesa mundawo kuna anyantchoche anango, anafuna dzampasira nsapo zache pandzidzi wakuvuna ale.”

⁴²Yesu adalonga kuna iwo mbati, “Kadi imwe hamudawerenge tayu Malemba ninga na enewa akuti, ‘Mwala udakhonda anyakumanga nyumba ninga wakusowa basa lero wasanduka wakufunika kupiringana inango yonsene. Penepi ndiye pidachitwa na Mbuya, tenepo mphyakudodomesa pyakwanga kuna ife.’ ”

⁴³Yesu adathimiza kulonga mbati, “Natenepo ndikukupangani kuti Ufumu wa Mulungu unabuluswa kuna imwepo mbuperekwa kuna anthu anachita pinafuna Mulungu ale.”[23]

⁴⁵Anyansembe akulu na Afarisi ale adava msangani wa Yesu ule, mbadziwa kuti iye akhalonga pya iwo,

⁴⁶natenepo iwo adayesa kummanga. Mbwenye iwo akhagopa mwinji ule, thangwi mwinjiwo ukhakhulupira kuti Yesu akhali mprofeti.