Read cisena MATEO 22 Bible Online

MATEO 22 - cisena bible

MATEO 22

¹Yesu adaphatisa pontho basa misangani pikhalonga iye kuna anthu.

²“Ufumu wa Kudzulu wakhala ninga tenepa: Pidachitwa na mfumu unango, ule adasasanya phwando yakukazhali kwa mwanache wamamuna.

³Iye adatuma anyabasache kapanga anthu akhadachemerwa kuphwandoyi kuti adze. Mbwenye iwo hadafune kudza tayu.

⁴Natenepo iye adatuma anyabasa anango kuna anyakuchemerwa ale na mphangwa izi: ‘Chinchino phwando yasasanyika. Tapha ng'ombe pontho na anamphulu anango akunenepa. Pinthu pyonsene pyasasanyika. Bwerani kuphwandoyi!’

⁵Mbwenye anyakuchemerwa kuphwando ale hadaikhe konta tayu mbaenda pyawo kaphata pikhafuna iwo; unango adenda kumunda kwache, unango adenda kumalondache,

⁶anangombo adaphata anyabasa ale mbaamenya na kuapha.

⁷Mfumu ule adazhangali pyakwanga mwakuti adatuma anyankhondo ache mbaenda kapha anyakupha anzawo mbapisa mzindawo ule.

⁸Tenepo iye adachemera anyabasache ale mbaapanga mbati, ‘Phwando yangayi yasasanyika, mbwenye anthu adachemera ine ale hadatheme chemerwa tayu.

⁹Chinchino ndokoni kumphambano zikulu mukachemere anthu onsene anakwanisa kagumana imwe kweneko kuti adze kuphwando.’

¹⁰Natenepo anyabasa ale adenda kunjira mbakachemera anthu onsene adakwanisa iwo kugumana, adidi na akuipa ene. Natenepo m'nyumba ikulu mukhadyerwa phwando mule idadzala na anthu.

¹¹“Mfumu ule adenda m'nyumbamo kayang'ana anyakuchemerwa ale mbaona munthu unango, ule hakhadavala tayu nguwo za paphwando yakukazhali.

¹²Mfumu ule adamvunza mbati, ‘Shamwali wapita tani muno okhonda vala nguwo za paphwandoyi?’ Mbwenye munthu ule adasowa chakulonga.

¹³Mfumu adapanga anyabasache mbati, ‘Mmangeni m'manja na miyendo mumponye kunja mumdima, kweneko iye analira na kukikita mano ache.’ ”

¹⁴Yesu adamalisa na kulonga mbati, “Anyakuchemerwa ngazinji, mbwenye anyakusankhulwa ngakuchepa.”

¹⁵Afarisi adabuluka mbaenda kasasanya njira yakutapa nayo Yesu m'kanwa.

¹⁶Tenepo iwo adatuma anyakufunzawo kuna Yesu pontho na amuna anango a m'gulu ya Herodi. Iwo adalonga mbati, “Mfunzisi, ife timbadziwa kuti imwe mumbalonga pyakuonadi. Imwe mumbafunzisa pyakuonadi pya makhaliro ambafuna Mulungu kuna anthu mwakukhonda gopa manyerezero a anthu, thangwi imwe nkhabe ikha konta kuti iwo mbani tayu.

¹⁷Ngatipangeni, mphapo, pinanyerezera imwe? Ayi nkhudawira mwambo wathu kukhoma msonkho kuna Mfumu wa Roma, penu tayu?”

¹⁸Mbwenye Yesu adadziwa pyakuipa pikhanyerezera iwo pile, natenepo adalonga mbati, “Imwe mfaka-faka! Mwatani munafuna kunditapa m'kanwa?

¹⁹Ndioneseni kobiri yakukhomera msonkho!” Iwo adampasa kobiri ile,

²⁰tenepo iye adaavunza mbati, “Nkhope na dzina pili penepapi mphya ani?”

²¹Iwo adatawira mbati, “Mphya Mfumu wa Roma.” Natenepo Yesu adalonga kuna iwo mbati, “Apo, kaperekeni pya Mfumu wa Roma kuna Mfumu wa Roma, pontho kaperekeni pya Mulungu kuna Mulungu.”

²²Pidava iwo penepi, adadodoma pyakwanga; tenepo adamsiya mbaenda pyawo.

²³Nsiku yontho-yonthoyo Asaduki anango, ale akhalonga kuti anthu nkhabe dzalamuka kuimfa, adadza kuna Yesu mbamvunza

²⁴mbati, “Mfunzisi, Mose adalonga kuti ngakhala mamuna anafa wakusowa ana, mbaleache defuntuyo ampite panyumba mamfelwayo, towera abale naye ana, ale anakhala ninga mbana defuntu ule.

²⁵Mphapo, pidachitwa na amuna anomwe ubaleawo akhakhala kuno ale. Nanawo adasemba mbafa wakusowa ana, kubuluka penepo nyamsolo wache adampita panyumba mamfelwayo.

²⁶Pyontho-pyonthopyo pidachitika kuna nyamsolo wacheyo, pontho na kuna wachitatu kubalwa, tenepo pakumalisira kuna onsene anomwe.

²⁷Pakumalisira pache mkazi ule adafambo.

²⁸Mphapo, pansiku inalamuka anthu kuimfa, mkazi ule anakhala wa ani? Podi onsene unomweawo akhadamsemba.”

²⁹Yesu adaatawira mbati, “Imwe mwadodomeka pikulu, thangwi imwe nkhabe dziwa tayu Malemba, penu mphamvu za Mulungu.

³⁰Thangwi anthu akufa angalamuka, anakhala ninga angelo a kudzulu; iwo hanasembana tayu.

³¹Apo pya kulamuka kwa anthu kuimfa: imwe hamudatome werenga tayu pidakupangani Mulungu? Iye adalonga mbati,

³²‘Ine ndine Mulungu wa Abrahamu, Mulungu wa Isake, pontho Mulungu wa Yakobo.’ Iye ndi Mulungu wa anthu amoyo, si wa anyakufa tayu.”

³³Pidava mwinji penepi, udadodoma na chifunziso chache.

³⁴Pidava Afarisi kuti Yesu akhadaakhuludza Asaduki, iwo adadza pabodzi.

³⁵Tenepo mbodzi wa iwo, mfunzisi wa mwambo, adayesa kumtapa Yesu m'kanwa mbamvunza mbati,

³⁶“Mfunzisi, matongero akufunika pyakwanga kupiringana onsene ngapi m'mwambo?”

³⁷Yesu adatawira mbati, “‘Mfune Mbuya Mulungu wako na mtimako onsene, na moyo wako onsene, pontho na manyerezero ako onsene.’

³⁸Enewa ndi matongero akufunika pyakwanga kupiringana onsene.

³⁹Matongero achiwiri sasawa ninga akutoma mbawa: ‘Mfune mwanzako ninga mumbapifunira iwe wekha ene.’

⁴⁰Mwambo onsene wa Mose, pontho na pifunziso pya maprofeti pyagona pamatongero mawiriwa.”

⁴¹Pidagumanyikana Afarisi anango pabodzi, Yesu adaavunza

⁴²mbati, “Mukunyerezera tani pya Khristu? Ntchidzukulu cha ani?” Iwo adatawira mbati, “Ntchidzukulu cha Davite.”

⁴³Yesu adaavunza mbati, “Ninji, mphapo, Davite adamchemera ‘Mbuya,’ pidalonga iye na mphamvu za Mzimu Wakuchena mbati,

⁴⁴‘Mbuya adalonga kuna Mbuyanga kuti: Khala pano kumadyo kwanga kufikirana ndiikhe anyamalwako pansi pa manyalo ako.’

⁴⁵“Mphapo, ngakhala Davite ene adamchemera ‘Mbuya,’ apo Khristu anakhala tani chidzukulu cha Davite?”

⁴⁶Nee mbodzi adakwanisa kutawira Yesu tayu, tenepo kubulukira nsiku yeneyo na kwenda m'tsogolo, nkhabe mbodzi adawanga mtima kumvunza pontho pinthu pinango.